ទូតកូរ៉េសុំរដ្ឋមន្ត្រីកសិកម្មជួយដោះស្រាយបញ្ហាប្រឈមរបស់អ្នកវិនយោគកូរ៉េក្នុងវិស័យកសិកម្មនៅស្រុកខ្មែរ!
03-April-2024 / ព័ត៌មានជាតិ
ភ្នំពេញ៖ឯកអគ្គរដ្ឋទូតកូរ៉េប្រចាំកម្ពុជាបានត្អូញត្អែប្រាប់រដ្ឋមន្ត្រីក្រសួងកសិកម្មខ្មែរអំពីបញ្ហាប្រឈមដែលវិនិយោគិនកូរ៉នៅក្នុងស្រុកខ្មែរដេែលទាមទារឲ្យមានការរួមគ្នាដោះស្រាយ។ ក្នុងជំនួបជាមួយលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសានៅទីស្តីការក្រសួងកាលពីទី០៥ ខែកក្កដា គ.ស ២០១៨លោកឯកអគ្គរដ្ឋទូតបានឲ្យដឹងថា៖ បញ្ហាប្រឈមមួយចំនួនដែលក្រុមហ៊ុន និងសហគ្រាសកូរ៉េកំពុងជួបប្រទះ ហើយចាំចាប់ត្រូវការរួមគ្នាដោះស្រាយ រួមមាន៖
ទី១.ការផ្តល់វិញ្ញាបនបត្រភូតភាមអនាម័យ, ទី២.កិច្ចសហប្រតិបត្តិការលើការនាំចេញរវាងស្ថាប័នរដ្ឋ និងវិស័យឯកជននៅមិនមានកម្រិត, ទី៣. បញ្ហាតម្លៃអគ្គិសនី និងសេវាដឹកជញ្ជូននៅមានកំរិតខ្ពស់បើធៀបជាមួយប្រទេសជិតខាង, ទី៤.ពន្ធលើគ្រឿងបន្លាស់គ្រឿងយន្តកសិកម្មនិងនៅជាប់វ៉ាត់ (VAT) នៅខ្ពស់ដែលជាហេតុធ្វើឲ្យប៉ះពាល់ដល់តម្លៃបន្ថែមលើផលិតផលកសិកម្ម។
លោកឯកអគ្គរដ្ឋទូតបានវាយតម្លៃថា៖ប្រសិនបើបញ្ហាដែលបានលើកឡើងត្រូវបានដោះស្រាយនោះបរិយាកាសនៃការវិនិយោគកាន់តែមានភាពល្អប្រសើរនាពេលអនាគត ស្របពេលដែលពលករទៅបម្រើការនៅកូរ៉េផ្នែកវិស័យកសិកម្មនឹងត្រឡប់មកកម្ពុជាវិញដែលពួកគេអាចមានឱកាសបម្រើការឲ្យក្រុមហ៊ុនកូរ៉េកំពុងដំណើរវិនិយោគក្នុងប្រទេសកម្ពុជា ព្រោះពួកគាត់មានលក្ខណៈសម្បត្តិគ្រប់គ្រាន់ពីរសំខាន់ គឺជំនាញ និងភាសារ ជាពិសេសតាមរយៈការវិនិយោគនេះក៏ជាចំណែកមួយយ៉ាងសំខាន់ក្នុងការជួយឲ្យសម្រេចនូវមហិច្ឆិតារបស់សម្តេចដែលចង់ប្រែក្លាយប្រទេសកម្ពុជាជាប្រទេសមានចំណូលមធ្យមកំរិតខ្ពស់នាឆ្នាំ២០៣០។
បានឲ្យដឹង ថា៖ បច្ចុប្បន្នមានក្រុមហ៊ុននិងសហគ្រាសកូរ៉េចំនួន៥៩ ក្នុងនោះមាន ១០ បាននិងកំពុងវិនិយោគលើវិស័យកសិកម្ម ក្រៅពីនោះកំពុងតែសិក្សាស្រាវជ្រាវពីសក្តានុពលលើវិស័យកសិកម្មដើម្បីដាក់ទុនវិនិយោគ និងខ្លះទៀតកំពុងតែចុះបញ្ជិកាឲ្យបានត្រឹមត្រូវតាមច្បាប់នៃកម្ពុជា។ កន្លងមកក្រុមហ៊ុន ហ៊ុនដាយរបស់កូរ៉េបាននាំផលិផលស្វាយកែវរមៀតរបស់កម្ពុជាទៅកាន់ទីក្រុងហុងកុង ហើយអនាគតដ៏ខ្លីនឹងធ្វើការនាំចេញទៅប្រទេសកូរ៉េ។ក្រៅពីនេះនៅមានក្រុមហ៊ុនផ្សេងទៀតកំពុងតែដាំដំឡូងមីសម្រាប់ផលិតអេតាណុល ឬបិតស្រា។
កម្ពុជានៅមានកសិផលសំខាន់ៗមួយចំនួនទៀតដែលមានសក្តានុពលដល់ការវិនិយោគក្នុងនោះមានសណ្តែកបាយ ល្ងនិងម្រេច។ល។ ជាការពិត កម្ពុជាជាប្រទេសផលិតវត្ថុធាតុដើមកសិកម្ម ប៉ុន្តែវិស័យឧស្សាហកម្មកែច្នៃកសិផលនៅមានកំរិត បញ្ហានេះដូចប្រទេសកូរ៉េកាលពីអតីតកាល។លោករដ្ឋមន្ត្រីក្រសួងកសិកម្មបានសម្តែងនូវអំណរគុណយ៉ាងជ្រាលជ្រៅជូនចំពោះរដ្ឋាភិបាលកូរ៉េ ដែលកន្លងមកបានជួយគាំទ្រ និងផ្តល់កិច្ចសហប្រតិបត្តិការលើវិស័យកសិកម្មតាមរយៈអង្គការ KOICA និងអង្គការ KOPIA និងជាពិសេសគាំទ្រដល់ការស្តារ និងការអភិវឌ្ឍប្រទេសកម្ពុជានាពេលកន្លងមក ហើយលោករដ្ឋមន្ត្រីសង្ឃឹម និងជឿជាក់ថារដ្ឋាភិបាលកូរ៉េនឹងបន្តការគាំទ្រ ផ្តល់កិច្ចសហប្រតិបត្តិការឲ្យកាន់តែរឺងមាំ និងល្អប្រសើរថែមទៀត ពិសេសលើការកែច្នៃកសិផលកម្ពុជា និងការធ្វើពាណិជ្ជកម្មផលិផលកសិកម្មនាពេលអនាគត។
លោករដ្ឋមន្ត្រីបានឯកភាពនិងទទួលយកនូវរាល់បញ្ហាដែលលោកឯកអគ្គរដ្ឋទូតបានលើកឡើង។ ដើម្បីឈានទៅសម្រេចបាននូវគោលនយោបាយឈ្នះ ឈ្នះ លោករដ្ឋមន្ត្រី វេង សាខុន បានស្នើឲ្យភាគីកូរ៉េរៀបចំកម្មវិធីពិភាក្សារវាងអ្នកវិនិយោគកូរ៉េ ជាមួយថ្នាក់ដឹកនាំ ឬមន្ត្រីជំនាញ ដើម្បីលើកយកចំណុចខ្លាំង ចំណុចខ្សោយ បញ្ហាប្រឈម ស្វែងរកគន្លឹះដោះស្រាយត្រឹមត្រូវជាក់លាក់មួយ ហើយកម្មវិធីនេះគួរធ្វើឲ្យ បាន២ដងក្នុង១ឆ្នាំ លោកឯកអគ្គរដ្ឋទូតបានសម្តែងនូវអំណរសាទរទទួលយកសំណើនេះ។
ក្នុងជំនួបនោះដែរលោកឯកអគ្គរដ្ឋទូតកូរ៉េបានសន្យាថានឹងជួយគាំទ្រនិងឧបត្ថម្ភឲ្យក្រសួងបង្កើតមជ្ឈមណ្ឌលព័ត៌មានបច្ចេកទេសកសិកម្មជួយកសិករ នៅក្នុងទីស្តីការក្រសួង ប្រយោជន៍ជួយដោះស្រាយនូវរាល់បញ្ហាទាំងបច្ចេកទេសនិងទីផ្សារដល់កសិករ និងជួយរៀបចំផែនទីកសិកម្មជាពិសេសតំបន់កសិកម្មដែលមានក្រុមហ៊ុននិងសហគ្រាសកូរ៉េកំពុងតែប្រតិបត្តិហើយចំណុចនេះគឺជាចេតនាដ៏ល្អមួយរបស់លោករដ្ឋមន្ត្រីក្នុងការរៀបចំផែនទីកសិកម្មដើម្បីកំណត់តំបន់ដាំដុះផងដែរ។
