មកដឹងក្រុមហ៊ុនដែលនាំចូលគ្រឿងបង្គំរថយន្តមកដំឡើងនៅកម្ពុជានិងឡានមិនទាន់បង់ពន្ធ
27-March-2024 / សេដ្ឋកិច្ច
ភ្នំពេញ៖ លោក គុណ ញឹម អគ្គនាយកដ្ឋានគយ និងរដ្ឋាករនៅក្នុងសន្និសីទសារព័ត៌មាន ស្តីពី វឌ្ឍនភាពនៃការអនុវត្តការប្រមូលពន្ធលើយានយន្ត និងអាករនាំចូលដែលមានស្រាប់ក្នុងប្រទេស នៅព្រឹកថ្ងៃទី ០៥ ខែ តុលា ឆ្នាំ ២០២២ បានឱ្យដឹងពីមូលហេតុពីកំណើននៃ ការនាំចូលគ្រឿងបង្គំរថយន្តយកមកដំឡើងនៅកម្ពុជា គឺមកពីមានតម្លៃពន្ធធូរថ្លៃជាងការនាំចូលរថយន្តមូល។ ទោះយ៉ាងណា ភាគច្រើនកម្ពុជា នាំចូលរថយន្តថ្មីមកពីប្រទេសថៃផងដែរដោយសារអត់ជាប់ពន្ធ។
លោកមេគយបញ្ជាក់ថា ការនាំចូលរថយន្តពីថៃ គឺពន្ធនាំចូលសូន្យភាគរយ ពោលគឺនៅជាប់តែអាករពិសេស និងអាករលើតម្លៃបន្ថែមប៉ុណ្ណោះ។ ដូច្នេះបន្ទុកពន្ធធ្លាក់ចុះ តម្លៃរថយន្តក៏ធូរថ្លៃទៅតាមនឹងដែរ។ សម្រាប់ក្រុមហ៊ុនដែលកំពុងធ្វើសកម្មភាពនៅកម្ពុជាលោកគុណញឹមឲ្យដឹងថាមកទល់ពេលនេះ កម្ពុជាមានក្រុមហ៊ុនដំឡើងរថយន្តមួយចំនួន កំពុងធ្វើប្រតិបត្តិការ រួមមាន៖ ក្រុមហ៊ុន DAEHAN Auto (Cambodia) Co., Ltd ដំឡើងរថយន្តម៉ាក Ssangyong, Daehan, Sino , ក្រុមហ៊ុន Xuzhou XCMG Auto Manufacturing Co., Ltd ដំឡើងរថយន្តម៉ាក SINOTRUK និងម៉ាកផ្សេងៗ, ក្រុមហ៊ុន Camko Motor Company Ltd ដំឡើងរថយន្តម៉ាក Hyundai, ក្រុមហ៊ុន HGB Motors Assembly Co., Ltd ដំឡើងរថយន្តម៉ាក KIA , ក្រុមហ៊ុន RMA Automotive (Cambodia) Co., Ltd ដំឡើងរថយន្ត Ford , ក្រុមហ៊ុន E M Automobile Co., Ltd , ក្រុមហ៊ុន K (CAMBODIA) CO., LTD. (ISUZU) និងក្រុមហ៊ុន Toyota ជាដើម។
លោក គុណ ញឹមក៏បានឲ្យដឹងផងដែរពីចំនួនរថយន្តចង្កូតស្តាំដែលមិនទាន់បានមកបង់ពន្ធនៅពេលដែលឧសានុវាទជិតផុត។ទោះបីយ៉ាងណាលោកគុនញឹម បានបញ្ជាក់យ៉ាងដូច្នេះថា «យើងគ្រោង នឹងលើកសំណើជូនថ្នាក់ដឹកនាំពិនិត្យ និងសម្រេចក្នុងការពន្យារពេល ហើយពន្យាររយៈពេលប៉ុន្មាន ខ្ញុំនឹងជួបថ្នាក់ដឹកនាំ និងសុំមតិយោបល់»។លោក គុណ ញឹម បានលើកឡើងថា អគ្គនាយកដ្ឋានគយ និងរដ្ឋាករកម្ពុជា បានពិភាក្សាគ្នាលើកជាជម្រើស ឬជាសំណូមពរជូនថ្នាក់ដឹកនាំ ដើម្បីសុំការពន្យារពេល ជូនដល់ម្ចាស់រថយន្តចង្កូតស្ដាំ ដែលនៅសេសសល់អាចថា ជាង៣០០០គ្រឿង ស្វះស្វែងរកថវិកាដើម្បីបង់ពន្ធអាករ ដែលអនុវត្តសម្រាប់តែរថយន្តបានចុះបញ្ជីរួច។លោក គុណ ញឹម ឲ្យដឹងថា រថយន្ដចង្កួតស្ដាំគ្មានពន្ធ ដែលនៅសេសសល់ រថយន្តភាគច្រើនបំផុត មិនមែនជារថយន្តលក្ខណៈគ្រួសារទេ គឺជាប្រភេទរថយន្ដ ធ្វើអាជីវកម្ម គឺដឹកដី, ដឹកខ្សាច់, ដឹកក្រួស, ដឹកថ្ម ជាដើម។
លោក គុណ ញឹម ក៏បានឲ្យដឹងផងដែរថា ពន្ធអាករមិនមានតម្លៃថ្លៃនោះទេ ព្រោះថារថយន្ដចង្កូតស្ដាំ ដែលបានចុះបញ្ជី ទទួលបានការអនុគ្រោះបានច្រើនរួចទៅហើយ ក្នុងការអនុគ្រោះមិនឲ្យកែចង្កូត ដែលក្នុង១គ្រឿង ត្រូវចំណាយក្នុងការកែចង្កួត ចន្លោះពី២៥០០ ទៅ៥០០០ដុល្លារ «ពន្ធអាករ មិនច្រើននោះទេ គឺតិចតួច ដែលក្នុង១គ្រឿង មានតម្លៃ២៥០០ដុល្លារ ហើយប្រសិនជារថយន្ដនោះ មានសភាពចាស់ទៀតនោះ តម្លៃអាចត្រឹម២០០០ដុល្លារ តែប៉ុណ្ណោះ»។សម្រាប់ការប្រមូលចំណូលចូលថវិកាជាតិ ទាំងយុទ្ធនាការទី១ និងយុទ្ធនាការទី២ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលបានប្រមាណ១០០លានដុល្លារ ខណៈចំនួនរថយន្ដសរុប ដែលបានប្រមូលពន្ធអាករ និងបានចុះបញ្ជី មានប្រមាណ១៨,០០០គ្រឿង។
គួររំលឹកផងដែរថា រាជរដ្ឋាភិបាលកម្ពុជា បានសម្រេចឲ្យមានការប្រមូលពន្ធអាករលើរថយន្តគ្មានពន្ធ មានស្រាប់ក្នុងប្រទេស ជ្រកក្រោមផ្លាកលេខផ្សេងៗ ចាប់ពីខែកញ្ញា ឆ្នាំ២០២១ និងបញ្ចប់ត្រឹមថ្ងៃទី៣០ ខែមិថុនា ឆ្នាំ២០២២។ចាប់ពីខែកញ្ញា ដល់ថ្ងៃទី៣១ ខែធ្នូ ឆ្នាំ២០២១ រថយន្តអត់ពន្ធចង្កួតឆ្វេង អាចចូលបង់ពន្ធបាន ជាមួយការអនុគ្រោះពន្ធ-អាករ ១០ភាគរយ។ ចំពោះរថយន្តចង្កូតស្តាំ ក៏ទទួលបានការអនុគ្រោះពន្ធ ១០ភាគរយផងដែរ ត្រូវកែចង្កូតពីស្តាំមកឆ្វេង ឲ្យបានរួចរាល់យ៉ាងយូរត្រឹមថ្ងៃទី៣០ ខែមិថុនា ឆ្នាំ២០២២។
បន្ទាប់ពីផុតឱសានវាទ ដោយមានការសំណូមពរពីប្រជាពលរដ្ឋ កាលពីថ្ងៃទី៦ ខែកក្កដា ឆ្នាំ២០២២ សម្តេចតេជោ ហ៊ុន សែន បានអនុញ្ញាតឲ្យរថយន្តចង្កូតស្ដាំអត់ពន្ធ ដែលមានស្រាប់នៅក្នុងប្រទេស អាចចូលបង់ពន្ធបាន ដោយមិនចាំបាច់ប្ដូរចង្កូតពីស្តាំទៅឆ្វេងនោះទេ។ម្ចាស់រថយន្តចង្កូតស្តាំគ្មានពន្ធ តម្រូវឲ្យមកចុះបញ្ជីជារថយន្តមានស្រាប់ក្នុងប្រទេស ត្រឹមថ្ងៃទី៣១ ខែកក្កដា ឆ្នាំ២០២២ បន្ទាប់ពីបានចុះបញ្ជីរួច អគ្គនាយកដ្ឋានគយ និងរដ្ឋាករកម្ពុជា ទុកពេលវេលារហូតដល់ថ្ងៃទី០៨ ខែតុលា ឆ្នាំ២០២២ ដើម្បីបំពេញកាតព្វកិច្ចពន្ធ និងអាករ។ តែនៅពេលនេះ អាចនឹងត្រូវពន្យារពេលបន្ថែមទៀត។រថយន្តចង្កូតស្តាំគ្មានពន្ធ ដែលមានស្រាប់នៅកម្ពុជា បានមកចុះបញ្ជីមានជិត១ម៉ឺនគ្រឿង ក្នុងនោះរថយន្តចង្កូតស្តាំគ្មានពន្ធមានស្រាប់នៅកម្ពុជាចំនួន ៥៩៧៦គ្រឿងដែលបានមកបង់ពន្ធទទួលទឹកប្រាក់ពន្ធ១៩.៧លានដុល្លារ៕
