ចិនផ្តល់កាដូលើវិស័យកសិកម្មដល់វៀតណាមតាមរយៈទស្សនៈកិច្ចលោកតូឡឹម!
16-April-2026 / ព័ត៌មានអន្តរជាតិ
ចិន៖ប្រទេសវៀតណាម បានបង្កើនមុខទំនិញកសិផលចំនួន ៣ មុខបន្ថែមទៀត សម្រាប់ការនាំចេញជាផ្លូវការទៅប្រទេសចិន រួមមាន សាច់ក្រពើ ទុរេនក្លាសេ និងផ្លែដូង ខណៈទំនាក់ទំនងសេដ្ឋកិច្ច និងពាណិជ្ជកម្មរវាងប្រទេសទាំង២កើនឡើង។ នេះបើតាមការចុះផ្សាយរបស់កាសែត Viet Nam News។ ការបង្កើនមុខទំនិញមាននៅក្នុងពិធីសារអនុញ្ញាត ដែលបានចុះហត្ថលេខាដោយក្រសួងកសិកម្ម និងអភិវឌ្ឍន៍ជនបទវៀតណាម (MARD) និងរដ្ឋបាលទូទៅនៃគយនៃប្រទេសចិន ក្នុងអំឡុងដំណើរទស្សនកិច្ចផ្លូវរដ្ឋរបស់អគ្គលេខាបក្សកុម្មុយនិស្ត និងប្រធានាធិបតីវៀតណាម លោក Tô Lâm ទៅកាន់ប្រទេសចិន កាលពីថ្ងៃចន្ទទី១៩សីហា២០២៤។តាមការអញ្ជើញរបស់ប្រមុខរដ្ឋចិន, បុរសខ្លាំងថ្មីរបស់វៀតណាម បានអញ្ជើញទៅដល់ស្រុកចិន នៅថ្ងៃអាទិត្យទី ១៨ សីហា។ នេះជាទស្សនកិច្ចក្រៅប្រទេសដំបូងគេរបស់ លោក តូ ឡិម គិតតាំងពីលោកបានក្លាយជាប្រធានាធិបតីនិងជាអគ្គលេខាធិការដឹកនាំបក្សកុម្មុយនិស្តវៀតណាម។
ពីទីក្រុងប៉េកាំង លោក ស៊ី ជិនភីង ប្រធានាធិបតី និងជាអគ្គលេខាធិកាបក្សកុម្មុយនីស្តចិន បានប្រាប់សមភាគីវៀតណាមថា វៀតណាម ជាដៃគូដ៏សំខាន់របស់ចិន។លោកប្រធានាធិបតីស៊ី បានបញ្ជាក់ថា វាឆ្លុះបញ្ចាំងយ៉ាងពេញលេញអំពីសារៈសំខាន់ដ៏អស្ចារ្យដែលឯកឧត្តម តូ ឡឹម យកចិត្តទុកដាក់ចំពោះទំនាក់ទំនងរវាងភាគីទាំងពីរ និងប្រទេសទាំងពីរ ក៏ដូចជាលក្ខណៈយុទ្ធសាស្ត្រកម្រិតខ្ពស់នៅក្នុងទំនាក់ទំនងចិន-វៀតណាម ។លោកស៊ី បានសម្តែងនូវឆន្ទៈក្នុងការបង្កើតទំនាក់ទំនងការងារល្អ និងមិត្តភាពផ្ទាល់ខ្លួនជាមួយលោកឡឹម ដើម្បីរួមគ្នាអភិវឌ្ឍន៍គ្រប់ផ្នែកសំខាន់ៗ ក្នុងការកសាងសហគមន៍រួមវាសនាតែមួយ រវាងចិន និងវៀតណាម ។
សូមបញ្ជាក់ថាទុរេនក្លាសេ ដែលកំណត់ថាជាផលិតផលអាទិភាព ត្រៀមនឹងជំរុញប្រាក់ចំណូលពីការនាំចេញកសិផលយ៉ាងច្រើន ហើយការអនុញ្ញាតឱ្យនាំចូលជាផ្លូវការទៅកាន់ទីផ្សារចិន រំពឹងថានឹងបើកឱកាសជាច្រើនសម្រាប់ឧស្សាហកម្មទុរេនរបស់ប្រទេស ខណៈវៀតណាមរំពឹងកើនចំណូលបានពីទុរេនក្លាសេ ប្រមាណចន្លោះពី ៤០០-៥០០ លានដុល្លារនៅឆ្នាំនេះ ដោយមានចិនរួមចំណែកលើសលប់លើទីផ្សារនាំចូល។ វៀតណាមក៏មើលឃើញដែរថា ការអនុញ្ញាតពីចិនឱ្យនាំចូលផ្លែដូង ក៏ដូចជាសាច់ក្រពើ នឹងរួមចំណែកយ៉ាងសំខាន់សម្រាប់កំណើនលើវិស័យរៀងៗខ្លួន ដែលនឹងជួយជំរុញផលិតផលវៀតណាមឱ្យត្រូវតាមគុណភាពស្ដង់ដារសកល។ ប្រទេសចិនបន្តជាទីផ្សារដ៏ធំបំផុតមួយសម្រាប់ផលិតផលកសិកម្មវៀតណាម ខណៈទំនាក់ទំនងសេដ្ឋកិច្ច និងពាណិជ្ជកម្មរវាងប្រទេសទាំង២កើនឡើងសរុបជាទឹកប្រាប់រាប់ពាន់លានដុល្លារ។
ស្ថិតិបង្ហាញថា ចិនជាដៃគូពាណិជ្ជកម្មដ៏ធំបំផុតរបស់វៀតណាម ដោយឆមាសទី១ឆ្នាំនេះ ទំហំពាណិជ្ជកម្មទ្វេភាគីបានឈានដល់ជិត ៩៥ ប៊ីលានដុល្លារ។ ការចេញទៅចិន មានទំហំ ២៧,៨ ប៊ីលានដុល្លារ កើនឡើង ៥,៣ ភាគរយ ធៀបនឹងរយៈពេលដូចគ្នាកាលពីឆ្នាំមុន ហើយការនាំចូលពីចិនមានទំហំ ៦៧ ប៊ីលានដុល្លារ កើនឡើង ៣៥ ភាគរយ។ នេះបើតាមការចុះផ្សាយរបស់កាសែត VietnamPlus។ ប្រទេសទាំង២ បានចុះហត្ថលេខាលើកិច្ចព្រមព្រៀងទ្វេភាគី និងពហុភាគី រួមទាំងកិច្ចព្រមព្រៀងពាណិជ្ជកម្មសេរីអាស៊ាន-ចិន (ACFTA) និងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP)។ ជាមួយនឹងកតិកាសញ្ញាទាំងនេះ ពាណិជ្ជកម្មទ្វេភាគីត្រូវបានគេរំពឹងថានឹងបន្តកើនឡើងក្នុងប៉ុន្មានឆ្នាំខាងមុខ ជាពិសេសនៅក្នុងវិស័យដូចជា កសិកម្ម វាយនភ័ណ្ឌ និងអេឡិចត្រូនិច។ ចិនមិនត្រឹមតែជាដៃគូពាណិជ្ជកម្មដ៏ធំរបស់វៀតណាមនោះទេ ចិនក៏រួមចំណែកដ៏សំខាន់លើលំហូរវិនិយោគផ្ទាល់ពីបរទេសរបស់វៀតណាមផងដែរ។
រយៈពេល៧ខែដំបូងនៃឆ្នាំនេះ ក្នុងចំណោមប្រទេស និងដែនដីចំនួន ៩១ ដែលវិនិយោគនៅវៀតណាម ចិនបានកាន់កាប់តំណែងកំពូលក្នុងចំនួនគម្រោងវិនិយោគថ្មីៗ ដោយរួមចំណែក ២៩,៧ ភាគរយ នៃចំនួនសរុប។ បើតាមក្រសួងផែនការ និងវិនិយោគវៀតណាម បានឱ្យដឹងថា សាជីវកម្មចិនធំៗជាច្រើនក្នុងវិស័យបច្ចេកវិទ្យា អគ្គិសនី-អេឡិចត្រូនិក កែច្នៃ ផលិត ហេដ្ឋារចនាសម្ព័ន្ធ ថាមពលកកើតឡើងវិញ និងរថយន្តអគ្គិសនី បានដាក់ការវិនិយោគក្នុងប្រទេសវៀតណាម។
ក្នុងដំណើរទៅស្រុកចិនរបស់លោក តូ ឡឹមមានការ រំពឹងសង្ឃឹមទុករបស់វៀតណាមលើជំនួយហិរញ្ញវត្ថុនិងកិច្ចសហការបច្ចេកទេសរបស់ចិន ដើម្បីកសាងអភិវឌ្ឍវិស័យហេដ្ឋារចនាសម្ព័ន្ធនៅវៀតណាម។ វៀតណាមគ្រោងសាងសង់ផ្លូវរថភ្លើងល្បឿនលឿន ចំនួន ២ ឲ្យសម្រេចរួលរាល់ នៅឆ្នាំ២០៣០។ ផ្លូវរថភ្លើងល្បឿនលឿននោះ តភ្ជាប់ពីរដ្ឋធានីប៉េកាំងរហូតដល់រដ្ឋធានីហាណូយ និងភ្ជាប់ទៅទីក្រុងកំពង់ផែសំខាន់ៗថែមទៀតនៅដាណាងភាគកណ្តាល។ ម្ល៉ោះហើយ វៀតណាមត្រូវការជំនួយចិនក្នុងរឿងបច្ចេកទេសសម្រាប់វិស័យដឹកជញ្ជូន ព្រមទាំងត្រូវការកិច្ចសហការពាណិជ្ជកម្ម ពិសេសសម្រាប់នាំចេញទំនិញកសិកម្ម-ឧស្សាហកម្ម តាមតំបន់ព្រំដែនប៉ែកខាងជើងប្រទេសវៀតណាម។
មេដឹកនាំចិន មានប្រសាសន៍ថា ប្រទេសចិន និងវៀតណាម បានរក្សានូវការអភិវឌ្ឍន៍សេដ្ឋកិច្ចយ៉ាងឆាប់រហ័ស និងស្ថិរភាពសង្គមរយៈពេលវែង ដោយបង្ហាញពីឧត្តមភាពនៅក្នុងប្រព័ន្ធសង្គមនិយម និងសារៈសំខាន់របស់បុព្វហេតុសង្គមនិយម។ លោក ស៊ី បញ្ជាក់ថា ចិន ចាត់ទុកវៀតណាមជាអាទិភាព នៅក្នុងវិស័យការទូតរបស់ខ្លួន និងគាំទ្រវៀតណាមក្នុងការប្រកាន់យកមាគ៌ាសង្គមនិយម ស្របតាមលក្ខខណ្ឌជាតិរបស់ខ្លួន និងជំរុញបន្ថែមទៀតនូវបុព្វហេតុកំណែទម្រង់ ការបើកចំហ និងទំនើបភាវូបនីយកម្មសង្គមនិយម ។
លោក ស៊ី បានគូសបញ្ជាក់ដែរថា ក្នុងដំណាក់កាលសំខាន់នៃការអភិវឌ្ឍន៍របស់ប្រទេសជាតិ ចិន និងវៀតណាម គួរតែស្ថិតក្រោមការដឹកនាំចំពោះចក្ខុវិស័យនៃការកសាងសហគមន៍រួមវាសនាតែមួយ រួមគ្នាអភិវឌ្ឍន៍ ជឿទុកចិត្តគ្នាផ្នែកនយោបាយ និងសហប្រតិបត្តិការផ្នែកសន្តិសុខឱ្យកាន់តែរឹងមាំបន្ថែមទៀត រួមទាំងគាំទ្រចំពោះវិស័យសាធារណៈឱ្យកាន់តែរឹងមាំ សម្របសម្រួល និងសហប្រតិបត្តិការពហុភាគីឱ្យកាន់តែជិតស្និទ្ធ ដោយគ្រប់គ្រង និងដោះស្រាយភាពខុសគ្នាឱ្យបានកាន់តែប្រសើរឡើង ។អគ្គលេខាបក្សកុំមុយនិស្តវៀតណាម លោក តូ ឡិម បានសង្ឃឹមថា ប្រទេសជិតខាងទាំងពីរ នឹងបន្តរក្សាទំនាក់ទំនងបែបមិត្តភាព អភិវឌ្ឍភាពជាដៃគូកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយ និងសហគមន៍រួមដែលអាចអនុវត្តភាពចាំបាច់ជាយុទ្ធសាស្ត្រ។
នៅថ្ងៃទី២០ ខែសីហា ដែលជាថ្ងៃចុងក្រោយនៃដំណើរទស្សនកិច្ចនៅចិន លោក តូ ឡិម បានជួបជាមួយនាយករដ្ឋមន្ត្ចិនរី លោក លី ឈាំងផងដែរ។ បើតាមលោក លី រដ្ឋាភិបាលក្រុងប៉េកាំង បន្តគាំទ្រក្រុងហាណូយ ក្នុងការធ្វើកំណែទម្រង់ និងពន្លឿនការធ្វើទំនើបកម្ម, ឧស្សាហកម្មនីយកម្ម និងកសាងសង្គមនិយម។ ចំណែក លោក តូ ឡិម វៀតណាម តែងពិចារណាការអភិវឌ្ឍប្រកបដោយមិត្តភាព និងកិច្ចសហប្រតិបត្តិការគ្រប់ជ្រុងជ្រោយជាមួយចិន។បើតាមអ្នកជំនាញវិភាគកិច្ចទំនាកទំនងវៀតណាម-ចិន, លោក តូ ឡិម កំពុងតែបន្តមត៌កការទូតរបស់ខ្មោចរដ្ឋបុរស ង្វៀន ភូចុង ដែលស្លាប់ទៅកាលពីខែមុន ហើយនិងចង់ផ្ញើសារទៅយុវជនវៀតណាមថា ចំណងទាក់ទងជាមួយចិនប្រទេសរបងជិតខាងគ្នា ជាជម្រើសយុទ្ធសាស្ត្រដ៏សំខាន់ចាំបាច់។
តាមការសង្កេតវា មានរឿងជាច្រើនបានផ្លាស់ប្ដូរ ចាប់តាំងពីដំណើរទស្សនកិច្ចនៅវៀតណាមរបស់លោកប្រធានាធិបតីចិន ស៊ី ជីនពីន កាលពីឆ្នាំ២០១៧ ដែលធ្វើឡើងគាប់ជួបនឹង ដំណើរទស្សនកិច្ចរបស់អតីតប្រធានាធិបតីអាមេរិក លោក ដូណាល់ ត្រាំ នៅទីក្រុងហាណូយ ក្រោយចូលរួមកិច្ចប្រជុំប្រចាំឆ្នាំ Apec ក្នុងខេត្ត Danang នៅពេលនោះ។ សង្គ្រាមពាណិជ្ជកម្មរបស់លោក ត្រាំ ជាមួយចិនបានបង្ខំឱ្យក្រុមហ៊ុនលោកខាងលិចជាច្រើនបង្វែរការវិយោគរាប់ពាន់លានដុល្លារចេញពីចិន ទៅកាន់វៀតណាម។ ប៉ុន្តែ មិនបានកែប្រែចិត្តឱ្យវៀតណាមប្រកាសចាត់ទុកសហរដ្ឋអាមេរិកជាដៃគូយុទ្ធសាស្ត្រគ្រប់គ្រងជ្រុងជ្រោយនោះទេ។ រហូតដល់កាលពីខែកញ្ញាឆ្នាំ២០២២ ទើបវៀតណាម យល់ព្រមដំឡើងទំនាក់ទំនងជាមួយសហរដ្ឋអាមេរិក ទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ អំឡុងទស្សនកិច្ចរបស់ប្រធានាធិបតីអាមេរិក លោក ចូ បៃដិន ក្នុងទីក្រុងហាណូយ។
ទោះបីវៀតណាមសព្វថ្ងៃត្រូវបានគេមើលឃើញថាមានទំនោរកាន់តែងាកទៅរកលោកខាងលិចជាផ្លូវរដ្ឋនៅចំពោះមុខបញ្ហាសមុទ្រចិនខាងត្បូងក៏ដោយ ក៏លោក ស៊ី ជិនពីង នឹងនៅតែជាមេដឹកនាំម្នាក់ដែលទទួលបានការស្វាគមន៍បំផុតនៅវៀតណាមកាលពីខែធ្នូឆ្នាំ២០២៣។ លោក Zachary Abuza ជាអ្នកជំនាញម្នាក់ ខាងកិច្ចការអាស៊ី មកពីសាកលវិទ្យាល័យ National War College ក្នុងទីក្រុងវ៉ាស៊ីនតោន បាននិយាយថា «សម្រាប់វៀតណាម ចិនជាការគំរាមកំហែងទឹកដីនៅក្នុង សមុទ្រចិនខាងត្បូង ប៉ុន្តែចិនវិញនៅតែចង់ឱ្យគណបក្សកម្មុយនិស្ដវៀតណាម រក្សាអំណាចផ្ដាច់មុខឯកបក្សរបស់ខ្លួននៅវៀតណាម ពីព្រោះវាជាប្រព័ន្ធដឹកនាំមួយមាន ទម្រង់ដូចគ្នានឹងចិន ដែលអាចធ្វើឱ្យប្រទេសទាំង២មានទំនាក់ទំនងជិតស្និទ្ធនឹងគ្នា នៅក្រោមទិដ្ឋភាពជាច្រើន។
តែតាមអ្នកជំនាញរូបនេះដដែល ខណៈសហរដ្ឋអាមេរិកនិយាយថាខ្លួនមានការប្ដេជ្ញាចិត្តធ្វើការជាមួយវៀតណាម និងទទួលស្គាល់ប្រព័ន្ធដឹកនាំរដ្ឋរបស់ទីក្រុងហាណូយ ក៏ដោយ ក៏ថ្នាក់ដឹកនាំវៀតណាមភាគច្រើននៅតែមានការសង្ស័យ និងប្រុងប្រយ័ត្នជានិច្ច ដោយសារតែប្រវត្តិធ្វើអន្តរាគមន៍របស់សហរដ្ឋអាមេរិកនៅក្នុងបដិវត្តន៍ពណ៌ ផ្ដួលរំលំរដ្ឋាភិបាល នៅជុំវិញពិភពលោកនាពេលកន្លងមក។
របៀបវារៈនៃកិច្ចពិភាក្សារវាងលោក ស៊ី ជីនពីង ជាមួយសមភាគីវៀតណាម លោក Nguyen Phu Trong មិនត្រូវបានបញ្ចេញឱ្យដឹងជាសាធារណនោះទេកាលពីអឡុងឆ្នាំ២០២៣។ ប៉ុន្តែ មាន ការរំពឹងជាច្រើនថាមេដឹកនាំនៃប្រទេសទាំង២ នឹងពិភាក្សាគ្នាពីគម្រោងផ្លូវដែកថ្មីមួយតភ្ជាប់រវាងប្រទេសទាំង២។
បច្ចុប្បន្ន សមត្ថភាពដឹកជញ្ជូនតាមផ្លូវដែកតភ្ជាប់រវាង ចិន និងវៀតណាមនៅមានកម្រិតនៅឡើយ ដ្បិតប្រព័ន្ធផ្លូវដែកទាំងនោះមានសភាពចាស់ណាស់ទៅហើយ រីឯក្រុមមន្ត្រីមនៃរដ្ឋាភិបាលចិន និងវៀតណាមក៏ធ្លាប់បាន អំពាវនាវជាយូរណាមកហើយដែរឱ្យធ្វើបច្ចុប្បន្នផ្លូវដែក។ «យើងមិនអាចមើលរំលងបានទេថាភាគខាងជើងរបស់វៀតណាម គឺជាផ្នែកមួយនៃខ្សែចង្វាក់ផ្គត់ផ្គង់ ភាគខាងត្បូងរបស់ចិន។ ដូច្នេះ វៀតណាមតែងតែមានការព្រួយបារម្ភជានិច្ច នៅពេលដែលមានកំណើនយឺតយ៉ាវក្នុងសេដ្ឋកិច្ចចិន ព្រោះវាមានជាប់ពាក់ព័ន្ធនឹងសេដ្ឋកិច្ច វៀតណាម ដែរ»។ នេះជាការកត់សម្គាល់របស់លោក Zachary Abuza។
លោកលីដាងដន័( Le Dang Doanh) ជាទីប្រឹក្សាសេដ្ឋកិច្ចជាន់ខ្ពស់ចូលនិវត្តន៍ម្នាក់ នៅក្រោមការដឹកនាំរបស់នាយករដ្ឋមន្ត្រីវៀតណាម៥រូប ក៏យល់ស្របស្រដៀង នេះដែរថាបណ្ដាញផ្លូវដែកអាចនឹងជួយដោះស្រាយកង្វល់របស់ចិនជុំវិញការរឹតត្បិតការចូលរួមរបស់វៀតណាម នៅក្នុងគំនិតផ្ដួចផ្ដើមខ្សែក្រវាត់ និងផ្លូវ ហើយដែល ការស្ទាក់ស្ទើរនេះគឺជាឧបសគ្គមួយនៅក្នុងទំនាក់ទំនងរវាងចិន និងវៀតណាម។ បើគម្រោងបណ្ដាញផ្លូវដែកថ្មីដំណើរការទៅមុខដោយរលូន នោះវានឹងក្លាយជាគម្រោង ទី២ នៅក្រោមគំនិតផ្ដួចផ្ដើមខ្សែក្រវាត់ និងផ្លូវ បន្ទាប់ពីប្រព័ន្ធរថភ្លើងក្រោមដីក្នុងទីក្រុងហាណូយចាប់ផ្ដើមដំណើរការកាលពីខែវិច្ឆិកា ឆ្នាំ២០២១។
គម្រោងផ្លូវដែក ត្រូវបានថ្នាក់ដឹកចិនចាត់ទុកថាជាមធ្យោបាយមួយដ៏ល្អ ដើម្បីទាក់ទាញចិត្តវៀតណាម និងនឹងអាចជួយកាត់បន្ថយឥទ្ធិពលអាមេរិកនៅវៀតណាម។ លើសពីនេះទៅទៀត ការធ្វើបច្ចុប្បន្នភាពប្រព័ន្ធផ្លូវដែកសល់ពីសម័យអាណានិគមដែលតភ្ជាប់ពីទីក្រុង Haiphong ជាមួយទីក្រុង Kunming របស់ចិន ក៏នឹងត្រូវឆ្លងកាត់ តាមផងដែរតំបន់សម្បូរ «រ៉ែកម្រ» របស់វៀតណាម។ តាមលោក Le Dang Doanh ទាំងចិន និងវៀតណាមសុទ្ធតែមានចំណាប់អារម្មណ៍លើការវិនិយោគរបស់ចិន លើ គម្រោងរ៉ែ នៅក្នុងប្រទេសវៀតណាម។ លោកបន្ថែមដូច្នេះថា «ចិនគឺជាប្រទេសស្តុកទុករ៉ែកម្រធំជាងគេបំផុតនៅលើពិភពលោក រីឯវៀតណាមក៏ជាប្រទេសស្ដុកទុករ៉ែកម្រ ធំលំដាប់ទី២ដែរ។ ដូច្នេះ ខ្ញុំគិតថាចិនមានចំណាប់អារម្មណ៍ក្នុងការធ្វើកិច្ចសហប្រតិបត្តិការក្នុងការរុករករ៉ែកម្រជាមួយវៀតណាម»។
រ៉ែកម្រ ត្រូវបានប្រើប្រាស់យ៉ាងសំខាន់បំផុតនៅក្នុងបច្ចេកវិទ្យាទំនើបៗ រាប់ចាប់ពីឧបករណ៍អេឡិចត្រូនិក ដូចជា smartphones រហូតដល់យន្ដហោះចម្បាំង។ ចិនត្រូវបាន រាយការណ៍ថាកំពុងគ្រប់គ្រងលើពាណិជកម្មសកលក្នុងវិស័យរ៉ែកម្រ ដែលនេះធ្វើឱ្យសហរដ្ឋអាមេរិក និងសម្ព័ន្ធមិត្តមានការព្រួយបារម្ភថាអាចនឹងបាត់បង់ ឬពិបាកស្វែងរក ការផ្គត់ផ្គង់រ៉ែកម្រ ក្នុងករណីមានសង្គ្រាមជាមួយចិននៅថ្ងៃណាមួយ។ ម្លោះហើយដោយសារតែរ៉ែកម្រ គឺជាប្រភពធនធានដ៏សំខាន់ពាក់ព័ន្ធនឹងភូមិសាស្ត្រនយោបាយ ប្រទេសជាដៃគូរបស់វៀតណាមដែលកំពុងប្រជែងអំណាចជាមួយចិន ក៏ចង់បានកិច្ចសហប្រតិបត្តិការជាមួយទីក្រុងហាណូយ លើវិស័យរ៉ែកម្រផងដែរ ដោយមិនមានការ ចូលរួមពីចិន។
លោក Le The My ជាអតីតប្រធាននាយកដ្ឋានគោលនយោបាយការបរទេសនៃវិទ្យាស្ថានសិក្សាពីចិន ក្នុងទីក្រុងហាណូយ បាននិយាយថា តាមរយៈដំណើរទស្សនកិច្ច របស់លោក ស៊ី ជីនពីង ចិនចង់បញ្ជូនសារមួយទៅកាន់វៀតណាមថាចិននឹងមិនបោះបង់ចោល ឬដើរចេញពីវៀតណាមនោះទេ ហើយចិនចង់រក្សាទំនាក់ទំនងល្អជាមួយ វៀតណាម ដរាបណាវៀតណាមមិនឆ្លង «បន្ទាត់ក្រហម» ដោយងាកទៅរក ឬដើរតាមសហរដ្ឋអាមេរិកជ្រុលហួសហេតុពេក៕
