វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2510 នាក់
ម្សិលមិញ 10264 នាក់
សរុប 14141692 នាក់
ភ្នំពេញ៖លោក សម រង្ស៊ីត្រូវបានសន្និសីទពិភពលោក នៅទីក្រុង Atlanta រដ្ឋចចា សហរដ្ឋអាមេរិក២ថ្ងៃ រៀបចំដោយសាខាអតីត គណបក្សសង្គ្រោះជាតិ (CNRP) ដែលមានអ្នកចូលរួមជាង៤០០នាក់ប្រកាសគាំទ្រឲ្យ ធ្វើជាអតីតប្រធាន ស្ដីទីរបស់អតីតគណបក្ស CNRP ទោះជាមានក្រុមលោក កឹម សុខា បានចេញសេចក្តីថ្លែងការណ៍ ប្រកាសមិនទទួលស្គាល់ ក៏ដោយ។
លោក សម រង្ស៊ី ថា “ទាំងអស់គ្នាទទួលថា លោក កឹម សុខា មានសេរីភាពពេញលេញចង់ជួបនរណាក៏បាន ទាំងក្នុងស្រុក ក្រៅស្រុក ជួបយើងបានងាយស្រួល ហើយខ្ញុំសង្ឃឹមខ្លាំងជាងគេ ខ្ញុំនឹងមកចាប់ដៃជាមួយ កឹម សុខា ហើយចាប់ដៃចំពោះមុខប្រជារាស្ដ្រខ្មែរ ហើយពេលនោះ កឹម សុខា មានសេរីភាពពេញលេញហើយ ពេលនោះ សម រង្ស៊ី សុំលាលែងហើយ អត់ធ្វើជាប្រធានស្ដីទីទៀតទេ”។
លោកសមរង្ស៊ីប្ដេជ្ញាចិត្តថា នឹងដឹកនាំអតីត CNRP ក្នុងគ្រាលំបាកនេះ ដើម្បីឲ្យមានក្បាលម៉ាស៊ីន ឲ្យមានថ្នាក់ដឹកនាំ និងឲ្យCNRP មានដំណើរការឡើងវិញ ។លោកអះអាងថា គឺលោកមិនប៉ះពាល់រចនាសម្ព័ន្ធរបស់CNRPទេ ហើយតួនាទីប្រធានស្ដីទីនេះ នឹងចប់ដោយស្វ័យប្រវត្តិ នៅពេលណាដែលលោក កឹម សុខា ទទួលសេរីភាពពេញលេញឡើងវិញ។
លោក សម រង្ស៊ី អះអាងទៀតថា កឹម សុខា នៅតែជាប្រធាន CNRP ដដែល ហើយការជ្រើសយកលោកនាពេលនេះ ដើម្បីធ្វើយ៉ាងណាឲ្យ CNRP មានភាពរឹងមាំឡើងវិញ ដើម្បីសង្គ្រោះប្រជាធិបតេយ្យនៅកម្ពុជាឲ្យរស់ឡើងវិញតែប៉ុណ្ណោះ។
សេចក្ដីថ្លែងការណ៍របស់អតីតគណបក្សសង្គ្រោះជាតិគាំទ្រលោកកឹមសុខា នៅថ្ងៃទី៣ ធ្នូ បានឲ្យដឹងថា “គណបក្សសង្គ្រោះជាតិបញ្ជាក់ថា ការសម្រេចរបស់សន្និសីទ នៅថ្ងៃទី២ ខែធ្នូ ឆ្នាំ២០១៨ នៅទីក្រុង Attanta សហរដ្ឋអាមេរិកដោយក្រុមគាំទ្រលោក សម រង្ស៊ី ដែលរុញលោក សម រង្ស៊ី ឲ្យធ្វើជាប្រធានស្ដីទីគណបក្សសង្គ្រោះជាតិនោះ គឺផ្ទុយទាំងស្រុងពីលក្ខន្តិកៈ គណបក្សសង្គ្រោះជាតិ និងមិនអាចយកជាការបានជាដាច់ខាត” ។
បក្សប្រឆាំងបញ្ជាក់ថា អ្នកដែលអាចក្លាយជាប្រធានស្តីទី គណបក្សសង្គ្រោះជាតិ បានមានចែងក្នុងប្រការ៤៥ ថ្មី នៃលក្ខន្តិកៈគណបក្សសង្គ្រោះជាតិ ដែលមានខ្លឹមសារជាអាទិ៍៖ នៅពេលអវត្តមានប្រធាន អនុប្រធានត្រូវបានទទួលសិទ្ធិ ជាប្រធានស្តីទី និងបើអវត្តមានអនុប្រធាន ការទទួលសិទ្ធិនេះត្រូវបានធ្វើទៅតាមឋានានុក្រមបន្តបន្ទាប់ ដែលមានចែងនៅក្នុងប្រការនេះ ។
ដូច្នេះមិនមានអ្នកណាក្រៅពីថ្នាក់ដឹកនាំក្នុងឋានានុក្រមបន្តបន្ទាប់នេះ មកធ្វើជាប្រធានស្ដីទីបានទេ ។ មានតែអង្គសមាជ ឬអង្គសន្និបាតគណបក្សដែលមានសមាជិកក្រុមប្រឹក្សាជាតិ របស់គណបក្សចូលរួមទេ ទើបអាចស្នេហ៍អ្នកផ្សេងៗ ចូលមកក្នុងឋានានុក្រមថ្នាក់ដឹកនាំបាន ។
ចំពោះការសម្រេចរបស់សន្និសីទនេះ មិនអាចចាប់បង្ខំ ឬតម្រូវឲ្យគណបក្សសង្គ្រោះជាតិ ឬគណៈកម្មាធិការអចិន្ត្រៃយ៍គណបក្ស ត្រូវតែធ្វើតាមនោះទេ ព្រោះអ្នកចូលរួមធ្វើសេចក្ដី សម្រេចនេះមិនមាននីតិសម្បទា ដែលមានសិទ្ធិជាអ្នកស្នើឲ្យ អ្នកសម្រេចជ្រើសរើស ឬជ្រើសតាំងប្រធានស្តីទីគណបក្សឡើយ ដូច្នេះសេចក្ដីសម្រេចនេះ គ្រាន់តែជាមតិយោបល់របស់មនុស្សមួយក្រុមតែប៉ុណ្ណោះ ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបញ្ជាក់ថា “ឧបាយកលប៉ុនប៉ងចង់ធ្វើឲ្យខ្មោចអតីតបក្សប្រឆាំងនេះរស់ឡើងវិញ គឺមិនអាចទៅរួចទាល់តែសោះ ហើយឧបាយកលចង់ប្រោះព្រំយកទណ្ឌិត សម រង្ស៊ី មកដឹកនាំអតីតបក្សនេះក៏អត់បានការដែរ” ។