នគរបាលលែងជនសង្ស័យក្នុងសំណុំរឿងកាត់តឡាននៅទីតាំងឧកញ៉ាលីហួ
19-November-2024 / សន្តិសុខសង្គម
ភ្នំពេញ: សំណុំរឿង ចុះបង្ក្រាបទីតាំង កាត់ត និងដំឡើងរថយន្តខុសបទដ្ឋានបច្ចេកទេស ដោយខុសច្បាប់ នៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញដែលគេស្គាល់ថាទីតាំងរបស់ក្រុមហ៊ុនលីហួ កាលពីថ្ងៃទី៤ ខែមិថុនា ឆ្នាំ២០១៨ដោយនគរបាលប្រឆាំងបទល្មើសេដ្ឋកិច្ចរបស់ក្រសួងមហាផ្ទៃកន្លងទៅនោះស្ងាត់បាត់ដំណឹងសូន្យឈឹងមិដឹងថាខុសឬត្រូវ។ ផ្ទុយទៅវិញពតិមានលេចឮព័ត៌មានថា ជនសង្ស័យ
ឈ្មោះ ឃឹន បញ្ញា ភេទប្រុស អាយុ២៤ឆ្នាំ ជនជាតិខ្មែរដែល ជាមេការយានដ្ឋាន កាត់ត និងដំឡើងរថយន្តខុសច្បាប់ដែល ត្រូវបានចាប់បញ្ជូនខ្លួនទៅកាន់ នាយកដ្ឋាននគរបាលប្រឆាំងបទល្មើសសេដ្ឋកិច្ច ក្រសួងមហាផ្ទៃ ដើម្បីសាកសួរត្រូវបានដោះលែងឲ្យមានសេរីភាពវិញ ។
ពាក់ព័ន្ធ នឹងការបន្តនីតិវិធី នៃសំណុំរឿងនេះ ឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច ក្រសួងមហាផ្ទៃ ដូចគ្នាដែរលោក ហោ លីណា ព្រះរាជអាជ្ញរងអមសាលាដំបូងរាជធានីភ្នំពេញ លោកព្រះរាជអាជ្ញារង លី សុផាណា ដែលជាអ្នកនាំពាក្យ ស្ថាប័នអយ្យការអមសាលាដំបូងរាជធានីភ្នំពេញ បានគេចមិនឆ្លើយជាមួយកាសែតឡើយ។
សូមជម្រាបជូនថា កម្លាំងនគរបាល នៃនាយកដ្ឋាននគរបាលប្រឆាំងបទល្មើសសេដ្ឋកិច្ច ក្រសួងមហាផ្ទៃ ដឹកនាំដោយលោកឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាន បានសហការជាមួយកម្លាំងនគរបាល ការិយាល័យនគរបាលប្រឆាំងបទល្មើសសេដ្ឋកិច្ច រាជធានីភ្នំពេញ និងអាជ្ញាធរមូលដ្ឋាន ក្រោមការសម្របសម្រួលនីតិវិធីពីលោក ហោ លីណា ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ កាលពីថ្ងៃទី៤ ខែមិថុនា ឆ្នាំ២០១៨ បានចុះបង្ក្រាប បទល្មើស កាត់ត និងដំឡើងរថយន្តខុសបទដ្ឋានបច្ចេកទេស ខុសច្បាប់ មួយកន្លែង នៅស្ថិតនៅ ឃ្លាំងលេខ១៥B ផ្លូវ៥៩៨ ភូមិទួលគោក សង្កាត់ទួលសង្កែ ខណ្ឌឫស្សីកែវ មានម្ចាស់ឈ្មោះ អោក សំអ៊័ង និងមេការឈ្មោះ ឃឹន បញ្ញា។
នៅក្នុងកិច្ចប្រតិបត្តិការបង្ក្រាបនោះ កម្លាំងសមត្ថកិច្ចចម្រុះបានធ្វើការត្រួតពិនិត្យឆែកឆេរជាក់ស្តែងរកឃើញរថយន្តចំនួន ១០គ្រឿង ក្នុងនោះរថយន្តបានតម្លើងរួចចំនួន ៥គ្រឿង(ម៉ាក lexus ៣គ្រឿង camry hybrigde ១គ្រឿង និង highlander ១គ្រឿង) និងចំនួន៥គ្រឿងទៀត ដំឡើងពុំទាន់រួច (ម៉ាកlexus ២គ្រឿង camry hybrigde ១គ្រឿង និងpruis ២គ្រឿង)។
ចំពោះវត្ថុតាងទាំងអស់ខាងលើលោកព្រះរាជអាជ្ញារងបាន សម្រេចឲ្យបិទផ្លុំបេសៀលរក្សាដាក់ទុកក្នុងយាន្ដដ្ឋានខាងលើចំនួន៥គ្រឿង(រថយន្តតម្លើងពុំទាន់រួច) និងចំនួន ៥គ្រឿងដែលបានដំឡើងរួច បានដកហូតយកមករក្សាទុកនៅនាយកដ្ឋាន។
ទាក់ទងនិងសកម្មភាពកាត់តតម្លើងស៊េរីរថយន្តនេះលោក សួន វ៉ាន់ហុង អគ្គនាយករងដឹកជញ្ជូនផ្លូវគោកក្រសួងសារធារណៈការបានប្រាប់កាសែតថា ៖ «ការឡើងស៊េរីរថយន្ត គ្រាន់តែកែកាង ឬតុបតែងអ្វីផ្សេងៗ យើងអត់ទាន់មានច្បាប់អ្វីហាមឃាត់ ឬចោទថាគេខុសនោះទេ ប៉ុន្តែទៅថ្ងៃអនាគត យើងនឹងមិនឱ្យមានការកែច្នៃបន្តទៀតទេ ដើម្បីកុំឱ្យសមត្ថកិច្ចពិបាកសម្រេចចិត្តក្នុងការឃាត់រថយន្តណាមួយពេលមានបញ្ហា » ។ លោកបន្តថា ៖« សព្វថ្ងៃនេះ យើងអត់ទាន់មានប្រកាស ឬអនុក្រឹត្យណាចែងថា កែច្នៃឡើងស៊េរីនេះ ខុសទេ ។ យើងមានតែអនុក្រឹត្យលេខ១៨០ បានចែងទៅលើការកែច្នៃរថយន្តធុនធំ ដូចជា ដំឡើងទ្រង់ ឬតទ្រង់ខុសបច្ចេកទេស គឺខុសច្បាប់ » ។
លោកបញ្ជាក់ថា៖បើទោះបីជាការឡើងស៊េរីរថយន្ដ ឬផ្លាស់ប្ដូរខុសពីរូបរាងដើម មិនខុសច្បាប់ តែអ្នកនៅក្នុងវិស័យយានយន្ដយល់ឃើញថា វាអាចបង្កើតជាការបោកប្រាស់ដល់មហាជន, ប៉ះពាល់ប្រព័ន្ធសុវត្ថិភាពរថយន្ដ ឬគេចវេះពីការមិនទទួលខុសត្រូវណាមួយ ពិសេសនៅពេលមានបញ្ហា ជាដើម។
ឯអនុប្រធានសហព័ន្ធឧស្សាហកម្មយានយន្តកម្ពុជា លោក ងន សាំង បានឲ្យកាសែតដឹងថា ៖« រថយន្តកែស៊េរី វាអាចជាការបោកបញ្ឆោត និងប៉ះពាល់ដល់ប្រព័ន្ធសុវត្ថិភាព ។ ពេលយើងធ្វើការកែច្នៃខុសលក្ខណៈស្តង់ដា អីចឹង អាចនាំឱ្យមានគ្រោះថ្នាក់កើតឡើងដោយចៃដន្យបាន។ ជាឧទាហរណ៍ កន្លងមក មានរថយន្តឆេះនៅតាមផ្លូវ ជាដើម អាចមកពីការច្នៃប្រព័ន្ធខ្សែភ្លើងមិនត្រូវតាមលក្ខណៈស្តង់ដា » ។ លោកបន្ដថា ៖« តាមលក្ខណៈបច្ចេកវិទ្យា យើងមិនគួរឱ្យមានការកែច្នៃរថយន្តអីចឹងទេ។
អ្វីសំខាន់ អាចមានការបោកបញ្ឆោតនៅលើទីផ្សារ និងអាចបង្កឱ្យមានគ្រោះថ្នាក់ចរាចរណ៍កើតឡើងនៅតាមផ្លូវដោយប្រការណាមួយពុំបានដឹងជាមុន » ។បើតាមលោក សួន វ៉ាន់ហុង អគ្គនាយករងដឹកជញ្ជូនផ្លូវគោកបច្ចុប្បន្ននេះ យានដ្ឋានជួសជុល និងកែច្នៃរថយន្ត ដែលបានចុះបញ្ជីនៅក្រសួងសាធារណការ និងដឹកជញ្ជូន មានជាង១ពាន់កន្លែង ។ ដោយឡែក យានយន្តដែលបានចុះបញ្ជីស្របច្បាប់ មានប្រមាណ៤,២លានគ្រឿង ក្នុងនោះរថយន្តលក្ខណៈគ្រួសារមាន៤០ម៉ឺនគ្រឿង, រថយន្តធុនធំ២២ម៉ឺនគ្រឿង និងម៉ូតូ៣,៦លានគ្រឿង ។
