អង់គ្លេសពង្រឹងកម្លាំងទព័ការពារដែនទឹកនិងព្រមានពីការដើរចេញពីសហគមន៍អឺរ៉ុបដោយគ្មានកិច្ចព្រមព្រៀង!
27-March-2024 / ព័ត៌មានអន្តរជាតិ
អង់គ្លេស៖ នៅថ្ងៃអាទិត្យទី១៣ធ្នូនេះ ជាថ្ងៃចុងក្រោយដែលអង់គ្លេស និងអឺរ៉ុបត្រូវចរចា ដើម្បីរកកិច្ចព្រមព្រៀងពាណិជ្ជកម្ម នៅក្រោយ អង់គ្លេស បានដកខ្លួន លែងជាសមាជិករបស់សហភាពអឺរ៉ុបតទៅទៀត។ ប៉ុន្តែ អង់គ្លេស និងសហភាពអឺរ៉ុប នៅតែមិនទាន់ ចរចារកឃើញកិច្ចព្រមព្រៀងនឹងគ្នានៅឡើយ។តែលោកស្រី ប្រធានគណៈកម្មការអឺរ៉ុបបានប្រកាសថា ភាគីទាំងពីរបាននិយាយព្រមព្រៀងថា នឹងពន្យារការចរចា នៅក្រោយ ថ្ងៃអាទិត្យ នេះ។
អង់គ្លេសបានដើរចេញពីរង្វង់សហភាពអឺរ៉ុប ជាផ្លូវការ តាំងពីថ្ងៃទី ៣១មករា ដើមឆ្នាំ២០២០។ ប៉ុន្តែ អង់គ្លេសនៅបន្តសិទ្ធិប្រើប្រាស់ទីផ្សារអឺរ៉ុបរួម និងគ្មានរបាំងពន្ធគយរបស់អឺរ៉ុប រហូតដល់ថ្ងៃទី ៣១ធ្នូចុងឆ្នាំនេះ។ ដោយសារតែទំនាក់ទំនងពាណិជ្ជកម្មពិសេសរវាងអង់គ្លេស និងអឺរ៉ុប ត្រូវចប់នៅចុងឆ្នាំនេះ ភាគីទាំងពីរបានបើកចរចា គ្នាតាំងពីខែមីនា មកដើម្បីរកកិច្ចព្រមព្រៀងពាណិជ្ជកម្មថ្មី សម្រាប់ទំនាក់ទំនងថ្មី ក្នុងនាមដែលអង់គ្លេស លែងជាសមាជិករបស់សហភាពអឺរ៉ុបតទៅទៀត។
កាលកំណត់ ដែលអង់គ្លេស ត្រូវចាកចេញពីទីផ្សារអឺរ៉ុប និងអនុគ្រោះពន្ធគយរបស់អឺរ៉ុប គឺនៅថ្ងៃទី ៣១ធ្នូខាងមុខ។ ប៉ុន្តែ នាយករដ្ឋមន្ត្រីអង់គ្លេស និងប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរ ឡេយែន បានកំណត់យកថ្ងៃអាទិត្យ ទី ១៣ធ្នូនេះជាថ្ងៃចរចាចុងក្រោយ។ មន្ត្រីបារាំង សម្រាប់កិច្ចការអឺរ៉ុប បានបញ្ជាក់ហើយថា ទីក្រុងឡុងដ៍ និងព្រុចស៊ែល អាចបន្ត ការចរចា ប៉ុន្តែ មិនច្រើននោះទេ ព្រោះថា ពេលវេលាកាន់តែខើចណាស់ទៅហើយ។ នៅពេលតែប៉ុន្មានថ្ងៃទៀតទេ ថ្ងៃទី ៣១ធ្នូ នឹងឈានមកដល់ ប៉ុន្តែ ភាគី ទាំងពីរបានពន្លយឲ្យដឹងពីលទ្ធភាព គ្មានកិច្ចព្រមព្រៀង ច្រើនជាង មានកិច្ចព្រមព្រៀង។
មានការកត់សម្គាល់ថាការចរចា រកកិច្ចព្រមព្រៀងពាណិជ្ជកម្ម អង់គ្លេស អឺរ៉ុប នៅក្រោយ Brexit នៅតែទ័លច្រក ជាប់គាំង លើចំណុចសំខាន់មួយចំនួន ដែល អង់គ្លេស និងអឺរ៉ុប មិនចង់ធ្វើសម្បទាន ឲ្យគ្នា ។
ទី ១ គឺ៖ លើសិទ្ធិរបស់អ្នកនេសាទអឺរ៉ុប ក្នុងដែនទឹករបស់អង់គ្លេស។ រឿងនេសាទ នេះជាការទាមទារចង់បានខ្លាំងរបស់ប្រទេសសមាជិកមួយចំនួនដូចជា បារាំង ហូឡង់ បែលហ្ស៊ិក ឬអេស្ប៉ាញជាដើម ព្រោះថា ដែនទឹកសមុទ្រអង់គ្លេស មានសំបូរត្រីច្រើន។ភាគីអឺរ៉ុបចង់បន្ត ចូលទៅនេសាទក្នុងដែនទឹករបស់អង់គ្លេស ដូចមុន ជាថ្នូរនឹងការដែលអង់គ្លេស អាចបញ្ជូន លក់ផលិតផលគ្រឿងសមុទ្រ ក្នុងទីផ្សារអឺរ៉ុប។ ប៉ុន្តែ អង់គ្លេស វិញ មិនឯកភាពនោះទេ ក្នុងហេតុផលថា អង់គ្លេសមានអធិបតេយ្យភាព ត្រូវគ្រប់គ្រង ការពារដែនទឹកសមុទ្ររបស់ខ្លួន ឲ្យប្រទេសអឺរ៉ុប មានសិទ្ធិចូលនេសាទដូចមុន។
ចំណុចជាប់គាំងទី២ គឺរឿង ប្រកួតប្រជែងពាណិជ្ជកម្ម ទៅថ្ងៃអនាគត។ ភាគីអឺរ៉ុបបានយល់ព្រម ឲ្យអង់គ្លេស អាចបន្តប្រើប្រាស់ទីផ្សារអឺរ៉ុប ហើយនិងគ្មានរនាំងពន្ធគយដូចមុន គឺដូចពេលដែលអង់គ្លេស នៅជាសមាជិករបស់អឺរ៉ុប ប៉ុន្តែ ជាថ្នូវិញ អង់គ្លេស ត្រូវ គោរពតាមក្បួនខ្នាត ច្បាប់ផ្ទៃក្នុងរបស់អឺរ៉ុប ទាក់ទងនឹងកម្លាំងពលកម្ម ការយកពន្ធ ឬសង្គមបរិស្ថាន ជាដើម។ សម្រាប់អឺរ៉ុប វាមិនមែនជារឿងយុត្តិធម៌ទេ ដែលអង់គ្លេសអាចចូលប្រើប្រាស់ទីផ្សារអឺរ៉ុបដោយសេរី និងគ្មានរបាំងពន្ធគយ ប៉ុន្តែ អង់គ្លេស កំណត់ស្តង់ដា ច្បាប់ផ្ទាល់ខ្លួន អង់គ្លេសនោះ។ ដើម្បី បន្តប្រើប្រាស់ទីផ្សារអឺរ៉ុប ដោយសេរីដូចមុន អឺរ៉ុបបានទាមទារឲ្យអង់គ្លេសបន្តគោរពច្បាប់ជំនួញអឺរ៉ុប។ អឺរ៉ុប ខ្លាចថា អង់គ្លេស អាចធ្វើការប្រកួតប្រជែងមិនស្មោះត្រង់ ដូចជាអាចលួចផ្តល់ជំនួយឧបត្ថម្ភដល់ក្រុមហ៊ុនអង់គ្លេស ដែលនឹងធ្វើឲ្យក្រុមហ៊ុនអឺរ៉ុបពិបាកនឹងប្រកួតប្រជែងជាមួយ នៅក្នុងទីផ្សារអឺរ៉ុប។
ក្នុងករណីដែលអង់គ្លេសមិនគោរព តាមក្បួនច្បាប់អឺរ៉ុប អឺរ៉ុបចង់ ប្រើសិទ្ធិដើម្បី ចាត់វិធានការឯកតោភាគី តាមរយៈ ការអនុវត្តយកពន្ធ និងកំណត់ចំនួនកូតា ទំនិញរបស់អង់គ្លេស ក្នុងទីផ្សារអឺរ៉ុប ដើម្បី ការពារក្រុមហ៊ុនអឺរ៉ុប ទល់នឹងក្រុមហ៊ុនអង់គ្លេស ដែលធ្វើជំនួញ មិនស្មោះត្រង់។បើគ្មានកិច្ចព្រមព្រៀង មុនថ្ងៃទី ៣១ធ្នូទេ នោះ ចាប់ពីថ្ងៃទី ១ មករា២០២១ទៅ រាល់គ្រប់ទំនាក់ទំនងពាណិជ្ជកម្មអង់គ្លេសនិងអឺរ៉ុប នឹងត្រូវប្រព្រឹត្តទៅតាមគោលការណ៍នៃច្បាប់របស់អង្គការពាណិជ្ជកម្មពិភពលោក WTO ដែលមានន័យថា ការកំណត់កូតា ហើយនិងអត្រាពន្ធគយ នឹងត្រូវគេអនុវត្ត ដោយស្វ័យប្រវត្តិរវាងភាគី អង់គ្លេស ហើយនិងអឺរ៉ុប។
រឿងទាំងអស់នេះ នឹងទៅប៉ះពាល់ដល់សេដ្ឋកិច្ចរបស់ភាគី ទាំងពីរ ជាពិសេស អង់គ្លេសតែម្តង ដែលនៅឯកោតែម្នាក់ឯង ហើយកំពុងមានសេដ្ឋកិច្ចចុះទន់ខ្សោយដោយសារតែវិបត្តិកូវីដរួចហើយនោះ។ដោយសារតែមិនមានការឯកភាពគ្នាកងទ័ពអង់គ្លេស បានប្រកាសកាលពីថ្ងៃសៅរ៍ទី១៣ធ្នូ ថា ខ្លួនត្រៀម រួចជាស្រេចដើម្បីចាប់ផ្តើមល្បាតព្រំដែន សមុទ្រ ជាមួយសហភាពអឺរ៉ុប។ អង់គ្លេស និងសហភាពអឺរ៉ុបធ្លាប់សហការគ្នា និងជាសម្ព័ន្ធមិត្ត នៅក្នុងអង្គការអូតង់។
សម្រាប់មន្ត្រីរដ្ឋាភិបាលអង់គ្លេស រាល់កិច្ចព្រមព្រៀងត្រូវតែស្មើភាព និងគោរពជំហរជាមូលដ្ឋានគ្រឹះ របស់អង់គ្លេស ដែលក្នុងនោះ អង់គ្លេសជារដ្ឋអធិបតេយ្យ ក្នុងរយៈពេល ៣សប្តាហ៍ខាងមុខ។
អង់គ្លេស នឹងមិនបណ្តែតបណ្តោយ ឲ្យទូកបរទេស ចូលទៅនេសាទ ក្នុងដែនទឹករបស់ខ្លួន ទៀតនោះទេ។ក្រសួងការពារជាតិអង់គ្លេស បានបង្កើនភាពតានតឹង មួយជាន់ ថែមទៀត ដោយបានអះអាងថា កងទ័ពអង់គ្លេសបានត្រៀមកប៉ាល់ចម្បាំង ៤គ្រឿង សម្រាប់ចេញ ទៅការពារដែនទឹក របស់អង់គ្លេស ទល់នឹងកប៉ាល់បរទេស នៅក្នុងករណី គ្មានកិច្ចព្រមព្រៀង អង់គ្លេស អឺរ៉ុប។ សម្រាប់ អតីតមេបញ្ជាការកងទ័ពជើងទឹកអង់គ្លេសលោក Alan West វាជារឿងសមគួរ ដែលកងទ័ពជើងទឹកអង់គ្លេស ចេញមុខការពារដែនទឹកសមុទ្រអង់គ្លេស បើសិន រដ្ឋាភិបាល មិនចង់ឲ្យទូកនេសាទបរទេស ចូលក្នុងដែនទឹកអង់គ្លេសនោះ។ក្រសួងការពារជាតិអង់គ្លេសបានបញ្ជាក់ថា គេបានត្រៀមកងទ័ព ប្រមាណ ១៤ ០០០នាក់ សម្រាប់ត្រៀម ជួយ រដ្ឋាភិបាល ក្នុងការការពារដែនទឹកអង់គ្លេស ក្នុងដំណាក់កាលអន្តរកាល ក្រោយ Brexit ដែលនៅក្នុងនោះ មានផងដែរឧទ្ធម្ភាគចក្រ សម្រាប់តាមដានឆ្នេរសមុទ្រ អង់គ្លេស។
លោកបូរីសចនសុន( Bullish Boris Johnson) នាយករដ្ឋមន្ត្រីនៃប្រទេសអង់គ្លេសព្រមានថា លោកនឹងមិនចុះកិច្ចព្រមព្រៀងជាមួយ សហគមន៍អឺរ៉ុប ដែលនឹងឱ្យអង់គ្លេសបានឯករាជ្យ។តាមរយៈប្រេសិតពិសេស ឈ្មោះ David Frost លោកនាយករដ្ឋមន្ត្រីអង់គ្លេស Boris Johnson ថារូបលោក បានត្រៀមខ្លួនរួចរាល់ហើយ ក្នុងការបញ្ឈប់ការពិភាក្សាបិទទ្វា ដែលមានរយៈពេល ៤៨ ម៉ោង។ គណៈរដ្ឋមន្ត្រី អង់គ្លេសថា លោក ចន សុន មិនខ្លាចប៉ះទង្គិច ដោយគ្មានកិច្ចព្រមព្រៀងទេ។សារព័ត៌មាន Sputnik រុស្ស៊ីចេញផ្សាយថា លុយផោន របស់អង់គ្លេសបានធ្លាក់ចុះ ប្រឆាំងនឹងប្រាក់ដុល្លារអាមេរិក នៅថ្ងៃច័ន្ទនេះ ចំពេលដែលកិច្ចចរចារវាងអង់គ្លេស និងអឺរ៉ុបអាចនឹងបរាជ័យ។
សូមរំលឹកថា កាលពីពាក់កណ្តាលឆ្នាំ ២០១៦ ប្រជាពលរដ្ឋអង់គ្លេសប្រមាណជាង ៥០ ភាគរយ (៥១%) បានបោះឆ្នោតគាំទ្រឱ្យអង់ គ្លេសចាកចេញពីសហភាពអឺរ៉ុប តាមរយៈការធ្វើប្រជាមតិជាលើកដំបូង នៅថ្ងៃទី ២៣ ខែមិថុនា។លទ្ធផលប្រជាមតិកាលនោះបានធ្វើឲ្យលោកនាយករដ្ឋមន្ត្រីតូនីប្លែរចុះលាចេញពីតំណែងព្រោះ បានជំរុញ ឱ្យចក្រភពអង់គ្លេសត្រូវតែចាកចេញចាកចេញពីសមាជិកភាពសហភាពអឺរ៉ុប។ កិច្ចចរចារ ស្តីពីការដកខ្លួនអឺរ៉ុប ដែលកាលណោះ លោកស្រី Theresa May ជានាយករដ្ឋមន្ត្រី និងមេដឹកនាំសហភាពអឺរ៉ុប ត្រូវបានធ្វើឡើងបន្តបន្ទាប់ ដោយត្រូវប្រើពេលវេលាយ៉ាងយូរ។
កិច្ចព្រមព្រៀង ស្តីពី Brexit ត្រូវបានចុះហត្ថលេខា ដោយរដ្ឋាភិបាលអង់គ្លេស និងសហភាពអឺរ៉ុប កាលពីខែវិច្ឆិកា ឆ្នាំ ២០១៨ ក៏ប៉ុន្តែកិច្ចព្រមព្រៀងនេះ អាចចូលជាធរមានបាន លុះត្រាតែមានការអនុម័តយល់ព្រម ពីរដ្ឋសភាអង់គ្លេស។កាលនោះការបោះឆ្នោតស្នើសុំការគាំទ្រពីសភា បានធ្វើឡើង នៅថ្ងៃ ១៦ ខែមករា ២០១៩ ក៏ប៉ុន្តែការស្នើនោះបានបរាជ័យ បន្ទាប់ពីសភាអង់គ្លេសបានបោះឆ្នោតគាំទ្រ ដោយសំឡេងតែ២០២ ក្នុងចំណោមសំឡេងប្រឆាំងជាង៤៣២ សំឡេង ហើយបន្តជាវិបត្តិរហូតដល់ពេលបច្ចុប្បន្ន៕
