វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2678 នាក់
ម្សិលមិញ 8227 នាក់
សរុប 14129559 នាក់
(ភ្នំពេញ)៖ គណៈកម្មាធិការជាតិរៀបចំការបោះឆ្នោត (គ.ជ.ប) មានគម្រោងរៀបចំការបោះឆ្នោតសាកល្បងនៅដើមឆ្នាំ២០២១ខាងមុខ។
លោក សោម សូរីដា អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី០៤ ខែធ្នូនេះប្រាប់កាសែតថា៖ មានភាគីពាក់ព័ន្ធមួយចំនួន នៅមិនទាន់យល់ច្បាស់អំពីការបោះឆ្នោតសាកល្បង ដែលគ្រោងរៀបចំនៅដើមឆ្នាំ២០២១នោះ លោកពន្យល់ថា គម្រោងរៀបចំការបោះឆ្នោតសាកល្បង នៅដើមឆ្នាំ២០២១ ខាងមុខនេះ គ.ជ.ប រៀបចំឡើងក្នុងគោលបំណងត្រួតពិនិត្យ ផ្ទៀងផ្ទាត់ និងវាយតម្លៃលើប្រសិទ្ធភាពនៃការធ្វើទំនើបកម្មដំណើរការរៀបចំការបោះឆ្នោតមួយចំនួនដូចជា ការប្រើប្រាស់កម្មវិធីចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះបោះឆ្នោត តាមប្រព័ន្ធអនឡាញ (Online) និងការប្រើប្រាស់កម្មវិធីត្រួតពិនិត្យ ផ្ទៀងផ្ទាត់ និងបូកសរុបលទ្ធផលនៃការបោះឆ្នោតតាមប្រព័ន្ធអនឡាញ (Online) ដែលគ្របដណ្ដប់លើដំណើរការសំខាន់ៗនៅក្នុងថ្ងៃបោះឆ្នោត តាមកម្មវិធីជាប្រព័ន្ធ ដូចជា កម្មវិធីទទួលបញ្ចូល បូកសរុប បញ្ជូន និងប្រកាសលទ្ធផលបឋមនៃការបោះឆ្នោត, កម្មវិធីត្រួតពិនិត្យ ផ្ទៀងផ្ទាត់ និងបូកសរុបលទ្ធផលបណ្ដោះអាសន្ននៃការបោះឆ្នោត, កម្មវិធីត្រួតពិនិត្យ ផ្ទៀងផ្ទាត់ និងបូកសរុបលទ្ធផលផ្លូវការនៃការបោះឆ្នោត, កម្មវិធីបែងចែកអាសនៈ និងស្រង់ឈ្មោះបេក្ខជនជាប់ឆ្នោត។
លោក សោម សូរីដា លើកឡើងទៀតថា ការបោះឆ្នោតសាកល្បងនេះ ប្រជាពលរដ្ឋមិនមែនបោះឆ្នោតតាមអនឡាញ (Online)ទេ គឺនៅតែធ្វើការបោះឆ្នោតដោយដៃ ដូចការបោះឆ្នោតអាណត្តិមុនៗដដែល។ ម្យ៉ាងវិញទៀត ការបោះឆ្នោតសាកល្បងនេះ មិនត្រូវបានរៀបចំនៅទូទាំងប្រទេសទេ ដោយត្រូវធ្វើនៅតាមឃុំ សង្កាត់ ដែលជាគោលដៅមួយចំនួន តាមការកំណត់របស់ គ.ជ.ប តែប៉ុណ្ណោះ។
លោក សោម សូរីដា បញ្ជាក់ដែរថា មុននឹងឈានដល់ការរៀបចំការបោះឆ្នោតសាកល្បង នៅដើមឆ្នាំ២០២១ គ.ជ.ប ត្រូវរៀបចំបទបញ្ជា និងនីតិវិធី ហើយត្រូវរៀបចំនូវកិច្ចប្រជុំមួយជាមួយភាគីពាក់ព័ន្ធ ដើម្បីចូលរួមពិភាក្សាពិគ្រោះយោបល់ មុននឹងអនុម័តគម្រោងរៀបចំការបោះឆ្នោតសាកល្បងនេះ ពីព្រោះ គ.ជ.ប មិនមែនធ្វើដោយអត្តនោម័តនោះទេ ហើយការបោះឆ្នោតមួយទទួលបានជោគជ័យ ដោយសារមានការចូលរួមពីភាគីពាក់ព័ន្ធនឹងការបោះឆ្នោតទាំងអស់។
បើតាមលោក សោម សូរីដា ប្រសិនបើការបោះឆ្នោតសាកល្បងនៅដើមឆ្នាំ២០២១នោះ ដំណើរការល្អ ប្រកបដោយសុវត្ថិភាព និងប្រសិទ្ធភាព កម្មវិធីទំនើបកម្មនៃដំណើរការនេះ នឹងយកទៅអនុវត្តសម្រាប់ការបោះឆ្នោតសកលនៅឆ្នាំ២០២២ និងឆ្នាំ២០២៣៕