វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5881 នាក់
ម្សិលមិញ 5378 នាក់
សរុប 14085174 នាក់
ភ្នំពេញ៖ឱកាសខួបទី៧២នៃទិវាសិទ្ធិមនុស្សអន្តរជាតិ១០ធ្នូ(ឆ្នាំ២០២០)អង្គការសង្គមស៊ីវិលទាំង៦៧បានចេញសេចក្តីថ្លែងការណ៍រួមមួយស្នើដល់រដ្ឋាភិបាលកម្ពុជាគោរពគោលការណ៍លទ្ធិប្រជាធិបតេយ្យ សិទ្ធិមនុស្សនិងកាតព្វកិច្ចសិទ្ធិមនុស្ស ។
ក្រុមអង្គការសង្គមស៊ីវិលទាំងនេះបានជួបប្រជុំគ្នាដោយមនុស្សចំនួនតិចតួចនៅអង្គការសង់ត្រាល់។អង្គការសង្គមស៊ីវិលទាំង៦៧បានសម្តែងនូវក្តីព្រួយបារម្ភអំពីស្ថានភាពសិទ្ធិមនុស្សនៅកម្ពុជា ពាក់ព័ន្ធនឹងឆន្ទៈក្នុងការលើកកម្ពស់សិទ្ធិមនុស្សនិងការអភិវឌ្ឍច្បាប់រួមមានច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្នការធ្វើវិសោធនកម្មច្បាប់មាត្រាមួយចំនួននៃច្បាប់ស្តីពីសហជីពច្បាប់ស្តីពីសណ្តាប់ធ្នាប់សាធារណៈសេចក្តីព្រាងច្បាប់អនុក្រឹត្យស្តីអំពីការបង្កើតច្រកទ្វារអ៊ីនធឺណែតជាតិ និងសេចក្តីព្រាងច្បាប់ស្តីពីឧក្រិដ្ឋកម្មប្រព័ន្ធបច្ចេកវិទ្យា។បន្ថែមពីនេះដែរអង្គការស៊ីវិលទាំង៦៧ យល់ឃើញថាសេរីភាពមូលដ្ឋានដែរមានដូចជា សេរីភាពនៃការបញ្ចេញមតិ ការជួបជុំដោយសន្តិវិធី និងចងក្រងសហគមនៅតែកំពុងបន្តរងការរំលោភបំពានធ្ងន់ធ្ងរដែលជាការលំអានគួរឲ្យព្រួយបារម្ភនៅកម្ពុជា នៅរយៈពេលពីរបីឆ្នាំចុងក្រោយនេះ។
សម្ព័ន្ធអ្នកសារព័ត៌មានកម្ពុជា(ខេមបូចា) ក៏បានស្នើឲ្យរដ្ឋាភិបាលគោរពដល់តួនាទីរបស់អ្នកសារព័ត៌មាននៅកម្ពុជាដោយបញ្ឈប់រាល់ការវាយប្រហារ ធ្វើទុក្ខបុកម្នេញនិងដោះលែងអ្នកសារព័ត៌មានដែលកំពុងជាប់ពន្ធនាគារដោយសារការអនុវត្តនូវវិជ្ជាជីវៈខ្លួន។ លើសពីនេះខេមបូចាក៏អំពាវនាវឲ្យរដ្ឋាភិបាលធានាដល់សុវត្ថិភាពនិងសន្តិសុខដល់អ្នកសារព័ត៌មាន ជាពិសេសក្នុងអំឡុងពេលជំងឺកូវីដ១៩ដើម្បីឱ្យពួកគេអាចអនុវត្តសិទ្ធិសេរីភាពរបស់ពួកគេប្រកបដោយវិជ្ជាជីវៈនិងសុវត្ថិភាព។ បើតាមសហព័ន្ធអ្នកកាសែតអន្តរជាតិ (IFJ) បានប្រកាសថា មានអ្នកសារព័ត៌មាន៤២នាក់ រងការសម្លាប់ ពេលកំពុងបំពេញការងារនៅក្នុងឆ្នាំ២០២០។ ជាមួយគ្នានេះមានអ្នកសារព័ត៌មាន២៣៥នាក់ ត្រូវជាប់ឃុំផងដែរ។
ប្រធានគណៈកម្មាធិការសិទ្ធិមនុស្សកម្ពុជារបស់រាជរដ្ឋាភិបាល លោក កែវ រ៉េមី បានធ្វើការវាយតម្លៃខ្ពស់ចំពោះស្ថានភាពសិទ្ធិមនុស្សនៅកម្ពុជាថាជាប្រទេសដែលមានស្ថានភាពសិទ្ធិមនុស្សឈានមុខ ទាំងនៅក្នុងតំបន់និងអាស៊ាន។ លោក កែវ រ៉េមី បានអះអាងថា រដ្ឋាភិបាលបានប្តេជ្ញាចិត្តនិងកំពុងប្រតិបត្តិដោយយកចិត្តទុកដាក់ក្នុងការលើកកម្ពស់សិទ្ធិមនុស្ស និងតម្លៃនៃលទ្ធិប្រជាធិបតេយ្យនៅកម្ពុជា។
ប្រធានអតីតបក្សសង្គ្រោះជាតិលោកកឹម សុខានៅព្រឹកថ្ងៃព្រហស្បតិ៍នេះថ្ងៃទី១០ខែធ្នូក៏បានចេញសារអបអរសាទរខួបលើកទី៧២នៃទិវាសិទ្ធិមនុស្សអន្តរជាតិនេះ។លោកកឹមសុខាក៏បានអំពាវនាវឱ្យអ្នកមានអំណាចនៅកម្ពុជាចូលរួមលើកស្ទួយនិងគោរពសិទ្ធិមនុស្សនៅក្នុងប្រទេសកម្ពុជា។«សិទ្ធិមនុស្សជាសេចក្តីថ្លៃថ្នូររបស់មនុស្សដែលមានពីកំណើតគឺជាគុណតម្លៃសកល»នេះគឺជាការបញ្ជាក់របស់លោកកឹមសុខានៅលើទំព័រហ្វេសប៊ុកនៅព្រឹកថ្ងៃទី១០ខែធ្នូនេះ។
សូមរំព្ញកជូនថា កាលពីខែសីហាឆ្នាំ២០២០ រដ្ឋាភិបាលកម្ពុជាបានសម្រេចលុបចោល ទិវាមនុស្សអន្តរជាតិ១០ធ្នូ ចេញពីថ្ងៃឈប់សម្រាកជាតិជាផ្លូវការ ដែលធ្វើឲ្យអង្គការសង្គមស៊ីវិលជាតិនិងអន្តរជាតិចេញមកប្រតិកម្មសេចក្តីសម្រេចនេះជាការរារាំងដល់ប្រជាពលរដ្ឋក្នុងការប្រារព្ធពិធី អាចភ្លេចពីនិយមន័យនៃសិទ្ធិសេរីភាព បាត់បង់ឱកាសក្នុងការលើកកម្ពស់សិទ្ធិមនុស្សក្នុងសង្គម និងធ្វើឲ្យមានការរិះគន់ពីសហគមន៍អន្តរជាតិ៕