វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2646 នាក់
ម្សិលមិញ 6001 នាក់
សរុប 13875476 នាក់
ភ្នំពេញ៖ ធនាគារពិភពលោក (World Bank) បានអះអាងថា ការរាតត្បាតនៃជំងឺកូវីដ–១៩ កំពុងបង្កការប៉ះទង្គិចយ៉ាងដំណំទៅលើក្បាលម៉ាស៊ីនសំខាន់ៗសម្រាប់ជំរុញកំណើនសេដ្ឋកិច្ចរបស់កម្ពុជា ។
បើតាមធនាគារពិភពលោក (World Bank វិស័យដែលរងផលប៉ះពាល់មាន៖វិស័យទេសចរណ៍, ឧស្សាហកម្មនាំចេញ និងផ្នែកសំណង់ ដែលទាំងអស់នេះតំណាងឱ្យជាង៧០ភាគរយនៃកំណើនសេដ្ឋកិច្ច និងផ្តល់ការងារមានកម្រៃប្រមាណជា៤០ភាគរយ នៃការងារសរុបរបស់ប្រទេស។របាយការណ៍របស់ World Bank ស្តីពីស្តីពី កម្ពុជានៅក្នុងកាលៈទេសៈមានវិបត្តិកូវីដ–១៩ (Cambodia in the Time of COVID-19) វាតម្លៃថា៖ នៅក្នុងឆ្នាំ២០២០ កំណើនសេដ្ឋកិច្ចត្រូវបានរំពឹងទុកថានឹងមានល្បឿនយឺតបំផុតមិនដែលធ្លាប់ជួបប្រទះតាំងពីឆ្នាំ១៩៩៤មក ដោយវានឹងថមថយរហូតដល់រវាង–១ និង –២,៩ភាគរយ។
ភាពក្រីក្រ ក្នុងឆ្នាំ២០២០ អាចនឹងកើនឡើងពី៣ទៅ១១ភាគរយ ដែលខ្ពស់ជាងកម្រិតនៅខ្សែបន្ទាត់គោល ឬនិយាយបានម្យ៉ាងទៀតថា កម្រិតនៅពេលដែលគ្មានជំងឺកូវីដ–១៩ ជាពិសេស ក្នុងចំណោមក្រុមគ្រួសារ ដែលពាក់ព័ន្ធជាមួយវិស័យសំខាន់ៗ មានវិស័យទេសចរណ៍, សំណង់, ពាណិជ្ជកម្ម, ឧស្សាហកម្មផលិត, និងឧស្សាហកម្មកាត់ដេរ ប្រសិនបើពួកគេបាត់បង់ចំណូលអស់៥០ភាគរយ សម្រាប់រយៈពេលប្រាំមួយខែជាប់គ្នា។ជាមួយគ្នានេះ ឱនភាពសារពើពន្ធ នឹងមានកម្រិតខ្ពស់បំផុតដែលមិនធ្លាប់មានក្នុងកំឡុងពេល២២ឆ្នាំ កន្លងមក។
World Bank បានឲ្យដឹងដែរថា ការដួលរលំនៃកម្លាំងសំខាន់ៗសម្រាប់ជំរុញកំណើនបានប៉ះទង្គិចយ៉ាងខ្លាំងដល់កំណើនសេដ្ឋកិច្ច និងធ្វើឱ្យការងាររបស់មនុស្សយ៉ាងហោចណាស់១,៧៦លាននាក់ស្ថិតក្នុងហានិភ័យ។ របាយការណ៍នេះក៏បានព្រមានដែរថា ការហូរចូលនៃមូលធនមកពីក្រៅប្រទេស ក៏កំពុងតែស្តួចស្តើងទៅៗដែរ ដែលតាមរយៈនេះវានឹងញ៉ាំងឱ្យតម្លៃនៃទីផ្សារអចលនទ្រព្យ ស្រុតចុះ ហើយទំនងជានឹងឈានទៅបញ្ចប់ការរីកលូតលាស់យ៉ាងរហ័សនៃវិស័យសំណង់ទៀតផង។ កម្ចីមិនដំណើរការ (កម្ចីខូច) ត្រូវបានរំពឹងថា នឹងអាចមានទំហំកាន់តែធំឡើងក្នុងពេលដែលពុំទាន់មានការទូទាត់សងឥណទាន បច្ចុប្បន្នដែលត្រូវបានធ្វើកន្លងមកចំពោះឱ្យ វិស័យសំណង់, អចលនទ្រព្យ និងការលក់ទិញលំនៅឋានតាមរយៈការបង់រំលស់។
ទាក់ទងបញ្ហានេះ លោកស្រី អ៊ីនហ្គូណា ដូប្រាចា ប្រធានគ្រប់គ្រងនៃធនាគារពិភពលោកប្រចាំកម្ពុជាបានថ្លែងថា “ធនាគារពិភពលោកប្តេជ្ញាចិត្តថា នឹងជួយកម្ពុជាក្នុងការជួយដោះស្រាយឱ្យមានប្រសិទ្ធភាពជាមួយវិបត្តិកូវីដ–១៩នេះ និងក្នុងការពង្រឹងសេដ្ឋកិច្ចឱ្យឆាប់ងើបឡើងវិញ និងមានភាពធន់នាពេលអនាគត”។សូមបញ្ជាក់ថា របាយការណ៍បច្ចុប្បន្នភាពសេដ្ឋកិច្ចកម្ពុជា (Cambodia Economic Update) ចេញផ្សាយពីរដងក្នុងមួយឆ្នាំ ដោយផ្តល់ព័ត៌មានបច្ចុប្បន្នភាពក្នុងរយៈពេលខ្លី និងរយៈពេលមធ្យម ស្តីពីស្ថានភាពម៉ាក្រូសេដ្ឋកិច្ចនៅប្រទេសកម្ពុជា៕