អាម៉េរិកដាក់ទណ្ឌកម្ម ក្រុមហ៊ុនថៃចំនួន២ ព្រោះជាប់ពាក់ព័ន្ធនឹងសកម្មភាពឆបោកនៅព្រំដែនមីយ៉ាន់ម៉ា-ថៃ

សហរដ្ឋអាម៉េរិក៖ ក្រសួងរតនាគារជាតិសហរដ្ឋអាម៉េរិក កាលពីថ្ងៃពុធ ទី១២ ខែវិច្ឆិកា ឆ្នាំ ២០២៥ បានប្រកាសពីការដាក់ទណ្ឌកម្មដែលកំណត់គោលដៅលើបណ្ដាញឧក្រិដ្ឋកម្មឆ្លងដែនដែលកំពុងប្រតិបត្តិការសកម្មភាពបោកប្រាស់តាមប្រព័ន្ធអនឡាញទ្រង់ទ្រាយធំនៅតំបន់អាស៊ីអាគ្នេយ៍ ។

ទណ្ឌកម្មថ្មីនេះ ត្រូវបានប្រកាសដោយការិយាល័យគ្រប់គ្រងទ្រព្យសម្បត្តិបរទេស ហៅកាត់ថា OFCA ដោយបញ្ជាក់ថា ក្រុមហ៊ុនថៃចំនួន២ គឺ Trans Asia International Holding Group Thailand Company Limited និង Troth Star Company Limited ចូលរួមធ្វើសកម្មភាពសម្របសម្រួល និងរកប្រាក់ចំណេញពីមជ្ឈមណ្ឌលឆបោកនៅតាមព្រំដែនមីយ៉ាន់ម៉ា-ថៃ ។

បុគ្គលមួយរូបឈ្មោះ Chamu Sawang (ឬស្គាល់ថាជា Yu Jianjun) ដែលជាជនជាតិថៃនោះ ក៏ជាប់ទណ្ឌកម្មផងដែរ ជុំវិញការជាប់ពាក់ព័ន្ធក្នុងការគ្រប់គ្រងដល់ការគាំទ្រផ្នែកហិរញ្ញវត្ថុ និងភស្តុភារសម្រាប់បណ្ដាញបោកប្រាស់ទាំងនោះ ។

ក្រៅពីក្រុមហ៊ុនថៃ និងបុគ្គលជនជាតិថៃ នៅមានឈ្មោះរបស់ក្រុមប្រដាប់អាវុធមួយនៅមីយ៉ាន់ម៉ា គឺកងកម្លាំងប្រជាធិបតេយ្យការ៉ែន (Democratic Karen Benevolent Army) ឬហៅកាត់ថា DKBA ដែលត្រូវបានចោទប្រកាន់ថា បានផ្ដល់ការការពារ និងគ្រប់គ្រងទឹកដីសម្រាប់បរិវេណដែលគេយកទៅប្រើប្រាស់ធ្វើជាទីកន្លែងឃុំឃាំង និងបង្ខំជនរងគ្រោះឱ្យបម្រើការក្នុងការងារបោកប្រាស់។ បន្ថែមពីនេះ ក្រុមហ៊ុនថៃ ត្រូវបានចោទប្រកាន់ថា ដើរតួជាអាជីវកម្មក្លែងក្លាយដែលអនុញ្ញាតឱ្យមានការលាងលុយឆ្លងដែន និងទិញអចលនទ្រព្យសម្រាប់ប្រតិបត្តិការបោកប្រាស់ ។

ក្រុមហ៊ុននិងបុគ្គលដែលជាប់ទណ្ឌកម្មទាំងនេះ នឹងរងនូវការបង្កកទ្រព្យសម្បត្តិណាមួយដែលស្ថិតនៅសហរដ្ឋអាម៉េរិក (រាល់ទ្រព្យសម្បត្តិដែលជាប់ពាក់ព័ន្ធជាមួយនឹងក្រុមហ៊ុនឬបុគ្គលទាំងនោះ) ហើយហាមឃាត់ពលរដ្ឋអាម៉េរិកមិនឱ្យចូលរួមនៅក្នុងប្រតិបត្តិការណាមួយជាមួយពួកគេឡើយ ។

នៅក្នុងសេចក្ដីថ្លែងការណ៍របស់ក្រសួងរតនាគារជាតិអាម៉េរិក បញ្ជាក់ថា ប្រតិបត្តិការបោកប្រាស់ទាំងនេះ ដែលជារឿយៗបានក្លែងបន្លំជាវេទិកាវិនិយោគអនឡាញ ឬរូបិយប័ណ្ណគ្រីបតូ ដោយបានកេងប្រវ័ញ្ចជនរងគ្រោះរាប់ពាន់នាក់នៅទូទាំងពិភពលោក រួមទាំងពលរដ្ឋអាម៉េរិកាំងជាច្រើននាក់ដែរ ។

រដ្ឋាភិបាលសហរដ្ឋអាម៉េរិក បានធ្វើការប៉ាន់ប្រមាណថា ពលរដ្ឋអាម៉េរិកបានចាញ់បោកថវិកាយ៉ាងហោចណាស់ ១០ពាន់លានដុល្លារក្នុងឆ្នាំ ២០២៤ ដោយសារតែគម្រោងបោកប្រាស់តាមអ៊ីនធើណិតដែលមានប្រភពក្នុងតំបន់អាស៊ីអាគ្នេយ៍ ដោយកើនឡើង ៦៦% ធៀបនឹងឆ្នាំមុន ។

ទីក្រុងវ៉ាស៊ីនតោន ថ្លែងថា ទណ្ឌកម្មថ្មីនេះ គឺជាផ្នែកមួយនៃយុទ្ធនាការដ៏ទូលំទូលាយរបស់ខ្លួនដើម្បីបោសសម្អាតក្រុមឧក្រិដ្ឋកម្មដែលកំពុងបន្តដំណើរការនៅក្នុងតំបន់ និងដើម្បីដាក់ទោសទណ្ឌចំពោះអ្នកដែលអនុញ្ញាតឱ្យមានការបង្ខិតបង្ខំផ្នែកពលកម្ម និងការជួញដូរមនុស្សនៅក្នុងមជ្ឈមណ្ឌលបោកប្រាស់ ។

ជាចុងក្រោយ ក្រសួងរតនាគារជាតិអាម៉េរិក បានជំរុញឱ្យរដ្ឋាភិបាលក្នុងតំបន់ រួមទាំងប្រទេសថៃ និងមីយ៉ាន់ម៉ា ពង្រឹងកិច្ចសហប្រតិបត្តិការដើម្បីប្រយុទ្ធប្រឆាំងនឹងឧក្រិដ្ឋកម្មតាមប្រព័ន្ធអ៊ីនធើណិតឆ្លងដែន និងការពារជនគ្រោះដែលងាយរងគ្រោះ ៕ប្រភព៖ Reuters/ U.S. Department of the Treasury via CC Times