តេជោព្រមានកម្លាំងប្រឆាំងដែលកៀគរគ្នាប្រជុំតាមឡានក្រុងប្រុងធ្វើសកម្មភាពគាំទ្រលោកសមរង្ស៊ីចូលស្រុក
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានព្រមានធ្ងន់ៗទៅលើ សកម្មជនអតីតមន្ត្រីបក្សប្រឆាំង ដែលកំពុងតែធ្វើសកម្មភាព កៀងគរសកម្មជន ប្រជុំតាមរថយន្តក្រុង និងរៀបចំសកម្មជនមួយចំនួន ដើម្បីត្រៀមធ្វើកុបកម្ម ពេលលោក សម រង្ស៊ី វិលចូលស្រុកវិញ ។
ក្នុងឱកាសអញ្ជើញបើក ការដ្ឋានសាងសង់សំណង់ផ្សេងៗ ក្នុងគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញ ជំហានទី៤ នាព្រឹកថ្ងៃទី៣ មីនាសម្ដេចតេជោ ហ៊ុន សែនថ្លែង ថា៖ អ្នកដែលចង់ចេញ ធ្វើនយោបាយគេចង់ ប៉ុន្តែមានអ្នកខ្លះកំពុងរៀបចំ ប្រជុំតាមរថយន្ត សូម្បីតែប្រជុំនៅបឹងត្រកួន ខេត្តបន្ទាយមានជ័យ មានមេក្លោងឈ្មោះ រ័ត្ន សុធី ។
ពាក់ព័ន្ធឈ្មោះរត្ន័សុធីនេះ សម្ដេចតេជោផ្ដាំ វិញថា កុំធ្វើឲ្យសោះរឿងប្រជុំតាមរថយន្ត ដើម្បីកៀងគរសកម្មជន ត្រៀមធ្វើកុបកម្ម ពេលលោក សម រង្ស៊ី ចូលស្រុក ប្រយ័ត្នជាប់ខ្នោះ ។ “ហើយនៅនេះ ស្រីមួយដើរតួខ្លាំង ប្រជុំតាមឡានតែម្ដង ថ្ងៃមុនប្រជុំចេញពីភ្នំពេញ ទៅភ្នំតាម៉ៅ (ខេត្តតាកែវ) ឥឡូវកំពុងដំណើរការរៀបចំបន្តទៀត សកម្មខ្លាំងណាស់ ប្រយ័ត្ននាង! បើជាជ្រុលធ្វើចេញ មុខធ្វើតែម្ដងទៅ ហើយកុំណាអាចាត់តាំង បណ្ដាញលួចលាក់ ដើម្បីត្រៀមរៀបចំកុបកម្ម អត់ត្រូវបានអនុញ្ញាត ហើយមិនត្រូវបានលើកលែងដាច់ខាត ព្រោះនេះជាបែបកុបកម្ម ព្រោះអានៅខាងក្រៅប្រកាសថា នឹងមកចាប់ ហ៊ុន សែន ចឹងគេរៀបចំមួយសង្កាត់ ៥នាក់ ផ្ដាំឲ្យហើយ ហើយមើលមុខហ៊ុន សែន ឲ្យច្បាស់ និយាយអីធ្វើហ្នឹង” ។
សម្ដេចតេជោ ក៏បានប្រតិកម្មទៅកាន់អ្នកលើកឡើងថា មានការចូលចាប់ខ្លួន សម្ដេចដល់គេហដ្ឋានថា “ប៉ុន្តែចាប់ ហ៊ុន សែន ក្នុងឋានៈជានាយករដ្ឋមន្ត្រី បញ្ជាទ័ព និងកម្លាំងប្រដាប់អាវុធទូទាំងប្រទេស វាដូចជាងាយពេកទេដឹង ក្នុងពេលដែលអតីតមេបញ្ជាការមួយនេះ បញ្ជាកងទ័ពចូលប្រយុទ្ធ មិនខ្លាចស្លាប់អ្វីទាំងអស់ ហើយមិនមែនជាមេទ័ពទេ គឺជាអ្នកបង្កើតទ័ពតែម្ដង” ។
សម្ដេចបន្ថែមថា កាលពីសម័យប៉ុល ពត គឺពួកនេះចង់សម្លាប់សម្ដេច រហូតដល់យកបេ៤០ មកបាញ់សម្ដេច ប៉ុន្តែសម្ដេចនៅតែមិនស្លាប់ ។ សម្ដេចថា សម្ដេចចុះទៅប្រយុទ្ធនៅសមរភូមិ មិនខ្លាចញញើតសូម្បីតែបន្តិចផង រឿងអ្វីឲ្យចាប់ខ្លួនងាយៗ ស្មានតែកងទ័ព តាមអ្នកណាផ្សេង ។
ក្រៅពីការព្រមានសម្តេចតេជោ ហ៊ុន សែន ក៏ បានប្រកាសពីឱសានុវាទសម្រាប់ អ្នកដែលត្រូវបាន គេបិទសិទ្ធិធ្វើនយោបាយ ហើយចង់ចូលធ្វើនយោបាយឡើងផងដែរ។សម្តេចបានអំពាវនាវ សូមប្រញាប់ដាក់ពាក្យស្នើសុំ នៅក្រសួងមហាផ្ទៃ ឲ្យបានមុន ពិធីបុណ្យចូលឆ្នាំថ្មី ប្រពៃណីជាតិខ្មែរខាងមុខ បើមិនដូច្នោះទេ នឹងត្រូវរង់ចាំដល់ខែវិច្ចិកា ឆ្នាំ២០២២ ទើបអាចចូលធ្វើនយោបាយវិញបាន ព្រោះបើដាក់ពាក្យស្នើសុំ ក្រោយបុណ្យចូលឆ្នាំថ្មី សម្តេចនឹងមិនអើពើនោះទេ។
សម្តេចបានប្រកាសថា ការដាក់ពាក្យស្នើសុំធ្វើនយោបាយឡើងវិញ នឹងបិទនៅមុនឬក្រោយ ពិធីបុណ្យចូលឆ្នាំខ្មែរ។ សម្តេចបានសង្កត់ធ្ងន់ថា នឹងមិនមានការសម្របសម្រួល ខាងនយោបាយណាមួយ ឬការលើកលែង ការចោទប្រកាន់ណាមួយនោះទេ ព្រោះនេះមិនមែនជារឿងនយោបាយទេ ប៉ុន្តែគឺជារឿងផ្នែកច្បាប់។
សូមបញ្ជាកដែរដានៅថ្ងៃនេះតាមរយៈហ្វេសប៊ុកអតីតគណបក្សសង្គ្រោះជាតិក៏បានធ្វើការអំពាវនាវឲ្យមានការដោះលែងលោកកឹមសុខាដែលឃុំខ្លួន១៨ខែហើយមិនទាន់មានការកាត់ទោសនិងសុំឲ្យអន្តរជាតិចាតិវិធានការតឹរ៉ឹងលើរាជរដ្ឋាភិបាលផងដែរ។លោកកឹមសុខាត្រូវបានចាប់ខ្លួនកាលពីថ្ងៃទី២៧កញ្ញាឆ្នាំ២០១៧ដោយចោទថាមានផែនការក្បត់ជាតិដោយសារតែឃ្លិបវិដេអូមួយចេញកាលពីឆ្នាំ២០១៣។
