ចិនប្រកាសពីការចង់លូកដៃផ្ទាល់ក្នុងរឿងភូមាបន្ទាប់ពីរាំងស្ទះការសម្រេចចិត្តរបស់ក្រុមប្រឹក្សាសន្តិសុខអសប
26-February-2023 / ព័ត៌មានអន្តរជាតិ
ប្រទេសចិន៖លោក វ៉ាង យី (Wang Yi) សមាជិកក្រុមប្រឹក្សារដ្ឋនិងជារដ្ឋមន្ត្រីការបរទេសចិនបាននិយាយកាលពីថ្ងៃអាទិត្យថា ប្រទេសចិនបានត្រៀមខ្លួនរួចជាស្រេចក្នុងការដើរតួនាទីប្រកបដោយការស្ថាបនានៅក្នុងការបន្ធូរបន្ថយភាពតានតឹងនៅក្នុងប្រទេសមីយ៉ាន់ម៉ា។
នៅក្នុងអំឡុងសន្និសីទសារព័ត៌មានស្តីពីទំនាក់ទំនងនិងគោលនយោបាយបរទេសរបស់ចិននៅក្រៅសម័យប្រជុំទី៤នៃសមាជប្រជាជនចិនលើកទី១៣។លោក វ៉ាង បាននិយាយថា «ខ្ញុំសង្ឃឹមថាភាគីពាក់ព័ន្ធនៅក្នុងប្រទេសមីយ៉ាន់ម៉ានឹងរក្សាភាពស្ងប់ស្ងាត់និងអនុវត្តការអត់ធ្មត់, ធ្វើសកម្មភាពដែលឈរលើផលប្រយោជន៍ពលរដ្ឋ និងដោះស្រាយភាពខុសគ្នាតាមរយៈកិច្ចសន្ទនានិងការពិគ្រោះយោបល់ស្ថិតក្នុងក្របខណ្ឌច្បាប់និងរដ្ឋធម្មនុញ្ញ។ ចំណុចអាទិភាពបន្ទាន់គឺបញ្ឈប់ជម្លោះនិងការបង្ហូរឈាមបន្តទៀត ហើយបន្ធូរបន្ថយស្ថានការណ៍ឲ្យបានឆាប់តាមដែលអាចធ្វើទៅបាន។»លោក វ៉ាង បានបន្ថែមថា «ប្រទេសមីយ៉ាន់ម៉ាគឺជាសមាជិកមួយរបស់អាស៊ាន។ ចិនគាំទ្រអាស៊ានក្នុងការប្រកាន់ខ្ជាប់នូវគោលការណ៍មិនជ្រៀតជ្រែកកិច្ចការផ្ទៃក្នុង។»
លោក វ៉ាង បាននិយាយថា «គោលនយោបាយមិត្តភាពរបស់ចិនចំពោះមីយ៉ាន់ម៉ាគឺសម្រាប់ពលរដ្ឋមីយ៉ាន់ម៉ាទាំងអស់។ ប៉ុន្មានឆ្នាំមកនេះយើងបានរក្សាការផ្លាស់ប្តូរមិត្តភាពជាមួយគណបក្សនយោបាយផ្សេងៗនៅក្នុងប្រទេសមីយ៉ាន់ម៉ារួមទាំងគណបក្សសម្ព័ន្ធភាពជាតិដើម្បីប្រជាធិបតេយ្យ។ មិនថាស្ថានភាពវិវត្តន៍ទៅជាយ៉ាងណាទេ ចិននឹងមិនផ្លាស់ប្តូរទិសដៅនៃបុព្វហេតុក្នុងការជំរុញមិត្តភាពនិងកិច្ចសហប្រតិបត្តិការជាមួយមីយ៉ាន់ម៉ាឡើយ»។
សូមបញ្ជាក់ថាប្រទេសចិនជាប្រទេសតែមួយដែលរារាំងក្រុមប្រឹក្សាសន្តិសុខអសបមិនឲ្យចេញសេចក្តីសម្រេចហៅពួកយោធាថាជាការធ្វើរដ្ឋប្រហារដោយឲ្យហៅថាជាការកែសម្រួលវិញ។ការប្រកាសរបស់ចិនបានកើតឡើងក្នុងពេលដែលក្នុងប្រទេសភូមានមានការបង្ក្រាបការតវ៉ាដោយការបាញ់សម្លាប់ចំពោះបាតុកដែលកើនឡើងជាបន្តបន្ទាប់រហូតដល់ជាង៥០នាក់ទៅហើយចាប់ពីថ្ងៃទី១កុម្ភៈមក។
ប្រជាជនមីយ៉ាន់ម៉ានៅថ្ងៃទី៨មីនានៅតែបន្តប្រមូលផ្តុំគ្នាតវ៉ានៅតាមទីក្រុងធំៗដូចជាទីក្រុងYangon, Mandalay និងទីក្រុងមួយចំនួនទៀត។ប្រជាជននៅកន្លែងជាច្រើនក៏បានដាក់«របាំងខាងវិញ្ញាណ»ជាមួយនឹងសម្លៀកបំពាក់និងខោអាវនារីផងដែរពីព្រោះទាហាននៃប្រទេសនេះចាត់ទុកពួកគេជាវត្ថុដែលគ្មានសំណាង។សម្ព័ន្ធសហជីពមីយ៉ាន់ម៉ាបានអំពាវនាវឱ្យធ្វើកូដកម្មទូទាំងប្រទេសចាប់តាំងពីថ្ងៃទី១ ខែមីនាដើម្បីប្រឆាំងនឹងរដ្ឋប្រហារយោធា។
អង្គការចំនួន៩ដែលតំណាងឱ្យកម្មករមីយ៉ាន់ម៉ាបានស្នើសុំឱ្យប្រជាជនទាំងអស់ឈប់ធ្វើការដើម្បីដាក់សម្ពាធដល់រដ្ឋាភិបាលយោធាឱ្យផ្តល់អំណាចដល់រដ្ឋាភិបាលស៊ីវិល។កងទ័ពមីយ៉ាន់ម៉ាកាលពីពេលថ្មីៗនេះបានបញ្ជូនកម្លាំងទៅកាន់ទីក្រុងធំៗដើម្បីការពារការធ្វើបាតុកម្មប្រឆាំងរដ្ឋប្រហារដែលមិនបានបង្ហាញសញ្ញានៃការធ្លាក់ចុះ។ប្រជាជនមីយ៉ាន់ម៉ានៅតែប្តេជ្ញាចិត្តធ្វើដំណើរតាមដងផ្លូវដើម្បីប្រឆាំងនឹងរដ្ឋាភិបាលយោធាទោះបីជួបប្រទះនឹង“ថ្ងៃបង្ហូរឈាម”ដែលបណ្តាលឱ្យមានមនុស្សរាប់សិបនាក់បានស្លាប់រួមទាំងកុមារ។
ដោយឡែករដ្ឋមន្ត្រីការេពារជាតិអូស្ត្រាលី ម៉ារ៉ាយ ផេន (Marise Payne) បាននិយាយនៅថ្ងៃច័ន្ទនេះបានប្រកាសថា ប្រទេសអូស្ត្រាលីបានផ្អាកកម្មវិធីសហប្រតិបត្តិការផ្នែកការពារជាតិជាមួយប្រទេសមីយ៉ាន់ម៉ា ក្នុងគ្រាមានការបង្ក្រាបកាន់តែខ្លាំងឡើងដោយយោធារបស់ប្រទេសនេះទៅលើការតវ៉ាទ្រង់ទ្រាយធំប្រឆាំងនឹងរដ្ឋប្រហារកាលពីខែមុន។លោកស្រី ផេន បាននិយាយដែរថា ប្រទេសអូស្ត្រាលីក៏នឹងបង្វែរទិសដៅជំនួយមនុស្សធម៌ភ្លាមៗទៅឲ្យពលរដ្ឋមូស្លីមភាគតិចរ៉ូហ៊ីយ៉ា និងក្រុមជនជាតិភាគតិចផ្សេងៗទៀត។
អាជ្ញាធរបានប្រកាសថា អូស្ត្រាលីក៏នឹងបន្តទាមទារឲ្យមានការដោះលែង លោក សន ធឺនណែល (Sean Turnell) ដែលជាសេដ្ឋវិទូ និងជាទីប្រឹក្សាជនជាតិ អូស្ត្រាលីរបស់ លោកស្រី អ៊ុងសាន ស៊ូជី (Aung San Suu Kyi) ផងដែរ។លោក ធឺនណែល ត្រូវបានចាប់ឃុំខ្លួនដោយមានការកំហិតសេវាកុងស៊ុលចាប់តាំងពីរដ្ឋប្រហារនៅថ្ងៃទី១ ខែកុម្ភៈ ដែលបានផ្តួលរំលំរដ្ឋាភិបាលជាប់ឆ្នោតរបស់ប្រទេសមីយ៉ាន់ម៉ា។
មនុស្សរាប់រយនាក់បានប្រមូលផ្តុំគ្នានៅទីក្រុងស៊ីដនី ដែលជាទីក្រុងធំជាងគេបំផុតរបស់ប្រទេសអូស្ត្រាលីកាលពីថ្ងៃចុងសប្តាហ៍កន្លងទៅដោយទទូចឲ្យរដ្ឋាភិបាលអូស្ត្រាលីប្រកាន់ជំហររឹងមាំប្រឆាំងនឹងរដ្ឋប្រហារនៅមីយ៉ាន់ម៉ា។ ប្រទេសនៅក្នុងតំបន់អាស៊ីអាគ្នេយ៍មួយនេះបានធ្លាក់ទៅក្នុងការវឹកវរ បន្ទាប់ពីយោធាបានដណ្ដើមគ្រប់គ្រងប្រទេស និងបានចាប់ឃុំខ្លួនក្រុមមេដឹក នាំជាប់ឆ្នោតដែលនេះបានដុតបញ្ឆេះឲ្យមានការតវ៉ាជារៀងរាល់ថ្ងៃ ដែលរហូតមកដល់ពេលនេះអង្គការសហប្រជាជាតិបានប្រកាសថា មនុស្សជាង ៥០នាក់ហើយត្រូវបានសម្លាប់៕
