វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2330 នាក់
ម្សិលមិញ 8227 នាក់
សរុប 14129211 នាក់
ខេត្តកំពត៖សម្ដេចហ៊ុនសែននាព្រឹកថ្ងៃទី ២៦ ខែធ្នូ ឆ្នាំ២០២២ បានចាត់ទុកជោគវាសនារួមក្នុងភាពដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា-ចិន បានបង្កើតនូវការជឿទុកចិត្តគ្នាហើយដែលមិត្តចិនក្រៅពីការផ្ដល់ជំនួយឥតសំណងក៏បានផ្ដល់នូវឥណទានសម្បទានសម្រាប់ការអភិវឌ្ឍកម្ពុជា។
សម្ដេចនាយករដ្ឋមន្ត្រីបានថ្លែងដូច្នេះក្នុងខណៈអញ្ជើញជាអធិបតីជាមួយ លោកWang Wentian ឯកអគ្គរដ្ឋទូតនៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា ក្នុងពិធីបើកការដ្ឋានស្ថាបនា គម្រោងស្តារនិងលើកកម្រិតគុណភាពផ្លូវជាតិលេខ៤១ពីថ្នល់ទទឹង (ចំណុចប្រសព្វផ្លូវជាតិលេខ៤) ខេត្តកណ្តាល ដល់ស្រុកជុំគិរី(ចំណុចប្រសព្វផ្លូវជាតិលេខ៣)ខេត្តកំពត នៅស្រុកគងពិសី ខេត្តកំពង់ស្ពឺ។សម្ដេចតេជោនាយករដ្ឋមន្ត្រី បានថ្លែងអំណរគុណចំពោះសាធារណរដ្ឋប្រជាមានិតចិនដែលបានផ្ដល់នូវឥណទានសម្បទាន សម្រាប់គម្រោកែលម្អផ្លូវជាតិលេខ៤១ឡើងវិញនិងបានជួយកម្ពុជាក្នុងការអភិវឌ្ឍន៍នាពេលកន្លងមក ក៏ដូចជាក្នុងពេលបច្ចុប្បន្ន។
សម្ដេចក៏បានសុំការអធ្យាស្រ័យពីសំណាក់ប្រជាពលរដ្ឋ ដែលរស់នៅតាមដងផ្លូវជាតិលេខ៤១ ក្នុងមួយរយៈកាល ព្រោះវាពិតជារំខានទៅដល់បងប្អូន ។ប៉ុន្តែបន្ទាប់ពីការសាងសង់រួចហើយនោះ ផ្លូវនេះនឹងផ្ដល់ផលប្រយោជន៍ធំធេងណាស់សម្រាប់បងប្អូន ដែលរស់នៅតាមដងផ្លូវជាតិលេខ៤១ ឬក៏ធ្វើដំណើរលើផ្លូវនេះ និងទទួលផលប្រយោជន៍ផងដែរ។ សម្ដេចបញ្ជាក់ថា សមិទ្ធផលនេះ វាបានមកពីការខិតខំប្រឹងប្រែងរបស់យើង«ក្នុងនោះក៏សូមបញ្ជាក់ផងដែរថា មិត្តចិនបានជួយកសាងហេដ្ឋារចនាសម្ព័ន្ធចាំបាច់ ទាក់ទងជាមួយនឹងផ្លូវ ស្ពាន ដែលយើងបានធ្វើរយៈពេលកន្លងទៅ សម្តេចបន្តថា មកដល់ពេលនេះ មិត្តចិនបានចូលរួមចំណែកជួសាងសង់ផ្លូវមានចំនួន ៣០ខ្សែ ដែលមានប្រវែងជាង ៣០០០គីឡូម៉ែត្រ ដែលចំណាយថវិកាអស់ជិត ២ ០០០ លានដុល្លារអាម៉េរិក និងកំពុងសាងចំនួន៣ខ្សែទៀត ដែលត្រូវចំណាយថវិកាប្រមាណជា ៥០០លានដុល្លារអាម៉េរិក។ ឯស្ពានធំៗមានចំនួន៩ ដែលបានកសាងរួច និងកំពុងសាងសង់បន្តនោះ។
លោកស៊ុន ចាន់ថុល ទេសរដ្ឋមន្ត្រី រដ្ឋមន្ដ្រីក្រសួងសាធារណការ និងដឹកជញ្ជូន បានឱ្យដឹងថា គម្រោងសាងសង់ផ្លូវជាតិលេខ៤១ មានប្រវែងសរុប ៩៥,២៧គីឡូម៉ែត្រ ចាប់ពីថ្នល់ទទឹង (ចំណុចប្រសព្វផ្លូវជាតិលេខ៤) ខេត្តកណ្តាល ទៅដល់ស្រុកជុំគិរី (ចំណុចប្រសព្វផ្លូវជាតិលេខ៣) ខេត្តកំពត នឹងត្រូវសាងសង់លើកកម្រិតគុណភាពជាប្រភេទផ្លូវក្រាលបេតុងកៅស៊ូAC កម្រាស់ ៥សង់ទីម៉ែត្រ និងពង្រីកទទឹងតួផ្លូវរហូតដល់ ១២ម៉ែត្រ។ គម្រោងនេះ នឹងរួមបញ្ចូលនូវការសាងសង់ពង្រីកស្ពានចាស់ ០១កន្លែង ប្រវែងសរុប ២០០ម៉ែត្រ ដាក់លូគ្រប់ប្រភេទចំនួន ៣១៥កន្លែង បំពាក់កាមេរ៉ាត្រួតពិនិត្យល្បឿនចំនួន ០៨កន្លែង រួមទាំងបំពាក់ផ្លាកសញ្ញា គំនូសសញ្ញា បង្គោលគីឡូម៉ែត្រ និងបង្គោលសុវត្ថិភាព ផងដែរ។
ឯកឧត្ដមទេសរដ្ឋមន្ត្រីបានបន្តថា គម្រោងនេះ នឹងត្រូវអនុវត្ដការសាងសង់ដោយក្រុមហ៊ុនសាជីវកម្មស្ពាន និងថ្នល់ចិន(CRBC) និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន ប្រើរយៈពេល សាងសង់ចំនួន ៤០ខែ នឹងបញ្ចប់នៅអំឡុងឆ្នាំ២០២៦ ដោយគ្រោងចំណាយថវិកាសរុបប្រមាណជាង ៦៧លានដុល្លារអាម៉េរិក ដែលជាឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ និងពន្ធអាករផ្សេងៗ។ ឯកឧត្ដម ស៊ុន ចាន់ថុល ក៏បានថ្លែងរំម្លឹកឱ្យដឹងដែរថា ផ្លូវជាតិលេខ៤១នេះ បានសាងសង់ម្តងរួចមកហើយ កាលពីឆ្នាំ២០១១ ជាប្រភេទផ្លូវក្រាលកៅស៊ូពីរប្រទាប់(DBST) មានទទឹងតួផ្លូវពី ៧ម៉ែត្រ ដល់១១ម៉ែត្រ ដែលជាទូទៅប្រភេទផ្លូវនេះមានអាយុកាលជាមធ្យមពី ០៥ឆ្នាំ ទៅ ០៨ឆ្នាំ ប្រសិនបើ មានការថែទាំត្រឹមត្រូវតាមលក្ខណៈបច្ចេកទេស។