នគរបាលម្នាក់មានអបីយ៍ជំនើឿលេបកាំបិត៤០ដើម ទីបំផុតរត់មកគ្រូពេទ្យវះកាត់ទាញយកកាំបិត ចេញពីក្រពះ

ឥណ្ឌា៖ មន្ត្រីនគរបាលឥណ្ឌាម្នាក់អាយុ ៤២ឆ្នាំម្នាក់នៅក្នុងរដ្ឋប៉ានចាប( Punjab) ប្រទេសឥណ្ឌា ត្រូវបានក្រុមគ្រូពេទ្យសង្គ្រោះជីវិតទាន់ពេលវេលា ដោយបានធ្វើការវះកាត់ទាញយកកាំបិតចំនួន ៤០ដើម ចេញពីក្នុងក្រពះដោយជោគជ័យ បន្ទាប់ពី បានលេបអាវុធមុខស្រួចទាំងនោះចូលទៅក្នុងខ្លួនជាបន្តបន្ទាប់អស់រយៈពេលប្រមាណ ២ខែ។ ព្រឹត្តិការណ៍ចំឡែកនេះបានកើតឡើងនៅក្នុង ខែសីហា ឆ្នាំ២០១៦ នៅក្រុង Amritsar រដ្ឋ Punjab ប្រទេសឥណ្ឌា។ 

មុនដំបូង អ្នកជំងឺរូបនេះបានចូលសម្រាកព្យាបាលនៅមន្ទីរពេទ្យក្នុងក្រុង Amritsar ដោយសារមានអាការៈឈឺពោះយ៉ាងខ្លាំង និងអស់កម្លាំងល្វើយ។ ក្នុងការពិនិត្យដំបូង ក្រុមគ្រូពេទ្យបានសង្ស័យថា លោកអាចមានដុំសាច់ ឬជំងឺមហារីក ប៉ុន្តែនៅពេលធ្វើការឆ្លុះក្រពះ និងថតស្កេន ទើបពួកគេរកឃើញលោហៈរឹងជាច្រើននៅខាងក្នុង។

អ្នកជំងឺបានសារភាពថា ខ្លួនបានលេបកាំបិតចំនួន ២៨ដើម។ ភ្លាមៗនោះ ក្រុមគ្រូពេទ្យវះកាត់បានប្រញាប់ប្រញាល់ធ្វើប្រតិបត្តិការវះកាត់សង្គ្រោះបន្ទាន់អស់រយៈពេលជិត ៥ម៉ោង។ បន្ទាប់ពីទាញយកកាំបិតគ្រប់ ២៨ដើមហើយ ក្រុមគ្រូពេទ្យបានធ្វើការពិនិត្យស្កេនលោហៈជាលើកចុងក្រោយ ដើម្បីប្រាកដថាគ្មានវត្ថុនៅសល់ ហើយក៏បានរកឃើញកាំបិតចំនួន ១២ដើមបន្ថែមទៀត សរុបទាំងអស់មានរហូតដល់ ៤០ដើម។

កាំបិតដែលត្រូវបានទាញយកមកនោះ មានខ្លះជាប្រភេទកាំបិតបត់ ខ្លះបើកមុខ ខ្លះមានស្ថានភាពចាប់ច្រែះ ឬបាក់ និងខ្លះទៀតមានប្រវែងរហូតដល់ជិត ១៨សង់ទីម៉ែត្រ។

ករណីយ៍នេះបើតាមការអះអាងរបស់អ្នកជំងឺឲ្យដឹងថា គាត់បានលេបកាំបិតដំបូងគេ ហើយបន្ទាប់មកក៏មានអារម្មណ៍ «ចូលចិត្តអារម្មណ៍ពេលលេប» រហូតក្លាយជាទម្លាប់។ លោកក៏បានលើកឡើងអំពី «អំណាចផ្លូវងងឹត/អរូបី» ដែលជំរុញឱ្យរូបលោកបន្តធ្វើសកម្មភាពនេះ។ ប៉ុន្តែសម្រាប់ក្រុមគ្រូពេទ្យវិញបានសន្និដ្ឋានថា នេះជាអាការៈនៃវិបត្តិផ្លូវចិត្ត ហើយបានរៀបចំផែនការផ្តល់ការព្យាបាល និងគាំទ្រផ្នែកចិត្តសាស្ត្រដល់រូបលោកជាបន្តមិនមែនរកគ្រូអបីយ៍ជំនឿមកដោះស្រាយទេ៕