វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5776 នាក់
ម្សិលមិញ 8227 នាក់
សរុប 14132657 នាក់
ភ្នំពេញ៖កាលពីថ្ងៃទី៧មេសា សម្តេចតេជោ ហ៊ុន សែននាយករដ្ឋមន្ត្រី បានប្រកាសផ្អាក មិនរៀបចំពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំជូត នេះទេ និងលើកពេលឈប់សម្រាកបុណ្យជាតិនេះ។
មន្ត្រីរាជការ បុគ្គលិកក្រុមហ៊ុន និយោជិតកម្មករ បន្តធ្វើការងារធម្មតា នៅថ្ងៃបុណ្យចូលឆ្នាំថ្មី ចាប់ពីថ្ងៃទី១៣-១៦ ខែមេសាហើយរាជរដ្ឋាភិបាល នឹងសងថ្ងៃឈប់សម្រាករយៈពេលប្រាំថ្ងៃវិញ នៅពេលវេលាសមស្រប ក្រោយពេលជំងឺកូវីដ១៩ ឆ្លងរាលដាល។យោងតាមការប្រកាសនេះ សម្តេចព្រះសង្ឃនាយក នន្ទ ង៉ែត បានចេញលិខិតសូមពិតថេរដីកា ព្រះមេគណ ព្រះគ្រូអនុគណ និងព្រះចៅអធិការគ្រប់វត្ត ទាំង ២៥ រាជធានី-ខេត្ត ក្នុងកម្មវត្ថុស្តីពី ការផ្អាកការប្រារព្ធកម្មវិធីបុណ្យចូលឆ្នាំថ្មី ប្រពៃណីជាតិ នាពេលខាងមុខនេះ។
ក្នុងលិខិតចុះថ្ងៃទី៧ ខែមេសាសម្តេចព្រះសង្ឃនាយក នន្ទ ង៉ែត លើកឡើងថា ដើម្បីជាការឆ្លើយតបជាមួយនឹងកិច្ចខិតខំប្រឹងប្រែងរបស់រាជរដ្ឋាភិបាល ក្នុងការប្រយុទ្ធប្រឆាំងនឹងជំងឺដ៏កាចសាហាវនេះ គណៈសង្ឃនាយកនៃព្រះរាជាណាចក្រកម្ពុជា សូមផ្អាកការប្រារព្ធពិធីបុណ្យចូលឆ្នាំថ្មី ប្រពៃណីជាតិ ដែលនឹងប្រព្រឹត្តទៅ ចាប់ពីថ្ងៃចន្ទ ៦រោច ដល់ថ្ងៃព្រហស្បតិ៍ ៩រោច ខែចេត្រ ត្រូវនឹងថ្ងៃទី១៣ ដល់ថ្ងៃទី១៦ ខែមេសា ព.ស ២៥៦៣ គ.ស ២០២០ ខាងមុខនេះ នៅតាមវត្តអារាមទាំងអស់ ទូទាំងប្រទេស ដើម្បីចៀសវាង កុំឲ្យមានការប្រមូលផ្តុំមនុស្សម្នាច្រើន។
សូមប្រជាពុទ្ធបរិស័ទគ្រប់រូប ចម្រើនមេត្តាភាវនាចំពោះសព្វសត្វទាំងពួង បំពេញបុណ្យកុសល រក្សាសីលតាមប្រពៃណីឲ្យបានជាប់ជានិច្ច និងរៀបចំគ្រឿងសក្ការបូជា មានទៀនធូបផ្កាភ្ញី ថ្វាយព្រះរតនត្រ័យ និងនំចំណី ផ្លែឈើ ជាដើម គោរពជូនមាតាបិតា ត្រកូលរៀមច្បង ព្រមទាំងរៀបចំទទួលស្វាគមន៍ ទេវតាឆ្នាំថ្មី នៅគេហដ្ឋានរៀងៗខ្លួន តាមអនុសាសន៍ដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី ហ៊ុន សែន។