លើកលែងការចោទប្រកាន់កញ្ញាមានពេជ្ររីតាពីការប៉ងលួចមានស្ថានទម្ងន់ទោសមានន័យថាដល់វេណឧកញ៉ាហេងសៀវិញម្តង!?
03-April-2024 / ព័ត៌មានជាតិ
ភ្នំពេញ៖ លោកកូយសៅចៅក្រមស៊ើបសួរ តុលាការបានសម្រេចលើកលែងការចោទប្រកាន់ពីពាក្យបណ្តឹងឧកញ៉ា ហេង សៀទៅលើ កញ្ញា មាន ពេជ្ររីតា ហៅយូប៊ី ពិធីការិនីទូរទស្សន៍ និងជាអតីតបវរកញ្ញា Miss Grand Cambodia ។តាមដីកាសម្រេចរបស់ សាលាដំបូងរាជធានីភ្នំពេញ ដែល ធ្វើនៅថ្ងៃទី០៧ ខែមិថុនា ឆ្នាំ២០២១បានសម្រេចដូចតទៅ៖
១៖ លើកលែងការចោទប្រកាន់លើឈ្មោះ មាន ពេជ្ររីតា ហៅ យូប៊ី អាយុ២០ឆ្នាំ សញ្ជាតិខ្មែរ ដែលមានអត្តសញ្ញាណដូចខាងលើពីបទ «លួចមានស្ថានភាពទម្ងន់ទោសដោយសារប្រព្រឹត្តអំពើហិង្សា» ប្រព្រឹត្តនៅចំណុចផ្លូវ១៣៨ កែងផ្លូវ២៥៩ ស្ថិតនៅក្រុម២៨ ភូមិ១០ សង្កាត់ទឹកល្អក់២ ខណ្ឌទួលគោក រាជធានីភ្នំពេញ ជាបទល្មើសព្រហ្មទណ្ឌ និងផ្តន្ទាទោសតាមបញ្ញត្តិមាត្រា ៣៥៣ និងមាត្រា ៣៥៧ នៃក្រមព្រហ្មទណ្ឌ។
២៖ សម្រេចលើវត្ថុចាប់យកដូចខាងក្រោម៖២.១៖ ប្រគល់នូវទូរស័ព្ទ១គ្រឿង ម៉ាក iPhone 12 pro Max ពណ៌ទឹកមាស បែកអេក្រង់ (មិនប្រក្រតី) ឱ្យទៅម្ចាស់ដើមវិញឈ្មោះ ហេង សៀ ដូចមានក្នុងកំណត់ហេតុទទួឡវត្ថុចាប់យកលេខ៩០០រវត ចុះថ្ងៃទី១៩ ខែឧសភា ឆ្នាំ២០២១ របស់សាលាដំបូង និងអយ្យការអមសាលាដំបូងរាជធានីភ្នំពេញ។២.២ ប្រគល់នូវទូរស័ព្ទ១គ្រឿងម៉ាក iPhone Pro Max ពណ៌ខ្មៅ បែកអេក្រង់ ឱ្យទៅម្ចាស់ដើមវិញឈ្មោះ មាន ពេជ្ររីតា ។២.៣ រឹបអូសនូវកូនកាំបិតចុងស្រួច ដងខ្មៅ ចំនួន១ដើម ដូចមានក្នុងកំណត់ហេតុ ចុះថ្ងៃទី២០ ខែឧសភា ឆ្នាំ២០២១ របស់សាលាដំបូងរាជធានីភ្នំពេញ និងអយ្យការអមសាលាដំបូងរាជធានីភ្នំពេញ។
កញ្ញា មាន ពេជ្ររីតា ត្រូវបានតុលាការចោទប្រកាន់ពីបទ លួចមានស្ថានភាពទម្ងន់ទោស បន្ទាប់ពីមានការដាក់ពាក្យបណ្តឹងដោយ លោកឧកញ៉ា ហេង សៀ កាលពីថ្ងៃទី១០ ខែឧសភា ឆ្នាំ២០២១។ ជាមួយនឹង ការចោទប្រកាន់នេះ លោកចៅក្រមកូយសៅបានសម្រេចឃុំខ្លួននាងជាបណ្តោះអាសន្ន ប៉ុន្តែដោយមានការចូលខ្លួនការពារក្តី និងដាក់ពាក្យស្នើរបស់ ក្រុមមេធាវីស្ម័គចិត្តសម្តេចតេជោ ដឹកនាំដោយ លោក គី តិច កាលពីថ្ងៃទី១៣ ខែឧសភា ឆ្នាំ២០២១ ក៏បានសម្រេចដោះលែង កញ្ញា មាន ពេជ្ររីតា ឱ្យនៅក្រៅឃុំជាបណ្តោះអាសន្ន ដោយភ្ជាប់ជាមួយនឹងលក្ខខណ្ឌមួយចំនួន។
ការសម្រេចរបស់សាលាដំបូងរាជធានីភ្នំពេញបញ្ជាក់ថា ការយកកាំបិតចាក់ទៅលើ ឧកញ៉ា ហេង សៀ នៅថ្ងៃកើតហេតុក្នុងរថយន្ត មិនមែនដើម្បីប្លន់យកទូរស័ព្ទដៃ ឬដើម្បីដណ្តើមយករូបភាពអាសអាភាសក្នុងទូរស័ព្ទនោះទេ ប៉ុន្តែវាជាការប្រើសិទ្ធិការពារខ្លួន នៅពេលដែលលោកហេង សៀ បានបំពានផ្លូវភេទ ប៉ុនប៉ងរំលោភ ទៅលើរូបនាង ហើយការការពារខ្លួនពីការរំលោភបំពានដោយកំរោលខុសច្បាប់នេះ ច្បាប់ក៏មិនបានកំណត់ឱ្យមានការទទួលខុសត្រូវ ឬមានទោសឡើយ។
ការសម្រេចលើកលែងការចោទប្រកាន់លើ កញ្ញា មាន ពេជ្ររីតា នាពេលនេះជាការផ្តល់ភាពយុត្តិធម៌ចំពោះរូបនាង ក្រោមការស្រាវជ្រាវរបស់តុលាការ ជាពិសេសចៅក្រមស៊ើបសួរ។ យុត្តិធម៌ចំពោះកញ្ញា មាន ពេជ្ររីតា នាពេលនេះក៏ទទួលបាន ដោយសារតែការអន្តរាគមន៍ចូលការពាររបស់ក្រុមមេធាវីស្ម័គចិត្តរបស់សម្តេចតេជោសែន ជាពិសេសគឺការចង់ដឹង ចង់ស្វែងរកការពិត និងចង់ឲ្យជនរងគ្រោះ បានទទួលយុត្តិធម៌ពិតប្រាកដ ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ទើបសម្តេចបានចាត់តាំងក្រុមមេធាវីរបស់សម្តេចចូលការពារនិងស្រាវជ្រាវ រហូតស្វែងរកការពិត ឃើញនៅពេលនេះ។
អាឡូវចប់រឿងកញ្ញាមានពេជ្ររីតាចឹងមានន័យថាដល់វេណចាត់ការលើពាក្យបណ្តឹងកញ្ញាមានពេជ្ររីតាប្តឹងលោកឧកញ៉ាហេងសៀពីរឿងប៉អរំលោភវិញម្តងហើយបើគ្មានការសម្របសម្រួលក្រៅឆាកបញ្ចប់នោះទេ!៕
