មេដឹកនាំរបបសឹកមីយ៉ាន់ម៉ាប្រកាសថានឹងចូលរួមកិច្ចប្រជុំកំពូលអាស៊ាន
27-March-2024 / ព័ត៌មានអន្តរជាតិ
មីយ៉ានម៉ា៖មេដឹកនាំអាស៊ាននឹងជួបប្រជុំគ្នានៅក្នុងប្រទេសឥណ្ឌូនេស៊ី នាថ្ងៃទី២៤ខែមេសាខាងមុខដើម្បីពិភាក្សាពីបញ្ហាសំខាន់ៗនៅក្នុងតំបន់។ ក្នុងកិច្ចប្រជុំនោះមេដឹកនាំយោធាមីយ៉ាន់ម៉ា លោក Min Aung Hlaing ក៏នឹងចូលរួមនៅក្នុងកិច្ចប្រជុំនោះដែរ។
នៅថ្ងៃទី១៧ខែមេសា អ្នកនាំពាក្យក្រសួងការបរទេសបានប្រកាសថា ប្រមុខដឹកនាំយោធាមីយ៉ាន់ម៉ា លោក Min Aung Hlaing នឹងចូលរួមកិច្ចប្រជុំកំពូលអាស៊ាននៅឥណ្ឌូនេស៊ី ថ្ងៃទី២៤ខែមេសា។ នោះជាដំណើរទៅកាន់ក្រៅប្រទេសដំបូងបង្អស់របស់លោក Min Aung Hlaing ចាប់តាំងពីការធ្វើរដ្ឋប្រហារនៅថ្ងៃទី១ខែកុម្ភៈឆ្នាំ២០២១មក។
កាលពីថ្ងៃទី៥ខែមេសា ប្រទេសប្រ៊ុយណេ កាន់តំណែងជាប្រធានសមាគមអាស៊ានបានប្រកាសគាំទ្រជំនួបកំពូលរវាងមេដឹកនាំអាស៊ានធ្វើឡើងនៅទីក្រុងចាការតាប្រទេសឥណ្ឌូនេស៊ី ។ប្រធានាធិបតីឥណ្ឌនេស៊ីលោកចូកូវីដូដូ( Joko Widodo) កាលពីថ្ងៃទី១៩ខែមីនា បានប្រកាសថាលោកមានគម្រោងពិភាក្សាជាមួយព្រះមហាក្សត្រប្រ៊ុយណេ ស្តីពីស្ថានភាពសន្តិសុខនិងសន្តិភាពនៅក្នុងប្រទេសមីយ៉ាន់ម៉ា ។
មីយ៉ាន់ម៉ាធ្លាក់ក្នុងស្ថានភាពអសន្តិសុខចាប់តាំងពីការធ្វើរដ្ឋប្រហារនៅថ្ងៃទី១ខែកុម្ភៈ ហើយចាប់ខ្លួនលោកស្រីអោងសាន ស៊ូជីនិងថ្នាក់ដឹកនាំជាច្រើនរូប។ ចាប់តាំងពីពេលនោះមក មានបាតុកម្មជាច្រើនកើតឡើងប្រឆាំងយោធា ។ មកទល់ពេលនេះមានអ្នកស្លាប់កើនឡើងដល់ទៅ៧២៨នាក់ហើយ និងរាប់ពាន់នាក់ទៀតត្រូវបានចាប់ខ្លួននៅក្នុងពេលធ្វើបាតុកម្ម។
ក្នុងពេលនេះដែរមុននឹងទៅចូលរួមកិច្ចប្រជុំកំពូលអាស៊ាន មេដឹកនាំយោធា លោក Min Aung Hlaing បានសម្រេចដោះលែងអ្នកទោសជាច្រើនផងដែរ ក្នុងឱកាសនៃការប្រារព្ធបុណ្យចូលឆ្នាំថ្មី។ ប៉ុន្តែមិនទាន់ច្បាស់ទេថា តើពួកគេទាំងនោះមានរួមបញ្ចូលទាំងក្រុមសកម្មជន ដែលត្រូវបានជាប់ឃុំដោយសាររដ្ឋប្រហារ កាលពីខែកុម្ភៈកន្លងទៅនេះដែរ ឬយ៉ាងណានោះទេ។
ទីភ្នាក់ងារសារព័ត៌មាន AP នៅរសៀលថ្ងៃសៅរ៍ ទី១៧ ខែមេសា នេះដែរ បានចុះផ្សាយថា ចំពោះការដោះលែងនេះ ត្រូវបានប្រកាសនៅលើកញ្ចក់ទូរទស្សន៍ MRTV របស់រដ្ឋ ដោយបានគូសបញ្ជាក់ថា៖ អគ្គមេបញ្ជាការយោធាលោក មីន អោង ហ្លេង (Min Aung Hlaing) ដែលកំពុងកាន់អំណាចគ្រប់យ៉ាងនៅមីយ៉ាន់ម៉ា បានលើកលែងទោសដល់អ្នកទោសចំនួន ២៣,០៤៧នាក់។ ក្នុងនោះរួមមានជនបរទេស ១៣៧នាក់ ដែលនឹងត្រូវនិរទេសចេញពីប្រទេសមីយ៉ាន់ម៉ា។ បន្ថែមពីនេះ របបយោធាមីយ៉ាន់ម៉ារូបនេះ ក៏បានកាត់បន្ថយការកាត់ទោស ចំពោះអ្នកទោសដទៃទៀតផងដែរ។
សូមជម្រាបថា ការដោះលែងអ្នកទោសមុនពេលកំណត់ ជាទម្លាប់ក្នុងអំឡុងពេលវិស្សមកាលសំខាន់ៗ ប៉ុន្តែនេះជាលើកទី ២ ហើយដែលរបបយោធាកាន់អំណាចបានធ្វើដូច្នេះ ចាប់តាំងពីវាបានផ្តួលរំលំរដ្ឋាភិបាលលោកស្រី អោង សាន ស៊ូ ជី (Aung San Suu Kyi) ដែលបង្កឱ្យមានការប្រឆាំងតវ៉ា ការចាប់ខ្លួន និងការសម្លាប់ជារៀងរាល់ថ្ងៃ ដោយកងកម្លាំងសន្តិសុខ។
ដោយឡែកបើតាមទិន្នន័យពី សមាគមផ្ដល់ជំនួយសម្រាប់អ្នកទោសនយោបាយ (AAPP) ដែលតែងតែឃ្លាំមើលការស្លាប់ និងចាប់ខ្លួនបាតុករ បានបញ្ជាក់ដែរថា កងកម្លាំងរក្សាសន្តិសុខនៃរបបយោធាមីយ៉ាន់ម៉ា បានធ្វើការបង្ក្រាប និងសម្លាប់មនុស្សយ៉ាងហោចណាស់ ៧២៦នាក់ហើយ ខណៈមនុស្ស ២,៧២៨នាក់ រួមមានទាំងលោកស្រី ស៊ូ ជី ផងដែរកំពុងជាប់ឃុំឃាំង គិតចាប់តាំងពីថ្ងៃទី០១ ខែកុម្ភៈ ឆ្នាំ២០២១៕
