ប្រធានស្នាក់ការបរិស្ថានដែនជម្រកបឹងខ្លុង និង អូរត្រាវ ព្រំប្រទល់ខេត្តកំពង់ស្ពឺនិង ខេត្តពោធិ៍សាត់ ឃុបឃិតឲ្យឈ្មោះប្រូច និងឈ្មោះណុប ឌីកាប់និងដឹកជញ្ជូនផលអនុផលព្រៃឈើយ៉ាងអនាធិបតេយ្យ
27-March-2024 / ព័ត៌មានជាតិ
(កំពង់ស្ពឺ)៖ ប្រភពព័ត៌មានពីអ្នករកស៊ីដឹកឈើ ដឹកអុសតាមរថយន្តនិងគោយន្តបានបង្ហើបប្រាប់ថា បច្ចុប្បន្ននេះមានគោយន្តដឹកឈើនៅស្ពានដែក ក្នុងស្រុកឱរ៉ាល់ ខេត្តកំពង់ស្ពឺ រាប់សិបគ្រឿងបាននាំគ្នាដឹកស៊ីឈ្នួលឲ្យថៅកែឈើដុះស្លែឈ្មោះ ប្រូច.យកមកស្តុបទុកក្នុងទឹកដីស្ពានដែក ឃុំត្រពាំងជោ រួចបន្តរលក់ចែកចាយអោយឈ្មួញឈើផ្សេងៗទៀតដើម្បីយកទៅចែកចាយបន្តរតាមបណ្តាខេត្តផ្សេងៗ។
ឈ្មួញឈើឈ្មោះ ប្រូច នេះ មានការទំនាក់ទំនងជាមួយថៅកែធំៗដ៏ទៃទៀតដូចជាឈ្មោះណុប ឌីជាដើម ដើម្បីជាខ្នងបង្អែកក្នុងការរកស៊ីបទល្មើសព្រៃឈើ ។
តែករណីនេះគេ មិនដែលឃើញមានអាជ្ញាធម៌ដែនដីឬ មន្ត្រីជំនាញណាម្នាក់ហ៊ានចេញមុខបង្ក្រាបនោះទេ ។
-ប្រភពនេះបានបន្តទៀតថា ថៅកែឈើដ៏ល្បីឈ្មោះខាងលើនេះគេមានមុខរបរជំនួញខាងកាប់បំផ្លាញព្រៃឈើនិងដឹកជញ្ជូនឈើឆ្លងខេត្តដោយគ្មានបញ្ហា។ ជាក់ស្ដែងមានការដឹកឈើចេញពីទឹកដីខេត្តពោធិ៍សាត់ តាមច្រកបឹងខ្លុង និងអូរត្រាវ ឆ្លងកាត់ក្រុមហ៊ុន HLH យ៉ាងគគ្រឹកគគ្រេងតែគ្មានមន្ត្រីជំនាញណាម្នាក់ហ៊ានចេញមុខបង្ក្រាបឡើយ។
មេឈ្មួញរូបនេះបាននិយាយអ៊ួតក្ដែងៗថាគេមិនខ្វល់អ្វីទេរាល់ថ្ងៃនេះការងាររកស៊ីមុខជំនួញរបស់គេមិនដែលខ្លាចនណាម្នាក់ឡើយមិនថាថ្នាក់ណាមានបុណ្យស័ក្តិប៉ុន្មាននោះទេព្រោះ គេបានបង់លុយទាំងអស់ហើយ?!។ មិនតែប៉ុណ្ណោះមេឈ្មួញរូបនេះបានអួតក្តែងៗថាមន្ត្រីបរិស្ថាន បឹងខ្លុង និងអូរត្រាវ រួមទាំងសមត្ថកិច្ចខេត្តពោធិ៍សាត់ផងដែរមិនហ៊ាន បង្ក្រាបគេទេ ព្រោះមន្ត្រីទាំងនោះជាមិត្តភ័ក្រស្និទ្ធស្នាលជាមួយនឹងគ្នាហូបបាយចានតែមួយ នេះបើយោងតាមប្រភពពីអ្នកស្និទ្ធស្នាលរបស់ឈ្មួញឈើឈ្មោះ ប្រូច និងប្រជាពលរដ្ឋដែលធ្លាប់ស្គាល់លោកប្រូចនោះ។
-ប្រជាពលរដ្ឋក៏ដូចជាមន្ត្រីរាជការបាននាំបានសំណូមពរទៅដល់លោក វី សំណាង អភិបាលនៃគណ:អភិបាលខេត្តកំពង់ស្ពឺ លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទនិង លោក សាយ សំអាល់ រដ្ឋមន្ត្រីក្រសួងបរិស្ថាន ពិសេស នាយឧត្ដមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈ កម្មការបង្ក្រាបនិងទប់ស្កាត់បទល្មើសធនធានធម្មជាតិថ្នាក់ជាតិសូមលោកមេត្តាជួយមានវិធានការមកលើបុគ្គលជាមេឈ្មួញឈ្មោះប្រួចនៅស្ពានដែកនិងថៅកែឈើផ្សេងៗមួយចំនួនទៀតផងដូចជាឡើងចាងសម្បើមណាស់។
បច្ចុប្បន្ននេះកំពុងតែប្រមូលគៀងកេណ្ឌប្រជាពលរដ្ឋអោយចូលកាប់បំផ្លាញព្រៃឈើក្នុងដែនជម្រកសត្វក្នុងខេត្តកំពង់ស្ពឺ និងខេត្តពោធិ៍សាត់ផ្គើនទៅនិងអនុសាសន៍របស់សម្ដេចតេជោនិងសម្ដេចក្រឡាហោម ស ខេង ឧប្បនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
គួររម្លឹកថា ថ្មីៗនេះកាលពីថ្ងៃទី២៦ ខែមេសាឆ្នាំ២០១៩ ឯកឧត្ដម វី សំណាង អភិបាលនៃគណ:អភិបាលខេត្តកំពង់ស្ពឺ លោកបានបញ្ជាកម្លាំងជំនាញរដ្ឋបាលព្រៃឈេីបង្ក្រាបរថយន្តយីឌុប០១គ្រឿងរបស់មេការឈ្មោះចែលីន នៅចំណុចទំនប់ទឹកពាមល្វា ក្នុង ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ។
ប៉ុន្តែមន្ត្រីជំនាញពាក់ព័ន្ធ ជាពិសេសមន្ត្រីបរិស្ថាននិងមន្ត្រីរដ្ឋបាលព្រៃឈើ បែជាមិនបង្ក្រាបឈ្មួញផ្សេងៗអោយមានប្រសិទ្ធភាពនោះទេជាពិសេសគឺលោកប្រូចនេះទៅវិញមិដឹងថាខ្លាចឬបានសំណែន?។
