វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 428 នាក់
ម្សិលមិញ 8227 នាក់
សរុប 14127309 នាក់
ភ្នំពេញ៖សាកលវិទ្យាធិការភូមិន្ទភ្នំពេញ និងអាជ្ញាធរខណ្ឌទួលគោក បានសម្រេចបញ្ឈប់ស្តង់លក់ផ្លែដូងលេខ២៧ ដែលមានឈ្មោះថា ដូងស្នេហ៍ថែកោះកុងក្រៅ របស់ក្រុមយុវជនធម្មជាតិភ្លាមៗ នៅក្នុងទិវាវប្បធម៌លើកទី១២ក្នុងថ្ងៃដំបូង ដោយសារតែការផ្សព្វផ្សាយពីតំបន់ទេសចរណ៍ធម្មជាតិកោះកុងក្រៅ។ ការសម្រេចនេះធ្វើឲ្យក្រុមយុវជនធម្មជាតិ បង្ហាញនូវក្តីខកចិត្ត និងរក្សាជំហរថា ការធ្វើរបស់ពួកគេ មិនមែនជារឿងខុសច្បាប់។
មូលហេតុចម្បង ដែលឈានទៅដល់ការបញ្ឈប់ស្តង់លក់ដូងរបស់ក្រុមយុវជនធម្មជាតិ អាចមកពីអាជ្ញាធរមិនចង់ឲ្យប្រជាពលរដ្ឋបានស្គាល់អំពីតំបន់ធម្មជាតិកោះកុងក្រៅ ដ្បិតតំបន់ធម្មជាតិមួយនេះកំពុងស្ថិតក្រោមគម្រោងអភិវឌ្ឍរបស់ក្រុមហ៊ុនឯកជន ដែលមានទំនាក់ទំនងជិតស្និទ្ធជាមួយរដ្ឋាភិបាល។ នេះបើតាមការយល់ឃើញរបស់កញ្ញា ភួន កែវរស្មី ដែលជាតំណាងក្រុមយុវជនដែលមានស្តង់លក់ដូង ផ្សព្វផ្សាយពីតំបន់កោះកុងក្រៅ។
កញ្ញា ភួន កែវរស្មី ដែលគេស្គាល់ថា ជាយុវជនបរិស្ថាននិងធម្មជាតិ លើកឡើងថា អាជ្ញាធរនិងសាកលវិទ្យាធិការភូមិន្ទភ្នំពេញ បានប្រាប់ក្រុមរបស់ពួកគេថា ករណីកោះកុងក្រៅគឺមានការដោះស្រាយពីសំណាក់រដ្ឋាភិបាលរួចរាល់ហើយ ដោយពុំបាច់ឲ្យក្រុមយុវជនត្រូវផ្សព្វផ្សាយបន្ថែមទៀតនោះទេ។ បើតាមកញ្ញា ភួន កែវរស្មី គឺខាងសាកលវិទ្យាល័យ និងខាងអាជ្ញាធរ បានចោទប្រកាន់ថាសកម្មភាពរបស់ក្រុមយុវជន គឺផ្ទុយពីគោលបំណងរបស់សាកលវិទ្យាល័យ ដែលរៀបចំទិវាវប្បធម៌។
នៅក្នុងទិវាវប្បធម៌លើកទី១២នៅសាកលវិទ្យាល័យភូមិន្ទភ្នំពេញ ដែលធ្វើឡើងពីថ្ងៃទី១៣មករាម្សិលមិញមកនេះ មានការប៉ះទង្គិច និងតវ៉ាគ្នារវាងក្រុមយុវជនធម្មជាតិ ដែលផ្សព្វផ្សាយពីកោះកុងក្រៅ និងក្រុមអ្នករៀបចំកម្មវិធី នៅមុនពេលដែលស្តង់លក់ដូងរបស់ពួកគេ ត្រូវបានខាងសាកលវិទ្យាល័យសម្រេចបញ្ឈប់ឲ្យលក់ជាបន្ទាន់។ទាំងក្រុមយុវជនធម្មជាតិ ទាំងខាងសាកលវិទ្យាល័យ និងទាំងខាងអាជ្ញាធរខណ្ឌទួលគោក បានចាយពេលជាង២ម៉ោង ដើម្បីតតាំងគ្នា។ តែទីបំផុតខាងសាកលវិទ្យាធិការភូមិន្ទភ្នំពេញ លោក ជេត ជាលី បានសម្រេចឲ្យក្រុមយុវជនធម្មជាតិបញ្ឈប់សកម្មភាពលក់ដូង នៅក្រោមរូបភាពនៃការផ្សព្វផ្សាយពីតំបន់ធម្មជាតិកោះកុងក្រៅ។ នេះបើតាមកញ្ញា ភួន កែវរស្មី។
យ៉ាងណាមិញ ការសម្រេចនេះ បានធ្វើឲ្យក្រុមយុវជនធម្មជាតិ បានភាពខកចិត្ត និងចាត់ទុកថា ការរឹតត្បិតការបញ្ចេញមតិរបស់ពួកគេទៅលើបញ្ហាសង្គម។ កញ្ញា ភួន កែវរស្មី យល់ថា ទិវាវប្បធម៌ពេលនេះ គឺជាឱកាសដែលអាចឲ្យពួកគេផ្សព្វផ្សាយបន្ថែមដល់យុវសិស្ស ឲ្យបានស្គាល់ពីតំបន់ទេសចរណ៍ធម្មជាតិដែលមានសក្តានុពលកោះកុងក្រៅ។ បើតាមក្រុមយុវជនធម្មជាតិ គឺពួកគេនៅតែរក្សាជំហរដូចដើម ដោយបន្តផ្សព្វផ្សាយបន្ថែមទៀតអំពីតំបន់កោះកុងក្រៅ ដើម្បីឲ្យពលរដ្ឋបានដឹង ហើយដើម្បីចូលរួមការពារតំបន់ទេសចរណ៍ធម្មជាតិមួយនេះ ឲ្យគេចផុតពីការអភិវឌ្ឍដែលអាចឈានទៅបំផ្លិចបំផ្លាញធនធានធម្មជាតិនៅទីនោះ៕ប្រភ ពវិទ្យុបារាំង