ក្រសួងការពារជាតិវៀតណាមបោះមេបើកពិពណ៍ពាណិជ្ចកម្មបង្ហាញផលិតផលនៅរាជធានីភ្នំពេញបន្ទាប់ពីរដ្ឋមន្ត្រីការពារជាតិចុះហត្ថលេខាសហការយោធា
21-September-2026 / សេដ្ឋកិច្ច
ភ្នំពេញ៖ កម្ពុជា និងវៀតណាម បានកំណត់គោលដៅជំរុញទំហំពាណិជ្ជកម្មទ្វេភាគីឱ្យកើនឡើងដល់ ២០ ពាន់លានដុល្លារអាមេរិក តាមរយៈការរឹតចំណងពាណិជ្ជកម្មឱ្យកាន់តែជិតស្និទ្ធ ការបើកទូលាយទីផ្សារ និងការសហការវិនិយោគរួមគ្នា។
គោlដៅទាំងនេះត្រូវបានគូសបញ្ជាក់នៅក្នុងពិធីបើក «ពិព័រណ៍តភ្ជាប់ពាណិជ្ជកម្ម និងផ្សព្វផ្សាយផលិតផលវៀតណាម-កម្ពុជា ឆ្នាំ២០២៦» (VIDEX CAMBODIA 2026) ដែលបានប្រព្រឹត្តទៅនាព្រឹកថ្ងៃទី១៤ ខែតុលា ឆ្នាំ២០២៦ នេះ នៅរាជធានីភ្នំពេញ។ ពិព័រណ៍នេះត្រូវបានរៀបចំឡើងក្រោមកិច្ចសហការរវាងក្រសួងការពារជាតិ និងក្រសួងឧស្សាហកម្ម និងពាណិជ្ជកម្មនៃប្រទេសវៀតណាម ជាមួយក្រសួងការពារជាតិ និងក្រសួងពាណិជ្ជកម្មនៃព្រះរាជាណាចក្រកម្ពុជា ដោយមានការអញ្ជើញចូលរួមពី ឯកឧត្តម ឧត្តមសេនីយ៍ឯក តាន់ ថាណា រដ្ឋលេខាធិការក្រសួងការពារជាតិកម្ពុជា និងឯកឧត្តម ឧត្តមសេនីយ៍បម្រុង ង្វៀន ក្វាង ង៉ុក អនុរដ្ឋមន្រ្តីក្រសួងការពារប្រទេសនៃសាធារណរដ្ឋសង្គមនិយមវៀតណាម ព្រមទាំងមានការចូលរួមពីភ្ញៀវកិត្តិយសជាច្រើនរូប។
ពិព័រណ៍ពាណិជ្ជកម្មដែលមានរយៈពេល ៤ ថ្ងៃនេះ រៀបចំរហូត ដល់ថ្ងៃទី១៧ ខែតុលា មណ្ឌលសន្និបាត និងពិព័រណ៍កោះពេជ្រ ដោយមានការចូលរួមពីអង្គភាព និងសហគ្រាសវៀតណាមចំនួន ១៥០ ព្រមទាំងក្រុមហ៊ុនកម្ពុជាចំនួន ២៧ ដើម្បីដាក់បង្ហាញផលិតផល ស្វែងរកដៃគូពាណិជ្ជកម្ម និងស្វែងយល់ពីឱកាសវិនិយោគរួមគ្នា។
គោលដៅពាណិជ្ជកម្ម ២០ ពាន់លានដុល្លារនេះ ត្រូវបានបញ្ជាក់សារជាថ្មីដោយនាយករដ្ឋមន្ត្រីនៃប្រទេសទាំងពីរកម្ពុជាវៀតណាម នៅក្នុង «វេទិកាធុរកិច្ច វៀតណាម-កម្ពុជា ឆ្នាំ២០២៦» ក្នុងអំឡុងទស្សនកិច្ចផ្លូវការរបស់នាយករដ្ឋមន្ត្រីវៀតណាម. លោក ឡេ មិញហុង (Le Minh Hung) មកកាន់កម្ពុជា នាពេលកន្លងទៅថ្មីៗនេះ។
លោកឧត្តមសេនីយ៍ឯក ង្វៀន ក្វាង ង៉ុក (Nguyen Quang Ngoc) អនុរដ្ឋមន្ត្រីក្រសួងការពារជាតិវៀតណាម បានមានប្រសាសន៍ថា ពិព័រណ៍នេះនឹងចូលរួមចំណែកបន្ថែមទៀតក្នុងការជំរុញការផ្លាស់ប្តូរទំនាក់ទំនងរវាងប្រជាជន និងប្រជាជន ព្រមទាំងពង្រឹងមិត្តភាពជាប្រពៃណី ដែលត្រូវបានពង្រឹងឥតឈប់ឈរក្រោមបាវចនា «ជិតខាងល្អ មិត្តភាពប្រពៃណី កិច្ចសហប្រតិបត្តិការ និងចីរភាពយូរអង្វែង»។
លោកបានបន្ថែមថា ព្រឹត្តិការណ៍នេះនឹងបង្កើតឱកាសថ្មីៗសម្រាប់ធុរជនកម្ពុជា និងវៀតណាម ក្នុងការភ្ជាប់ទំនាក់ទំនង ធ្វើពាណិជ្ជកម្ម ជំរុញការវិនិយោគរួមគ្នា និងការអនុវត្តបច្ចេកវិទ្យាទំនើបៗចូលទៅក្នុងកិច្ចអភិវឌ្ឍន៍សេដ្ឋកិច្ច-សង្គម។
ខាងកម្ពុជាវិញលោកឧត្តមសេនីយ៍ឯក តាន់ ថាណា រដ្ឋលេខាធិការក្រសួងការពារជាតិកម្ពុជា បានលើកឡើងថា ពិព័រណ៍នេះគឺជាផ្លែផ្កាជាក់ស្តែងមួយដែលកើតចេញពីផែនការកិច្ចសហប្រតិបត្តិការវិស័យការពារជាតិនៃប្រទេសទាំងពីរ សម្រាប់ឆ្នាំ២០២៦។
លោកឧត្តមសេនីយ៍ឯក តាន់ ថាណា បានបន្តថា ព្រឹត្តិការណ៍នេះក៏ធ្វើឡើងបន្តពី «វេទិកាធុរកិច្ច កម្ពុជា-វៀតណាម» កាលពីថ្ងៃទី៩ ខែតុលា ដែលត្រូវបានដឹកនាំផ្ទាល់ដោយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក ឡេ មិញហុង នាយករដ្ឋមន្ត្រីវៀតណាម។លោកបានគូសបញ្ជាក់ថា ការពិព័រណ៍នេះផ្តល់នូវវេទិកាយ៉ាងសំខាន់សម្រាប់ធុរជននៃប្រទេសទាំងពីរក្នុងការជួបជុំ ផ្លាស់ប្តូរយោបល់ និងស្វែងរកដៃគូពាណិជ្ជកម្មក្នុងវិស័យដែលមានសក្តានុពលខ្លាំង។
លោកឧត្តមសេនីយ៍ឯក បានបន្ថែមថា ពិព័រណ៍នេះប្រព្រឹត្តទៅចំពេលដែលស្ថានភាពសេដ្ឋកិច្ចតំបន់ និងសកលលោកកំពុងមានការប្រែប្រួលយ៉ាងឆាប់រហ័ស ដែលកំពុងផ្លាស់ប្តូរខ្សែច្រវាក់ផ្គត់ផ្គង់ និងមានឥទ្ធិពលលើការសម្រេចចិត្តវិនិយោគ(ពិសេសសកម្មភាពឈ្លានពានថៃមកលើកម្ពុជានិងការបិទព្រុំដែនរវាងប្រទេសទាំងពីរ)។លោកតានថាណាបញ្ជាក់ថា «ឈរលើបរិបទនេះ កម្ពុជា និងវៀតណាម នៅតែបន្តជ្រើសរើសផ្លូវនៃការពង្រឹងទំនាក់ទំនង កិច្ចសហប្រតិបត្តិការ និងការបំពេញបន្ថែមឱ្យគ្នាទៅវិញទៅមក»។
លោកបានបន្ថែមទៀតថា ទំនាក់ទំនងទ្វេភាគីមិនត្រឹមតែផ្តោតលើកិច្ចសហប្រតិបត្តិការនយោបាយ និងការពារជាតិប៉ុណ្ណោះទេ ប៉ុន្តែថែមទាំងរាប់បញ្ចូលទាំងពាណិជ្ជកម្ម ការវិនិយោគ ទេសចរណ៍ ការភ្ជាប់ទំនាក់ទំនង ការផ្លាស់ប្តូរប្រជាជន និងប្រជាជន ព្រមទាំងការផ្លាស់ប្តូររវាងយុវជន និងខេត្តជាប់ព្រំដែនផងដែរ។សូមបញ្ជាក់ថាកាលពីថ្ងៃទី១៣តុលានៅទីក្រុងហាណូយវៀតណាមរដ្ឋមន្ត្រីការពារជាតិកម្ពុជានិងវៀតណាមបានចុះហត្ថលេខាលើកិច្ចសហប្រតិបត្តិការណ៍លើវិសយ័យោធារវាងប្រទេសទាំងពីសម្រាប់ឆ្នាំ២០២៧។ការចុះហត្ថលេខាធ្វើកិច្ចសហការនេះត្រូវបានមើលឃើញថាបានកើតឡើងជាថ្មីក្នុងពេលដែលកម្ពុជាត្រូវបានថៃឈ្លានពានកាន់កាប់ទឹកដីមួយចំនួនតាមបណ្តោយព្រុំដែន។
