វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 8864 នាក់
ម្សិលមិញ 8227 នាក់
សរុប 14135745 នាក់
ចិន៖ មហាសេដ្ឋីសារព័ត៌មាន និងជាសកម្មជនគាំទ្រលិទ្ធប្រជាធិបតេយ្យហុងកុងគឺ លោក Jimmy Lai ត្រូវបានតុលាការឃុំខ្លួនពីបទឆបោកពាក់ព័ន្ធទៅនឹងការជួលអគារមួយ ជាទីស្នាក់ការកាសែតប្រឆាំងរិះគន់រដ្ឋាភិបាលរបស់លោក ដែលមានឈ្មោះថា “Apple Daily”។
សារព័ត៌មាន Reuters បានឱ្យដឹង ថា លោក Lai មានអាយុ ៧៣ឆ្នាំ និងនាយកប្រតិបត្តិជាន់ខ្ពស់ពីរនាក់ទៀតរបស់ក្រុមហ៊ុន Next Digital ត្រូវបានតុលាការចោទប្រកាន់កាលពីថ្ងៃពុធទី២ធ្នួ ពីបទសង្ស័យលាក់បាំង និងក្លែងបន្លំឯកសារខុសច្បាប់ក្នុងកិច្ចសន្យាជួលអគាររបស់ពួកគេ និងម្ចាស់ដីដែលជាសាជីវកម្មសាធារណៈបង្កើតឡើងដោយរដ្ឋាភិបាលហុងកុង។ ការចោទប្រកាន់នេះបានគូសបញ្ជាក់ថា ពួកគេមិនបានប្រើប្រាស់ទីស្នាក់ការការិយាល័យដែលខ្លួនជួល ដូចបានអនុញ្ញាតក្រោមកិច្ចសន្យាជួលដីនៅចន្លោះឆ្នាំ ២០១៦ ដល់ ២០២០ នោះទេ។
លោក Lai ត្រូវបានគេឃុំខ្លួនចាប់តាំងតែពីថ្ងៃពុធ បន្ទាប់ពីលោក រួមទាំងបុរស ៩នាក់ និងស្ត្រីម្នាក់ទៀត ត្រូវបានប៉ូលិសឆ្មក់ចូលទៅចាប់ខ្លួននៅទីស្នាក់ការកាសែតកាលពីខែសីហាកន្លងទៅ ពីបទសង្ស័យចូលដៃជាមួយបរទេស ដែលអាចបង្កគ្រោះថ្នាក់ដល់សន្តិសុខជាតិ រួមទាំងការរួមគំនិតក្នុងការលួចបន្លំ និងឆបោកអ្នកដទៃផងដែរ។
កាលពីខែមិថុនា អ្នកជំនួញហុងកុង ដែលប្រជាជនគោរពស្រលាញ់ច្រើននេះ បានលើកឡើងថា លោកបានភៀសខ្លួន រត់ពីខេត្តកង់តុង មករស់នៅហុងកុង តាំងតែពីអាយុ១២ឆ្នាំ។ ដោយសារតែសិទ្ធិសេរីភាពនៃដែនដីហុងកុង ទើបបានលោកអាចបានជោគជ័យ រហូតដល់សព្វថ្ងៃនេះ។ លោកបានអះអាងថា លោកត្រៀមខ្លួននឹងជាប់គុក ដើម្បីតស៊ូទាមទារសិទ្ធិសេរីភាព ជូនប្រជាជនហុងកុងឡើងវិញ ជាពិសេសគឺដើម្បី កូនចៅអ្នកហុងកុងជំនាន់ក្រោយ។
ទាក់ទងទៅនឹងករណីចោទប្រកាន់ពីបទឆបោកនេះ ព្រះរាជអាជ្ញាបានស្នើសុំពន្យារការកាត់ក្តីរហូតដល់ខែមេសា ឆ្នាំក្រោយ៕