អ្នកឧកញ៉ា ហ៊ុន តូ ឈ្នះក្តីនៅប្រទេសអូស្រ្តាលី ពាក់ព័ន្ធករណីប្តឹងសារព័ត៌មាន The Australianតែនៅ ក្រុមហ៊ុនវិភាគកាក់ឌីជីថលរបស់អង់គ្លេសឈ្មោះថា Ellipticមួយទៀត?
21-September-2026 / សេដ្ឋកិច្ច
អូស្រ្តាលី៖ តុលាការសហព័ន្ធនៃប្រទេសអូស្ត្រាលី បានចេញសេចក្តីសម្រេចដោយផ្តល់បានយុត្តិធម៌ និងភាពស្អាតស្អំ ជូនអ្នកឧកញ៉ា ហ៊ុន តូ ពាក់ព័ន្ធករណីសារព័ត៌មាន The Australian បានចុះផ្សាយចោទប្រកាន់ខុសការពិត លើអ្នកឧកញ៉ា ហ៊ុន តូក្មួយសម្តេចតេជោហ៊ុនសែន កាលពីថ្ងៃទី៥ ខែសីហា ឆ្នាំ២០២២ (២ឆ្នាំមុន) នៅលើគេហទំព័រ និងបោះពុម្ពកាសែតរបស់ខ្លួន។
នេះបើយោងតាមលិខិតរបស់លោក Thomson Geer មេធាវីរបស់សារព័ត៌មាន The Australian នៅប្រទេសអូស្រ្តាលី ដកស្រង់សេចក្តីសម្រេចរបស់តុលាការសហព័ន្ធ នៃប្រទេសអូស្រ្តាលី ចុះថ្ងៃទី០៥ ខែកក្កដា ឆ្នាំ២០២៤ ដែលបណ្តាញព័ត៌មាន Fresh News ទទួលបាននៅថ្ងៃទី១៥ ខែកក្កដា ឆ្នាំ២០២៤នេះ។
លិខិតរបស់លោកមេធាវី Thomson Geer បានបញ្ជាក់យ៉ាងដូច្នេះថា «សារព័ត៌មាន The Australian មិនមានចេតនាថា លោក ហ៊ុន តូ មានពិរុទ្ធលើបទឧក្រិដ្ឋណាមួយ ឬថាមានភស្តុតាងដែលថា គាត់បានជាប់ពាក់ព័ន្ធដោយផ្ទាល់នៅក្នុងបញ្ហានៃអត្ថបទទាំងនេះទេ។ យើងទទួលយកការបដិសេធរបស់លោក ហ៊ុន តូ ដែលថា គាត់មិនជាប់ពាក់ព័ន្ធ»។
ឥឡូវនេះសារព័ត៌មាន The Australian បានដកចេញនូវអត្ថបទខាងលើ ព្រមទាំងចេញសេចក្តីបំភ្លឺទាក់ទងឡើងវិញ ពាក់ព័ន្ធអត្ថបទចេញផ្សាយទាំងនោះ កាលពីពេលថ្មីៗថ្ងៃទី០៩ ខែកក្កដា ឆ្នាំ២០២៤, លិខិតរបស់លោកមេធាវី Thomson បន្ថែមយ៉ាងដូច្នេះ។
សូមជំរាបថា កាលពីថ្ងៃទី០៥ ខែសីហា ឆ្នាំ២០២២ សារព័ត៌មាន The Australian បានចេញផ្សាយខុសការពិតថា អ្នកឧកញ៉ា ហ៊ុន តូ ជាប់ពាក់ព័ន្ធជាមួយបណ្ដាញឧក្រិដ្ឋកម្មផ្សេងៗដូចជា ការជួញដូរមនុស្ស ការឆបោកតាមអ៊ិនធើណែត និងការនាំចូលគ្រឿងញៀន។ ក្រោយពីការចេញផ្សាយ អ្នកឧកញ៉ា ហ៊ុន តូ តាមរយៈលោកមេធាវី Adam Lopez ប្រចាំនៅប្រទេសអូស្រ្តាលី បានដាក់ពាក្យបណ្តឹងប្តឹងសារព័ត៌មាន The Australian ដើម្បីផ្តល់យុត្តិធម៌ និងភាពស្អាតស្អំ។បន្ទាប់ពីប្តឹងផ្តល់នៅពេលនេះ តុលាការសហព័ន្ធនៃប្រទេសអូស្ត្រាលី បានផ្តល់យុត្តិធម៌ និងស្អាតស្អំជូនអ្នកឧកញ៉ា ហ៊ុន តូ ព្រមទាំងដកអត្ថបទចេញផ្សាយរបស់ខ្លួន ព្រមទាំងចេញបំភ្លឺឡើងវិញផងដែរ។
សូមបញ្ជាក់ថាក្រៅពីកាសែត The Australian ថ្មីៗនេះវិទ្យុបារាំងនៅកម្ពុជាក៏បានដកចេញផ្សាយពត៍មានករណីយ៍អ្នកឧកញ៉ាហ៊ុនតូត្រូវបានក្រុមហ៊ុនមួយផ្សាយថាបានរកចំណូលរាប់រយលានដុល្លារពីទីផ្សារល្បែងអនឡាញនោះដែរ។គេមិនដឹងថាតើអ្នកឧកញ៉ាហ៊ុនតូបានប្តឹងដែរឬអត់នោះទេ។
សូមបញ្ជាក់ថាក្រុមហ៊ុនវិភាគកាក់ឌីជីថលរបស់អង់គ្លេសឈ្មោះថា Elliptic បានចេញផ្សាយរបាយការណ៍នៅថ្ងៃទី១០កក្កដាម្សិលមិញដោយបង្ហាញថា បងប្អូនជីដូនមួយលោកនាយករដ្ឋមន្ត្រីហ៊ុន ម៉ាណែត គឺលោក ហ៊ុន តូ មានពាក់ព័ន្ធនឹងការរកស៊ីទីផ្សារអនឡាញខ្មៅងងឹត។ បើតាម Elliptic ក្រុមហ៊ុន Huione Group គ្រប់គ្រងដោយលោក ហ៊ុន តូ មិនត្រឹមតែជួយសម្រួលដល់ការបោកប្រាស់តាមអ៊ីនធឺនែត ប៉ុន្តែក្រុមហ៊ុនបុត្រសម្ព័ន្ធមួយនេះថែមទាំងជួយសម្រួលដល់សកម្មភាពលាងលុយកខ្វក់ដែលទទួលបានពីការបោកប្រាស់ជនរងគ្រោះនៅជុំវិញពិភពលោកថែមទៀតផង។
គួរជ្រាបថា លោក ហ៊ុន តូ ជាអគ្គនាយកម្នាក់នៅក្នុងក្រុមហ៊ុន Huione Group ដែលជាបណ្តាញទីផ្សារអនឡាញ Huione Guarantee។បណ្តាញទីផ្សាររកស៊ីតាមអនឡាញមួយនេះត្រូវបាន Elliptic រកឃើញទៀតថាបានពង្រីកខ្លួនធំឡើងៗ តាមរយៈប្រតិបត្តិករបោកប្រាស់អនឡាញជាច្រើននៅអាស៊ីអាគ្នេយ៍។ ចាប់តាំងពីឆ្នាំ២០២១ ទីផ្សារអនឡាញដ៏កខ្វក់នេះបានប្រតិបត្តិការ ដោយរកចំណូលបានយ៉ាងហោចណាស់ ១១ពាន់លានដុល្លារ តាមរយៈការបោកប្រាស់តាមអនឡាញដូចជា ការបោកបញ្ជោតក្នុងទំនាក់ទំនងស្នេហាផ្លូវភេទ ការបោកប្រាស់ក្នុងគម្រោងវិនិយោគ និងការចាប់ជំរិតជាដើម។ នេះបើតាមការស៊ើបអង្កេតរបស់ Elliptic ដោយអះអាងយោងទៅលើភស្តុតាងរឹងមាំ និងថា ប្រាក់ដែលបោកប្រាស់បានពីជនរងគ្រោះត្រូវផ្ទេរទៅកាន់ប្រទេសជាច្រើន ដោយការបំប្លែងទៅជាទ្រព្យសម្បតិ្តផ្សេងៗរួមមាន លុយសុទ្ធ កាក់ថេរ (stablecoints) និងផ្ទេរទៅកម្មវិធីទូទាត់លុយរបស់ចិន។ ជុំវិញរបាយការណ៍របស់ក្រុមហ៊ុនវិភាគកាក់ឌីជីថលរបស់ Ellipticនេះ វិទ្យុបារាំងអន្តរជាតិបានព្យាយាម
ទាក់ទងទៅអ្នកនាំពាក្យនាយករដ្ឋមន្ត្រី លោក មាស សុភ័ណ្ឌ តែនៅមិនមានការឆ្លើយតបយ៉ាងណានៅឡើយទេ គិតត្រឹមរសៀលថ្ងៃទី១១កក្កដានេះ។កន្លងមកលោក ហ៊ុន តូ ដែលមានងារជាអ្នកឧកញ៉ាធ្លាប់ត្រូវគេចោទថាបានឈរឈ្មោះបង្កើតក្រុមហ៊ុនជាច្រើនជាមួយជនជាតិចិនជាប់ពាក់ព័ន្ធបណ្ដាញប្រព្រឹត្តបទឧក្រិដ្ឋនិងលាងលុយកខ្វក់។ នៅក្នុងឆ្នាំ២០១២ ជីដូនមួយនាយករដ្ឋមន្ត្រីកម្ពុជារូបនេះត្រូវបានប៉ូលិសអូស្ត្រាលីសង្ស័យពីបទជួញដូរហេរ៉ូអ៊ីន និងលាងលុយកខ្វក់ចូលប្រទេសអូស្ត្រាលី តែអ្នកនាំពាក្យរដ្ឋាភិបាលកម្ពុជាជំនាន់នាយករដ្ឋមន្ត្រី លោក ហ៊ុន សែន ច្រានចោល និងចាត់ទុកថាជារឿងមួលបង្កាច់ បង្ខូចកេរ្តិ៍ឈ្មោះលោក ហ៊ុន តូ ក៏ដូចជាការវាយប្រហារលើនាយករដ្ឋមន្ត្រី និងប្រទេសកម្ពុជា។គួរជម្រាបជូនថា ក្រុមហ៊ុន Huione Group ដែលពីមុនត្រូវបានគេស្គាល់ថា Huione currency exchange ត្រូវបានបង្កើតឡើងនៅក្នុងប្រទេសកម្ពុជានៅឆ្នាំ២០១៤។ ក្រុមហ៊ុននេះរកស៊ីលើការទូទាត់ និងប្តូរសាច់ប្រាក់ ធានារ៉ាប់រង អាកាសចរណ៍ និងអចលនទ្រព្យជាដើម៕ (អត្ថបទវិទ្យុបារាំង)https://www.theaustralian.com.au/nation/clarification-regarding-hun-to/news-story/682350b05a7a427c1ef7ab43f95df9f5?amp&nk=290e3c534d9be6e0f856b3e61ae3b161-1721039438
