លោកកែវរ៉េមីថាសិទ្ធមនុស្សកម្ពុជាល្អជាងអាមេរិកតែទូតសហភាពអឺរ៉ុបយល់ផ្សេង!
02-November-2023 / ផ្សេងៗ
ភ្នំពេញ៖ ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បានថ្លែងថា កម្ពុជាមានភាពល្អប្រើសើរជាងអាមេរិក។«សហរដ្ឋអាមេរិក មានបងប្អូនប្រជាជនខ្មែរយើងខ្លះ លោកមានការយល់ច្រឡំថា ជាបិតាប្រជាធិបតេយ្យ តាមពិតមិនមែនទេ។ បញ្ហាច្រើនណាស់»។តែឯកអគ្គរដ្ឋទូតសហគមន៍អឺរ៉ុបប្រចាំស្រុកខ្មែរមិនយល់ចឹងទេ។
ការលើកឡើងរបស់លោក កែវ រ៉េមី បែបនេះ បានធ្វើឡើងនៅព្រឹកថ្ងៃទី១០ ខែធ្នូ ឆ្នាំ២០១៨នេះ ក្នុងឱកាសដែលកម្ពុជា ប្រារព្ធពិធីខួបលើកទី៧០ ទិវាសិទ្ធិមនុស្សអន្តរជាតិ ១០ធ្នូ ឆ្នាំ ២០១៨ ក្រោមប្រធានបទ «រួមគ្នាថែរក្សាសន្តិភាព ដើម្បីលើកកម្ពស់សិទ្ធិមនុស្ស» រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកគណៈកម្មាធិការសិទ្ធិមនុស្សកម្ពុជា បានបញ្ជាក់យ៉ាងដូច្នេះថា ផ្អែកលើទិន្នន័យពីអង្គការសង្គមស៊ីវិលអាមេរិកមួយបានឲ្យដឹងថា ប្រជាជនអាមេរិក មានតែ៥ភាគរយប៉ុណ្ណោះ នៃប្រជាជនសរុបនៅលើសកលលោក ក៏ប៉ុន្តែអ្នកទោសអាមេរិកមានដល់ទៅ ២៥ភាគរយ នៃចំនួនអ្នកជាប់គុកទូទាំងសកលលោក។
លោកថា បើគិតអត្រានៃអ្នកជាប់គុកនៅអាមេរិក គឺខ្ពស់មែនទែន ហើយបើគិតជាតួលេខគឺ ២.៤លាននាក់ បើគិតជាប្រជាជននៅរាជធានីភ្នំពេញ ប្រហាក់ប្រហែលនៅទីក្រុងភ្នំពេញ។ លោក កែវ រ៉េមី បានបន្តថា គេសង្កេតឃើញទៀតថា អ្នកជាប់គុកនៅសហរដ្ឋអាមេរិក៦០ភាគរយ សម្បុរមិនមែនពណ៌សទេ គឺដូចជាស្បែកខ្មៅ ម៉ិចស៉ីកូ អាស៉ី។
លោក កែវ រ៉េមី បានគូសបញ្ជាក់ថា «មានប្រជាពលរដ្ឋ សួរខ្ញុំតាម Facebook ថា កម្ពុជាមានសិទ្ធិមនុស្សទេ? មានការគោរពសិទ្ធិមនុស្សអត់? ខ្ញុំឆ្លើយថា ស្ថានភាពសិទ្ធិមនុស្សនៅកម្ពុជា មានភាពល្អប្រសើរណាស់ ប្រៀបធៀបជាមួយ បណ្តាប្រទេសជិតខាងមួយចំនួន នៅអាស៉ី នៅអឺរ៉ុប នៅអាមេរិក ស្ថានភាពរបស់យើង មានលក្ខណៈល្អប្រសើរ។ អញ្ចឹងខ្ញុំសូមជម្រាបជូនទៀតថា កត្តាសន្តិភាព គឺជាគន្លឹះមួយនៅក្នុងការលើកកម្ពស់សិទ្ធិមនុស្ស»៕
ផ្ទុយពីលោកែវរ៉េមីលោកជចអេហ្គា( George Edgar) ឯកអគ្គររដ្ឋទូតសហភាពអឺរ៉ុប (EU) បានបង្ហាញក្តីបារម្ភអំពីស្ថានភាពសិទ្ធិមនុស្ស នៅកម្ពុជាទៅវិញ ។ថ្លែងប្រាប់កាសែត ក្រោយ បញ្ចប់ពិធីអបអរសាទរទិវាសិទ្ធិមនុស្សនៅ ថ្ងៃទី១០ ខែធ្នូ ឆ្នាំ២០១៨ដែលរាជរដ្ឋាភិបាលរៀបចំលោកបន្តថា “យើងព្រួយបារម្ភអំពីស្ថានភាពសិទ្ធិមនុស្សនៅកម្ពុជា ជាពិសេសនៅពេលព្រឹត្តិការណ៍មួយចំនួនកើតមានឡើងកាលពីឆ្នាំមុននេះ ដែលបង្កផលប៉ះពាល់ដល់សិទ្ធិនយោបាយនៅក្នុងប្រទេសកម្ពុជា”។
លោក George Edgar បានសង្កត់ធ្ងន់ថា ការសម្រេចឲ្យបានសិទ្ធិមនុស្សត្រូវធ្វើឲ្យបានជាបន្តបន្ទាប់មិនថាប្រទេសមួយណាក្នុងពិភពលោកនោះទេ លោកសង្ឃឹមថា នឹងឃើញវឌ្ឍនភាពនៅកម្ពុជា ។ ក្នុងនោះសិទ្ធិជាច្រើននឹងត្រូវបានលើកកម្ពស់ ជាពិសេសនឹងបង្កើតប្រព័ន្ធធ្វើការនៅក្នុងសង្គម ដើម្បីរួមចំណែកក្នុងការលើកកម្ពស់នូវសិទ្ធិទាំងអស់នេះ ។
លោកទូតបន្ថែមថា EUបានធ្វើការប្រយ័ត្នប្រយែងអំពីសេចក្តីថ្លែងការណ៍របស់រាជរដ្ឋាភិបាលដែលបានធ្វើឡើងចាប់តាំងពីសប្តាហ៍មុននេះ ដែលបានបង្ហាញពីភាពវិជ្ជមានជាច្រើន ។ លោកសង្ឃឹមថា អ្វីដែលជាសេចក្តីថ្លែងការណ៍របស់រាជរដ្ឋាភិបាល នឹងក្លាយទៅជាការអនុវត្តជាក់ស្តែង ប៉ុន្តែក៏មិនត្រូវមើលរំលងនូវសមិទ្ធផលរបស់រាជរដ្ឋាភិបាលដែលបានធ្វើឡើងនាពេលកន្លងមក ក្នុងរយៈពេល២០ឆ្នាំចុងក្រោយនេះ ព្រោះការអភិវឌ្ឍនេះ បានលើកកម្ពស់សេដ្ឋកិច្ចចំពោះជីវភាពរស់នៅរបស់ប្រជាពលរដ្ឋក្រីក្រ។
ចំពោះបញ្ហា EBAវិញ លោកបានអះអាងថា គឺមិនទាន់មានការសម្រេចចយ៉ាងណានៅឡើយទេ គឺៗស្ថិតក្នុងការពិចារណា ព្រោះបានទុកពេលឲ្យ១២ខែសម្រាប់កម្ពុជា ក្នុងការពិចារណាចំពោះសំណើររបស់EU ដើម្បីឲ្យមានការកែប្រែនូវស្ថានការនយោបាយ។
សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានសម្ដែងការ អបអរសាទរ ខួបលើកទី៧០ នៃទិវាសិទ្ធិមនុស្សអន្តរជាតិ១០ធ្នូ ឆ្នាំ២០១៨ដោយចាត់ទុកទិវានេះគឺដើម្បី លើកស្ទួយសិទ្ធិសេរីភាព របស់មនុស្សជាតិគ្រប់ រូបដោយបានលើកឡើងថា សិទ្ធិសេរីភាព បានធ្វើឲ្យប្រជាពលរដ្ឋរស់នៅ និងប្រកបការងារតូចធំ ជ្រើសរើសជំនឿសាសនា និងបោះឆ្នោតជ្រើសតាំង មេដឹកនាំ ដែលខ្លួនពេញចិត្ត ដោយសេរី ជាពិសេសសិទ្ធិសេរីភាព ធ្វើឲ្យកម្ពុជាកាន់តែរីកចម្រើន ជឿនលឿនទៅមុខជានិច្ច។
នៅក្នុងទិវាសិទ្ធមនស្ស១០ធ្នូនេះដែរមេសហជីពធំៗ មានលោក ប៉ាវ ស៊ីណា ប្រធានសហភាព ចលនាកម្ពុជា (CCW) លោក ឌិន ពុទ្ធី សមាគមពង្រឹងសេដ្ឋកិច្ច ក្រៅប្រព័ន្ធកម្ពុជា(CIERA) លោកស្រី កេន ឆេង ឡាង សមាគមអភិវឌ្ឍន៍ជីវភាពពលរដ្ឋកម្ពុជា (CDPLA) លោកស្រី យឹម សុធី សមាគមអ្នកបម្រើតាមផ្ទះ (ADW) លោក ខាត់ ឡូត សម្ព័ន្ធសហជីពចលនាកម្មករ (CUMW) និងលោក ឆេង ឈន់ សម្ព័ន្ធសហជីពការងារឯករាជ្យ (ILUC) បានស្នើឲ្យរាជរដ្ឋាភិបាលកម្ពុជា ពិនិត្យនិងដោះស្រាយនូវសំណើរមួយចំនួន ។
