ផ្អាកធ្វើខួបកំណើតបក្សដោយសារកូវិដ១៩សម្តេចតេជោហ៊ុនសែនបង្ហាញសំណង់អគារគណបក្សដ៏ធំស្កឹមស្កៃ
26-February-2023 / ផ្សេងៗ
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃកម្ពុជានៅព្រឹកថ្ងៃសុក្រ ១៥កើត ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៥ ខែមិថុនា ឆ្នាំ២០២០ បានអញ្ជើញពិនិត្យអគារទីស្នាក់ការកណ្តាលនៃគណបក្សប្រជាជនកម្ពុជា ដែលស្ថិតនៅតាមបណ្តោយវិថីព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
អគារថ្មីរបស់គណបក្សប្រជាជនកម្ពុជា គឺបានសង់ឡើងនៅលើផ្ទៃដីទីតាំងអគារគណបក្សចាស់ ដែលមានទំហំដីប្រមាណ ១.៦ហិកតា ដែលមានកម្ពស់៥ជាន់(ពីមុនជំនាន់លន់នល់ដីនេះជាវិទ្យាលយ័ចាក់អង្រែ)។ ទំហំសំណង់អគារគឺប្រមាណ៥០,០០០ ម៉ែត្រក្រឡា ដែលពេលនេះសាងសង់បាន៩៥%ហើយ។
ការកសាងអគារនេះ ត្រូវបានធ្វើពិធីបញ្ចុះបឋមសិលាសាងសង់នៅថ្ងៃទី១១ ខែវិច្ឆិកា ឆ្នាំ២០១៨ ក្រោមអធិបតីភាពរបស់សម្ដេចវិបុលសេនាភក្តី សាយ ឈុំ ដែលថ្មីៗនេះបានចុះហត្ថលេខាប្រកាសថាខួបកំណើតគណបក្សថ្ងៃទី២៨មិថុនាខាងមុខមិនបានធ្វើទេព្រោះបញ្ហាកូវិដ១៩។
អគារនេះមានបណ្ដោយ១៥០ម៉ែត្រ ទទឹង៧៤ ម៉ែត្រកម្ពស់អគារគិតអំពីទីលានមហាជនខាងមុខ រហូតទៅដល់កំពូលពេជ្រ មានកម្ពស់៤៨ម៉ែត្រ។ ជាន់ផ្ទាល់ដីមានចំណតរថយន្តជាង៥០០ចំណត និងទីធ្លាមុខអាគារសម្រាប់មហាជនយើងអាចចតរថយន្តបាន៣០០គ្រឿង។ នៅជាន់លើគឺមានសាលសម្រាប់ប្រជុំជាលក្ខណៈមហាជន ឬក៏មិទ្ទិញបានចំនួនប្រមាណជា១ម៉ឺននាក់។
អគារនេះមានកម្ពស់០៥ជាន់មានសាលបដិសណ្ឋារកិច្ច ដែលមានក្រឡាផ្ទៃប្រមាណ៣ពាន់ម៉ែត្រក្រឡាអាចដាក់មនុស្សអង្គុយបានប្រមាណជាង៤,០០០នាក់។ មានអាហារដ្ឋាននៅផ្នែកខាងត្បូងអាគារ ដែលអាចដាក់មនុស្សបានចំនួន១២០នាក់ក្នុងមួយពេល។ អគារនេះមានបន្ទប់សោតទស្សន៍ មានបន្ទប់កាត់សក់ មានបន្ទប់រដ្ឋបាល មានបន្ទប់សម្រាប់ជនពិការ មានបន្ទប់ឃ្លាំង មានបន្ទប់សម្រាប់កងការពារ មានបន្ទប់ប្រជុំគណៈប្រចាំការ និងមានបន្ទប់ប្រជុំអន្តរជាតិ មានការិយាល័យសម្រាប់សម្រាក និងមានការិយាល័យសម្រាប់សម្ដេចពញាចក្រីហេងសំរិនប្រធានកិត្តិយស ។
ការិយាល័យសម្រាប់ប្រឹក្សាគណៈអចិន្ត្រៃយ៍ មានការិយាល័យដែលជាសាលសមាជិកអចិន្ត្រៃយ៍ និងមានបន្ទប់ទទួលទានអាហារ។ អគារនេះក៏មានសាលលៀងយភោជន៍ដាក់មនុស្សបាន១៥០នាក់ និងបន្ទប់រៀបចំអាហារ។ ចំណែកនៅជាន់ទី៥ មានសាលប្រជុំធំ ដែលមានចំនួនកៅអីអាចដាក់បានប្រមាណ៣,៤៧៤នាក់ មានទីសម្រាកនៅសងខាងដែលអាចដាក់មនុស្សបាន ៣៤៧០នាក់ផងដែរ។
មានរចនាបថថ្មីហៅថា រចនាបថរួមសម័យ ដោយសារមានរចនាបទបីរួមចូលគ្នាគឺ ទី១/រចនាបថប្រាសាទអង្គរវត្ត ទី២/រចនាបថបន្ទាយស្រី និងទី៣/ រចនាបថកណ្ដាល ហើយបានរួមបញ្ចូលគ្នា ដែលយើងហៅថា “ រចនាបថរួមសម័យ” ។ វត្តមានអគារដ៏ធំស្កឹមស្កៃនេះគឺបង្ហាញឱ្យឃើញពីភាពរឹងមាំ និងជានិមិត្តរូបនៃការសាមគ្គីភាព និងភាពរុងរឿងដ៏អស្ចារ្យរបស់គណបក្សប្រជាជនកម្ពុជា ដែលជាបង្អែកមិនអាចខ្វះបានសម្រាប់ប្រទេសជាតិ និងប្រជាជនកម្ពុជាតាំងពីអតីតកាល បច្ចុប្បន្ន និងតទៅ។(ដកស្រង់ពីហ្វេសប៊ុកសម្តេចតេជោ)៕
