ប៉ូលិសតាមចាប់ក្រុមអ្នករត់ផាសអាប់ ដែលបាញ់សម្លាប់មនុស្សពីរនាក់ និងម្នាក់រងរបួស(វីដេអូ)
21-September-2026 / សន្តិសុខសង្គម
ភ្នំពេញ ៖ សមត្ថកិច្ចកំពុងតែតាមចាប់ក្រុមខ្មាន់កាំភ្លើងដែលបានបាញ់សម្លាប់មនុស្សពីរនាក់ និងម្នាក់រងរបួស នៅចំណុចលើផ្លូវបេតុង មុខហាងលក់ទូរស័ព្ទដៃពន្លកថ្មី ភូមិព្រៃព្រីងខាងត្បូង១ សង្កាត់ចោមចៅ២ ខណ្ឌពោធិ៍សែនជ័យ កាលពីយប់ថ្ងៃទីថ្ងៃទី១១ ខែកុម្ភៈ ឆ្នាំ២០២១។នេះបើតាមអ្នកនាំពាក្យអគ្គស្នងការដ្ឋាននគរបាលជាតិ លោកឧត្តមសេនីយ៍ឯក ឆាយ គឹមខឿន។
តាមរយៈកាម៉ារ៉ាសុវត្ថិភាពននៅកន្លែងកើតហេតុ សមត្ថកិច្ចមានតម្រុយខ្លះហើយក្នុងការតាមស្វែងរកក្រុមជនដៃដល់។ជនរងគ្រោះទាំងបីនាក់ ដែលត្រូវបានខ្មាន់កាំភ្លើងបាញ់ឲ្យស្លាប់ និងរបួសមានដូចជាៈ
១. ឈ្មោះ សុខ ស៊ីដេត ភេទប្រុស អាយុ៤១ឆ្នាំ មុខរបរលក់ខោអាវ ទីលំនៅភូមិអង្គរ ឃុំអង្គរ ស្រុកកងមាស ខេត្តកំពង់ចាម ស្នាក់នៅផ្ទះជួល ផ្លូវបេតុង ភូមិព្រៃព្រីងខាងត្បូង១ សង្កាត់ចោមចៅ២ ខណ្ឌពោធិ៍សែនជ័យ ត្រូវគ្រាប់កាំភ្លើងចូលនៅកខាងស្តាំធ្លាយចេញនៅកខាងឆ្វេង (ស្លាប់បាត់បង់ជីវិតនៅមន្ទីរពេទ្យព្រះកុសុមៈ)។
២. ឈ្មោះ គឹម ឈៀកលីន ភេទប្រុស អាយុ៤២ឆ្នាំ ទីលំនៅភូមិជីបាន ឃុំជីបាន ស្រុកស្រីសន្ធរ ខេត្តកំពង់ចាម ស្នាក់នៅផ្ទះជួលសង្កាត់ចោមចៅ២ ខណ្ឌពោធិ៍សែនជ័យ។ គ្រាប់កាំភ្លើងត្រូវចំក្បាលខាងក្រោយចំហៀងខាងឆ្វេងធ្លាយចេញនៅក្បែរចុងចិញ្ចើមខាងស្តាំ (ស្លាប់នៅកន្លែង)។
៣. ឈ្មោះ ប៉ូ សុធី ភេទប្រុស អាយុ៤៧ឆ្នាំ រងរបួសនាំទៅសង្គ្រោះបន្ទាន់នៅមន្ទីរពេទ្យមិត្តភាពខ្មែរសូវៀត។
ប្រភពបានបន្តថា ក្រុមខ្មាន់កាំភ្លើងមានគ្នាចំនួន ៥នាក់ បានរត់គេចខ្លួន បន្ទាប់ពីធ្វើសកម្មភាពបាញ់ស្លាប់ជនទៅលើជនរងគ្រោះ។ នៅកន្លែងកើតហេតុបានរកឃើញសំបកគ្រាប់អាវុធខ្លី៣គ្រាប់។ហើយសមត្ថកិច្ចកំពុងតែតាមចាប់ខ្លួនដើម្បីយកមកផ្តន្ទាទោសតាមច្បាប់។
ជនរងគ្រោះឈ្មោះ ប៉ូ សុធី ភេទប្រុស អាយុ៤៧ឆ្នាំ បានឲ្យដឹងថា នៅមុនពេលកើតហេតុខ្លួន និងឈ្មោះ ស៊ីដេត ឈ្មោះ ឈៀកលីន ព្រមទាំងមិត្តភក្តិជាច្រើននាក់ បានអង្គុយផឹកស៊ីនៅមុខផ្ទះឈ្មោះ មុន្នី ពេលនោះស្រាប់តែមានអ្នកបើកកង់បីឥណ្ឌាពណ៌ស បានបើកមកដល់មុខកន្លែងផឹកស៊ីទៅមុខទៀត មិនរួចព្រោះមានរថយន្តម៉ាកស្តារិចចតបាំងផ្លូវ ហើយអ្នកបើកកង់បីក៏បានទាស់ពាក្យសំដីជាមួយម្ចាស់រថយន្តស្តារិចដែលចតបាំងផ្លូវវាយតប់គ្នាហើយអ្នកបើកផសាអាប់ក៏ចេញបាត់ទៅ។
ខាងភាគីរថយន្តបន្តទៀតថា លុះដល់វេលាម៉ោង៩យប់ថ្ងៃដដែល ស្រាប់តែលេចមុខជនបង្កបើកម៉ូតូកង់បីមកវិញម្តងទៀត រួមជាមួយបក្សពួក២នាក់ទៀតជិះម៉ូតូម្នាក់មួយគ្រឿងមកសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត (ពេទ្យរុស្ស៊ី) ដល់ឈប់ រួចចុះពីលើកង់បី ហើយជនសង្ស័យជាអ្នកបើកម៉ូតូកង់បី និងបក្សពួកម្នាក់ទៀតបានចូលទៅឈ្លោះប្រកែកគ្នាជាមួយម្ចាស់រថយន្តទៀត ។
ប្រភពដដែលបន្តថា ដោយឡែកបក្សពួកម្នាក់ទៀតមានកាំភ្លើងសៀតនឹងចង្កេះ គឺនៅឆ្ងាយពីកន្លែងជម្លោះនោះ២ទៅ៣ម៉ែត្រ ។ ខណៈពេលដែលជនបង្កកំពុងតែឈ្លោះប្រកែកគ្នាជាមួយម្ចាស់រថយន្តនោះ ស្រាប់តែជនបង្កបានដើរទៅដកកាំភ្លើងពីបក្សពួករបស់ខ្លួន បាញ់សំដៅទៅលើជនរងគ្រោះចំនួន៣គ្រាប់ ធ្វើឱ្យរងរបួសធ្ងន់ធ្ងរ៣នាក់ដួលក្នុងថ្លុកឈាម រួចបញ្ជូនទៅមន្ទីរពេទ្យ ចំណែកឈ្មោះ អាត ថា ជាម្ចាស់រថយន្តវិញ បានរត់រួចពុំត្រូវរបួសឡើយ ហើយក្រុមជនសង្ស័យក៏នាំគ្នាបើកម៉ូតូគេចខ្លួនបាត់អស់តែម្តង ។
បើតាមប្រភពព័ត៌មាននៅកន្លែងកើតហេតុបានឱ្យដឹងថា ពេលកើតហេតុដំបូង ជនសង្ស័យដែលជាអ្នកបើកម៉ូតូកង់បីបានអះអាងថា ជនរងគ្រោះជាម្ចាស់រថយន្តមានវាយទៅលើរូបគាត់ ធ្វើឲ្យគាត់ខឹងទើបហៅសាច់ញាតិបងប្អូនមកកន្លែងកើតហេតុ ដើម្បីជួយអន្តរាគមន៍ ។
ចំណែកជនរងគ្រោះជាម្ចាស់រថយន្តវិញបានអះអាងថា ពេលដែលកើតហេតុ គាត់មិនបានវាយទៅលើជនសង្ស័យទេ គ្រាន់តែឈ្លោះប្រកែកគ្នា ហើយជនសង្ស័យនៅឈប់នៅកន្លែងកើតហេតុជិតមួយម៉ោង ដោយមិនព្រមបើកចេញទៅណា គឺនៅឈប់រង់ចាំបក្សពួកមកជួយ ចំណែករូបគាត់ត្រូវបានអ្នកជិតខាងដែលផឹកស៊ីជាមួយគ្នាបានមកសម្របសម្រួល រួចហៅទៅអង្គុយផឹកបន្តទៀត ស្រាប់តែបក្សពួកជនសង្ស័យមកដល់បានឈ្លោះប្រកែកគ្នាទៀត រហូតដកកាំភ្លើងបាញ់ត្រូវរបួសអ្នកដែលអង្គុយផឹកស៊ីជាមួយគ្នានោះធ្វើឱ្យបាត់បង់ជីវិត២នាក់ និងរបួសធ្ងន់ម្នាក់ ចំណែករូបគាត់ជាម្ចាស់រថយន្តមិនមានរងរបួសទេ ។
គួរបញ្ជាក់ថា ក្រោយពេលកើតហេតុ ជនរងគ្រោះ២នាក់ឈ្មោះ សៀក លឹម និងឈ្មោះ សុខ ស៊ីដេត ត្រូវបានក្រុមគ្រួសារដឹកតាមម៉ូតូកង់បីខ្មែរ ដើម្បីសង្គ្រោះបឋមនៅគ្លីនិចឯកជន សម្ភពចោមចៅ តែដោយសារតែរបួសធ្ងន់ធ្ងរពេក គ្លីនិចឯកជនបានដឹកជនរងគ្រោះទៅសង្គ្រោះបន្តទៅមន្ទីរពេទ្យព្រះកុសុមៈ ប៉ុន្តែជាអកុសលជនរងគ្រោះទាំង២នាក់បានបាត់បង់ជីវិតទៅហើយ ។ ចំណែកជនរងគ្រោះម្នាក់ទៀត ឈ្មោះ បូ សុភី ត្រូវបានក្រុមគ្រួសារ ដឹកបញ្ជូនទៅមន្ទីរពេទ្យរុស្ស៊ី ដើម្បីសង្គ្រោះ។ក្រោយពេលកើតហេតុ កម្លាំងសមត្ថកិច្ចចម្រុះ កម្លាំងជំនាញ ខណ្ឌ ក្រុង ក្រសួង កម្លាំងអាជ្ញាធរ ចុះទៅពិនិត្យ សាកសួរដល់ទីតាំងកើតហេតុ ដើម្បីធ្វើការស្រាវជ្រាវជុំវិញករណី ខាងលើ ដើម្បីតាមចាប់ជនបង្កទាំង៣នាក់ខាងលើ យកមកផ្តល់ន្ទាទោសតាមច្បាប់៕
