វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 7710 នាក់
ម្សិលមិញ 5020 នាក់
សរុប 14123157 នាក់
ភ្នំពេញ៖លោក ផៃ ស៊ីផាន អ្នកនាំរាជរដ្ឋាភិបាលកម្ពុជា សម្តែងការភ្ញាក់ផ្អើលនិងសោកស្តាយ នៅពេលដែលលោកទទួលបានព័ត៌មាន តាមរយៈសារព័ត៌មាន ស្តីពីសេចក្តីស្នើច្បាប់របស់សភាថ្នាក់ក្រោមអាមេរិក ដែលបានបញ្ចប់ក្នុងនីតិវិធីរបស់ខ្លួន។
លោក ផៃ ស៊ីផាន ចាត់ទុកច្បាប់នេះ មានចរិតនយោបាយ និងគោលបំណងប្រឆាំងទៅនឹងសុច្ឆន្ទៈនយោបាយរបស់ប្រជាជនកម្ពុជា ដែលបានជ្រើសរើសមេដឹកនាំខ្លួនតាមផ្លូវច្បាប់ តាមរយៈដំណើរការបោះឆ្នោតប្រកបដោយសន្តិភាព និងប្រជាធិបតេយ្យ។ថ្នាក់ដឹកនាំនៃរាជរដ្ឋាភិបាល និងប្រជាជនកម្ពុជា មិនអាចទទួលយកបានទេ ដោយសារតែសេចក្តីស្នើច្បាប់នេះ បានធ្វើឡើងផ្អែកទៅលើការចោទប្រកាន់ ដោយគ្មានមូលដ្ឋានច្បាស់លាស់បង្ហាញតែមហិច្ឆិតានយោបាយជាប្រវត្តិប្រឆាំងនឹងរដ្ឋាភិបាលកម្ពុជាតែបុណ្ណោះ។ សេចក្តីស្នើច្បាប់នេះ ជាទង្វើប្រឆាំងសន្តិភាព ស្ថិរភាព និងវិបុលភាពរបស់ព្រះរាជាណាចក្រកម្ពុជា។
លោក ផៃ ស៊ីផាន បញ្ជាក់តាមហ្វេសប៊ុកនៅថ្ងៃទី១៦ ខែកក្កដា នេះ ថា “នៅក្នុងបរិបទនេះ ខ្ញុំសូមអំពាវនាវទាំងនីតិបញ្ញត្តិ និងរដ្ឋាភិបាលសហរដ្ឋអាមេរិកឱ្យធ្វើការពិចារណាឡើងវិញ នូវជំហររបស់ខ្លួនសម្រាប់ប្រទេសកម្ពុជា ដើម្បីជាផលប្រយោជន៍នៃការថែរក្សាទំនាក់ទំនងល្អនិងគ្នា ក៏ដូចជាផលប្រយោជន៍ទៅវិញទៅមក សម្រាប់ប្រជាជន និងរដ្ឋាភិបាលនៃប្រទេសទាំងពីរ”។អ្នកនាំពាក្យរាជរដ្ឋាភិបាលកម្ពុជា បន្តថា “ផលរំពឹងទុករបស់ខ្ញុំ គឺព្រឹទ្ធសភាអាមេរិក ក៏ដូចជាប្រធានាធិបតីសហរដ្ឋអាមេរិក ដែលជាអំណាចនីតិប្រតិបត្តិ ច្បាស់ជាយកចិត្តទុកដាក់ ចំពោះទំនាក់ទំនងល្អ និងកិច្ចសហប្រតិបត្តិការអន្តរជាតិ ដែលប្រជាជាតិទាំងពីររបស់យើងបាននឹងកំពុងតែខិតខំប្រឹងប្រែង ដើម្បីបន្តរក្សាផលប្រយោជន៍រួមគ្នាជាដាច់ខាត”។
សូមបញ្ជាក់ថាសភាតំណាងរាស្ត្ររបស់សហរដ្ឋអាមេរិកបានអនុម័តជាឯកច្ឆ័ន្ទកាលពីថ្ងៃចន្ទនូវសេចក្តីស្នើច្បាប់ស្តីពីលទ្ធិប្រជាធិបតេយ្យនៅកម្ពុជា (Cambodia Democracy Act) ឬ H.R. 526 ដែល មានគោលបំណងជំរុញឱ្យមានការបោះឆ្នោតដោយសេរីនិងត្រឹមត្រូវ គោរពសិទ្ធិសេរីភាពនយោបាយ និងសិទ្ធិមនុស្សនៅប្រទេសកម្ពុជា និងដាក់ទណ្ឌកម្មសេដ្ឋកិច្ចនិងទិដ្ឋាការលើមន្ត្រីយោធានិងស៊ីវិលកម្ពុជាណា ដែលបានបំផ្លាញលទ្ធិប្រជាធិបតេយ្យនិងរំលោភសិទ្ធិមនុស្ស។