រដ្ឋមន្ត្រីក្រសួង​សាធារណៈ​ការចេញ​បញ្ញត្តិ​ហាម​មិនឲ្យ​បណ្តាញ​លូ​ឯកជន​គ្មានច្បាប់ត​ភ្ជាប់​បណ្តាញ​លូ​រដ្ឋ​

​ភ្នំពេញ ៖ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួង​សាធារណការ នៅ​ថ្ងៃទី​១៩ ខែកក្កដា ឆ្នាំ​២០១៩ បានប្រកាស​ហាម​មិន​ឲ្យ មាន​សំណង់​ណា​ដែល​មិន មានច្បាប់ ចេញ​ដោយ​ក្រសួង ឬ​ស្ថាប័ន​ជំនាញ​ពាក់ព័ន្ធ​ត​ភ្ជាប់​ជាមួយ​បណ្តាញ​លូ​រដ្ឋ​ខេត្ត​រាជធានី​នោះទេ​។​ 

​យោងតាម​សេចក្ដី ជូនដំណឹង​របស់ ក្រសួង​សាធារណការ លោក ស៊ុន ចាន់ថុល ថា “ ក្រសួង​តែង​សង្កេតឃើញថា មាន​សំណង់​មួយចំនួន មិនមាន​ច្បាប់ និង​លិខិតអនុញ្ញាត​ត្រឹមត្រូវ​ចេញ ដោយ​ក្រសួង​ស្ថាប័ន​ជំនាញ​ពាក់ព័ន្ធ ហើយ​បាន​ត​ភ្ជាប់​ចូល និង​ប្រើប្រាស់​បណ្តាញ​លូ​សាធារណៈ​របស់ រាជធានី​-​ខេត្ត ដោយ​មិនមាន​ការត្រួតពិនិត្យ​លក្ខខណ្ឌ​បច្ចេកទេស និង​នីតិវិធី​ច្បាប់​ឲ្យ​បាន​ត្រឹមត្រូវ​ឡើយ​”​។​

​ដើម្បី​អនុវត្ត​នូវ​វិធានការ​ចាំបាច់ សំដៅ​ទប់ស្កាត់​ការដ្ឋាន​សំណង់​ខុសច្បាប់ ធានា​អាយុជីវិត​មនុស្ស ទ្រព្យសម្បត្តិ សុវត្ថិភាព និង​គុណភាព​សំណង់​ទូទាំងប្រទេស លោក ស៊ុន ចាន់ថុល ធ្វើការ​ណែនាំ​ដល់ មន្ទីរ​សាធារណការ និង​ដឹកជញ្ជូន គ្រប់ រាជធានី​-​ខេត្ត រួមមាន ៖
​ទី​១-​មិន​អនុញ្ញាត​ឲ្យ​សំណង់​ទាំងអស់ ដែល​មិនមាន​ច្បាប់ និង​លិខិតអនុញ្ញាត​ត្រឹមត្រូវ​ត​ភ្ជាប់​ចូល និង​ប្រើប្រាស់​បណ្តាញ​លូ​សាធារណៈ​របស់ រាជធានី​-​ខេត្ត ឡើយ​។​

​ទី​២-​ពង្រឹង​ការតាមដាន និង​ពិនិត្យមើល​ឡើងវិញ នូវ​ការស្នើសុំ​ត​ភ្ជាប់ និង​ប្រើប្រាស់​បណ្តាញ​លូ​សាធារណៈ​។​
​ទី​៣-​សហការ​ជាមួយ​រដ្ឋបាល រាជធានី​-​ខេត្ត និង​ស្ថាប័ន​ពាក់ព័ន្ធ ដើម្បី​មាន​វិធានការ​ចាំបាច់ តាម​នីតិវិធី​ច្បាប់​ដល់​ជន​ដែល​បាន​ត​ភ្ជាប់​ចូល និង​ប្រើប្រាស់​បណ្តាញ​លូ​សាធារណៈ​របស់ រាជធានី​-​ខេត្ត ដោយ​មិនមាន​ច្បាប់​អនុញ្ញាត​ត្រឹមត្រូវ​។​   
​

ទី​៤-​ត្រូវ​អប់រំ​ផ្សព្វផ្សាយ ជូនដំណឹង​ដល់​ប្រជាពលរដ្ឋ ពិសេស​ម្ចាស់​សំណង់​គ្រប់​ប្រភេទ​ទាំងអស់ ឲ្យ​យល់ដឹង​អំពី​នីតិវិធី​ច្បាប់ សម្រាប់​ការស្នើសុំ​ត​ភ្ជាប់ និង​ប្រើប្រាស់​បណ្តាញ​លូ​សាធារណៈ និង​លិខិតបទដ្ឋាន​ពាក់ព័ន្ធ ក្នុង​វិស័យ​សំណង់​សាធារណការ និង​ហេដ្ឋារចនាសម្ព័ន្ធ​សាធារណៈ​ពិសេស​ការស្នើសុំ​ត​ភ្ជាប់ និង​ប្រើប្រាស់​បណ្តាញ លូ​សាធារណៈ​៕

​