ទីបំផុតស្នងការនគរបាលខេត្តកំពង់ចាមសម្រេចបញ្ឈរជើងអធិការនគរបាលស្រុកកំពង់សៀមខេត្តកំពង់ចាមរឿងប្រើហឹង្សាលើប្រជាពលរដ្ឋ!
21-September-2026 / សន្តិសុខសង្គម
ភ្នំពេញ៖ លោកវរសេនីយ៍ឯក ឯក ប៉ាន់ដន ជាអធិការស្រុកកំពង់សៀមដែលរងការចោទប្រកាន់ថា បានប្រើអំពើហឹង្សា លើប្រជាពលរដ្ឋ ត្រូវបានស្នងការនគរបាលខេត្តកំពង់ចាមដែលចេញមុខការពារកាលពីមុននោះអាឡូវបាន សម្រេចដាក់ពិន័យ នៅការិយាល័យបុគ្គលិក និងបានបង្គាប់ ឲ្យលោកវរសេនីយ៍ត្រី ពេជ្រ គឹមស៊ា អធិការរង ឡើងជាអធិការស្ដីទី។
ការសម្រេចនេះ បន្ទាប់ពីលោកហួត វុទ្ធី ព្រះរាជអាជ្ញាអមសាលាដំបូងខេត្តកំពង់ចាម កាលពីថ្ងៃទី១៩ ខែមេសា ឆ្នាំ២០១៩ បានបង្គាប់មកលោកឧត្ដមសេនីយ៍ទោ ឯម កុសល ស្នងការនគរបាលខេត្តកំពង់ចាម ឱ្យ"ចាត់ការស៊ើបអង្កេតបទល្មើសដែលពាក់ព័ន្ធនឹងលោកវរសេនីយ៍ឯក ឯក ប៉ាក់ ដន អធិការនគរបាលស្រុកកំពង់សៀម យោងតាមការផ្សព្វផ្សាយក្នុងបណ្ដាញសង្គមហ្វេសប៊ុក"។
គណនីហ្វេសប៊ុកមួយឈ្មោះថា"Bun Thern"សរសេរថា "ក្នុងនាមខ្ញុំជាប្រជាពលរដ្នរស់នៅភូមិខែលជ័យ ឃុំអូរស្វាយ ស្រុកកំពង់សៀម ខេត្តកំពង់ចាម សូមលោក គួច ចំរើន អភិបាលខេត្តកំពង់ចាជួយរកយុត្តិធម៌ជូនបងប្រុសខ្ញុំផង អោយពួកខ្ញុំរស់នៅយ៉ាងណាបើគ្រាន់តែបងប្រុសរបស់ខ្ញំប្រកែកពាក្យសំដីជាមួយគ្នាបន្តិចគាត់មកផ្ទះវិញហើយមិនទាន់ដល់ផ្ទះផងស្រាប់តែអធិការស្រុកកំពង់សៀម លោកឯក ប៉ាន់ដន មកចាប់បងខ្ញុំវៃហើយបញ្ជូនមកស្រុកវៃចាក់ទឹកសន្លប់២ដងហើមគ្រប់កន្លែងអាឡូវដេកពេទ្យហើយនៅ7D ។ ហេតុអ្វីលោកអធិកាស្រុកកំពង់សៀមធ្វើបាបបងប្រុសខ្ញុំដល់ថ្នាក់នេះ"។
មាត្រា២១៨នៃក្រមព្រហ្មទណ្ឌ បទល្មើសហិង្សាដោយចេតនាមានស្ថានទម្ងន់ទោស ចែងថា អំពើហិង្សាដោយចេតនា ត្រូវផ្តន្ទាទោសដាក់ពន្ធនាគារ២ឆ្នាំទៅ៥ឆ្នាំនិងពិន័យជាប្រាក់ពី៤លានរៀលទៅ១០លានរៀល កាលបើអំពើហិង្សានេះ បានកេីតឡើង ៖ទី១,ដោយមានការគិតទុកជាមុន ។ ទី២,ដោយមានអាវុធឬគំរាមកំហែងនឹងអាវុធ ។ ទី៣,ដោយមានមនុស្សច្រើននាក់ ក្នុងឋានៈជាចារី សហចារី អ្នកផ្តើមគំនិត និង ជាអ្នកសមគំនិត ។
មជ្ឈដ្ឋានជាច្រើន សង្ឃឹមថា ប្រសិនបើលោកវរសេនីយ៍ឯក ឯក ប៉ាក់ដន អធិការនគរបាលស្រុកកំពង់សៀមប្រសិនបើ ពិតជាបានប្រព្រឹត្តបទល្មើសបែបនេះ មែន សមត្ថកិច្ចគួចាប់ខ្លួន ដើម្បីផ្តន្ទាទោសតាមច្បាប់ ។
ពាក់ព័ន្ធនិងករណីខាងលើ តំណាងអយ្យការអមសាលាដំបូង ខេត្តកំពង់ចាមបានចេញដីកាបង្គាប់មកលោក ឯម កុសល ស្នងការនគរបាលខេត្តកំពង់ចាម ចាត់ការស៊ើបអង្កេតបទល្មើសខាងលើ។
សូមបញ្ជាក់ដែរថាករណីយ៍នេះស្នងការនគរបាលខេត្តកំពង់ចាមកាលពីថ្ងៃទី១៨មេសាឆ្នាំ២០១៩តាមរយៈអង្គភាពព័ត៌មាន Fresh News លោកឧត្តមសេនីយ៍ទោ ឯម កុសល បានធ្វើការបំភ្លឺ និងច្រានចោលទាំងស្រុងចំពោះការចោទប្រកាន់តាមបណ្ដាញសង្គមថា កម្លាំងនគរបាលស្រុកកំពង់សៀម បានប្រើប្រាស់អំពើហិង្សាទៅលើប្រជាពលរដ្ឋបណ្ដាលឲ្យរងរបួស។
លោកឧត្តមសេនីយ៍ស្នងការ បានអះអាងថា នេះកិច្ចប្រតិបត្តិការបង្ក្រាបករណី គំរាមកំហែង និងបង្កការអុកឡុក កន្លែងរាំធុងបាស់នៅចំណុចក្នុងបរិវេណវត្តខែលជ័យ ស្ថិតនៅភូមិខែលជ័យ ឃុំអូរស្វាយ ស្រុកកំពង់សៀម ខេត្តកំពង់ចាម កាលពីយប់ថ្ងៃទី១៦ ខែមេសា ឆ្នាំ២០១៩ ដោយឃាត់ខ្លួនឈ្មោះ ហាក់ សៀង ហាន ភេទប្រុស ស្ថិតក្នុងស្ថានភាពស្រវឹងស្រាហើយបានធ្វើការវាយប្រតាយប្រតបជាមួយកម្លាំងសមត្ថកិច្ច និងប្រជាការពារដែលមានភារៈកិច្ចការពារនៅទីនោះក្នុងពេលកិច្ចប្រតិបត្តិការចាប់ខ្លួន។
លោកឧត្តមសេនីយ៍ទោ ឯម កុសល បានបន្ថែមថា រហូតដល់ថ្ងៃទី១៧ ខែមេសា ឆ្នាំ២០១៩ ដោយមានសំណូមពរ និងការអង្វរកររបស់សាច់ញាតិ ព្រមទាំងម្តាយរបស់ឈ្មោះ ហាក់ សៀងហាន និងដោយមានសំណូមពរពីអាជ្ញាធរមូលដ្ឋានភូមិ-ឃុំ ឲ្យជួយសម្របសម្រួលធ្វើការអប់រំឈ្មោះ ហាក់ សៀងហាន នៅត្រឹមអធិការដ្ឋាននគរបាលស្រុកកំពង់សៀម ។
បន្ទាប់មកលោកវរសេនីយ៍ឯក ឯក ប៉ាន់ដន អធិការនគរបាលស្រុកកំពង់សៀម បានសុំគោលការណ៍ពីលោក ហួត វុទ្ធី ព្រះរាជអាជ្ញាអមសាលាដំបូងខេត្តកំពង់ចាម បន្ទាប់ពីទទួលបានការអនុញ្ញាតលោកអធិការ បានធ្វើការអប់រំជនសង្ស័យឈ្មោះ ហាក់ សៀងហាន នៅវេលាម៉ោង០៩៖១៥នាទី ថ្ងៃទី១៧ ខែមេសា ឆ្នាំ២០១៩ ឲ្យត្រឡប់ទៅមូលដ្ឋានវិញ។
