ថវិការជាតិសម្រាប់ការគ្រប់គ្រងឆ្នាំ២០១៩មានជាង៦ពាន់លានដុល្លារអាមេរិក
27-March-2024 / សេដ្ឋកិច្ច
ភ្នំពេញ ៖ កិច្ចប្រជុំពេញអង្គគណៈរដ្ឋមន្ត្រី កាលពីព្រឹកថ្ងៃទី២៦ខែតុលា ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអនុម័តគាំ លើសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ដែលត្រូវបានកំណត់ស្មើប្រមាណប្រមាណជាង ២៥ លានលានរៀល ដែលប្រហាក់ប្រហែលជាង ៦ពាន់លានដុល្លារអាមេរិក ។
បើតាមខ្លឹមសារសង្ខេបស្តីពីសេចក្តីព្រាងច្បាប់ថវិកាជាតិ ឆ្នាំ២០១៩ របស់ក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា ថវិកាឆ្នាំ២០១៩ នឹងដើរតួនាទីជាឧបករណ៍នៃគោលនយោបាយ របស់រាជរដ្ឋាភិបាល ប្រកបដោយប្រសិទ្ធភាព និងស័ក្តិសិទ្ធិភាព ក្នុងការរក្សា ការពារ និងពង្រឹងថែមទៀត នូវសមិទ្ធផលដ៏ធំធេងដែលកម្ពុជា សម្រេចបានកន្លងមក ក៏ដូចជាក្នុងការបន្តបុកគ្រឹះសម្រាប់បម្រើ ឲ្យការអភិវឌ្ឍរបស់កម្ពុជាតទៅមុខទៀតដើម្បីធ្វើឲ្យឋានៈកម្ពុជាក្លាយជាប្រទេសមានចំណូលមថ្យមកំរឹតខ្ពស់នៅឆ្នាំ២០៣០។
គោលការណ៍សំខាន់ៗគឺធានាកំណើនសេដ្ឋកិច្ចក្នុងរង្វង់៧ភាគរយក្នុង១ឆ្នាំ។ បង្កើតការងារថ្មីនិងធានាប្រាក់ចំណូលបានខ្ពស់ជូនប្រជាពលរដ្ឋពិសេសយុវជន។ បន្តតម្លើងប្រាក់បៀរវត្សជូនមន្ត្រីរាជការកងកម្លាំងប្រដាប់អាវុធដែលមានជាមធ្យម១០ម៉ឺនរៀលក្នុងម្នាក់ដើម្បីលើកកំពស់ប្រសិទ្ធិភាពសេវាសាធារណះ។ថែទាំសុខភាពមន្ត្រីសាធារណះ អតីតយុទ្ធជន កម្មករ មាតុភាពកម្មការិនី...។ តម្លើងប្រាក់បំណាច់ជូនមន្ត្រីជាប់កិច្ចសន្យាថែម៥ម៉ឺនរៀលទៀត។ កែសម្រួលនិងតម្លើងប្រាក់សោធននិវត្តន៍។
ជារួមថវិការសម្រាប់ការគ្រប់គ្រងឆ្នាំ២០១៩បន្តផ្តោតការតកចិត្តទុកដា់វិស័យអាទិភាព៤គឹមនុស្សផ្លូវភ្លើងនិងទឹកព្រមទាំងកិច្ចការមួយចំនួនទៀតរួមមានះ
ទី១ការអភិវឌ្ឍធនធានមនុស្ស។ ទី2ការកែលម្អប្រពន្ធឡូជីស្ទីក។ ទី៣ការពង្រឹងការប្រកួតប្រជែងដើម្បីបង្កើនផលិតភាពនិងប្រសិទ្ធិភាពសេដ្ឋកិច្ច។ ទី៤លើកស្ទួយវិស័យកសិកម្ម អភិវឌ្ឍជនបទគ្រប់គ្រងនគរូបបនីយ៍កម្មក្នុងគោលដៅអភិវឌ្ឍប្រកបដោយចីរភាពនៅកម្ពុជា។
រាជរដ្ឋាភិបាលកំណត់ទំហំនៃការខ្ចីប្រាក់ពីដៃគូអភិវឌ្ឍន៍សម្រាប់ឆ្នាំ២០១៩ ក្នុងកម្រិត១.៤០០លានអេសដេអ៊ែរ ដោយឈរលើមូលដ្ឋាននៃការគិតគូរ និងផ្អែកទៅលើទិដ្ឋភាពសំខាន់ៗមួយចំនួន ដែលរួមមាន ៖ (១)- ទំហំនៃការអភិវឌ្ឍប្រទេសមានការកើនឡើង ដែលកម្ពុជាមានភាពចាំបាច់ក្នុងការកៀរគរធនធានមនុស្សបន្ថែមដើម្បីបំពេញតម្រូវការនេះ សម្រាប់ជំរុញការហក់ឡើង នៃសេដ្ឋកិច្ចក្នុងដំណាក់កាលថ្មី (២)- គម្រោងអភិវឌ្ឍន៍ដែលនឹងចុះកិច្ចព្រមព្រៀងឥណទានសម្បទាន ក្នុងឆ្នាំ២០១៩ គឺជាគម្រោងវិនិយោគក្នុងវិស័យអាទិភាព (ហេដ្ឋារចនាសម្ព័ន្ធរូបវន្ត ការបង្កើនផលិតភាពសេដ្ឋកិច្ច និងផលិតភាពកសិកម្ម) ហើយដែលចេះតែរំកិលពីឆ្នាំមុនៗមក តែមានចរិតយុទ្ធសាស្ដ្រដល់ការទ្រទ្រង់ដល់ចីរភាពនៃកំណើនសេដ្ឋកិច្ចក្នុងរយៈពេលមធ្យម និងវែង (៣)- សុទ្ធសឹងតែជាឥណទានដែលមានកម្រិតសម្បទានខ្ពស់ (៤)- ស្ថានភាពបំណុលសាធារណៈកម្ពុជាបច្ចុប្បន្ន និងក្នុងរយៈពេលមធ្យមនៅតែមាន ចីរភាព និងហានិភ័យកម្រិតទាប និង (៥) ការបន្ដបង្កើនប្រសិទ្ធភាពខ្ពស់ក្នុងការគ្រប់គ្រង និងការអនុវត្តគម្រោង។
ជារួម ការបង្កើនទំហំនៃការខ្ចីនេះ នឹងមិនបង្កើតជាបន្ទុកបំណុលវណ្ឌករដល់កម្ពុជាទេ ព្រោះថានៅពេលដែលសេដ្ឋកិច្ចមានការរីកចម្រើននោះ សមត្ថភាពសងរបស់កម្ពុជាក៏មានខ្ពស់ជាងមុនដែរ។ផ្អែកលើលទ្ធផលនៃការវិភាគចីរភាពបំណុលដោយឈរលើមូលដ្ឋានកំណត់នៃការខ្ចីថ្មីបន្ថែមសម្រាប់ឆ្នាំ២០១៩ ក្នុងកម្រិត១ ៤០០លានអេសដេអ៊ែរ គឺបានបង្ហាញថាអនុបាតបំណុលគន្លឹះទាំង៤របស់កម្ពុជា សុទ្ធតែស្ថិតក្រោមអនុបាតគោលទាំងអស់។ ដោយមិនមានការបង្កើតពន្ធថ្មីណាមួយរាជរដ្ឋាភិបាលបានណែនាំឲ្យគ្រប់ស្ថាបន័សហការគ្នាបង្កើនការរកប្រភពចំណូលនិងគ្រប់គ្រងចំណាយឲ្យមានស្ថិរភាព។
សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩មាន៦ជំពូកនិង១៣មាត្រា៕
