សមត្ថកិច្ចឃាត់ខ្លួនបុរសម្នាក់បន្ទាប់ពីចាប់រំលោភកូនស្រីបង្កើតអាយុ១១ឆ្នាំ

ខេត្តកំពង់ស្ពឺ៖ ករណីរំលោភសេពសន្ថវៈមួយ បានកើតឡើងចំពោះកុមារីអាយុត្រឹមតែ ១១ឆ្នាំ ត្រូវបានកម្លាំងជំនាញចាត់វិធានការបង្ក្រាប និងឃាត់ខ្លួនជនសង្ស័យបានជាផ្លូវការហើយ នៅថ្ងៃទី២ ខែតុលា ឆ្នាំ២០២៦ នៅចំណុចភូមិរ៉ា សង្កាត់ត្រាចទង ក្រុងឧដុង្គម៉ែជ័យ ខេត្តកំពង់ស្ពឺ ។ 

ដោយមានការសម្របសម្រួលនីតិវិធីពីតំណាងអយ្យការអមសាលាដំបូងខេត្ដកំពង់ស្ពឺ កម្លាំងនគរបាល សហការជាមួយកម្លាំងកងរាជអាវុធហត្ថ និងកម្លាំងអធិការដ្ឋាននគរបាលក្រុងឧដុង្គម៉ែជ័យ ព្រមទាំងអាជ្ញាធរមូលដ្ឋានបានចុះអន្តរាគមន៍ឃាត់ខ្លួនជនសង្ស័យជាឪពុកបង្កើតដែលមានឈ្មោះ រឿន ទិត្យ ភេទប្រុស អាយុ ៤២ឆ្នាំ។

ក្មេងស្រីរងគ្រោះឈ្មោះ ទ ស ន អាយុ ១១ឆ្នាំ បានបញ្ជាក់ឱ្យដឹងថា សកម្មភាពឃោឃៅដែលឪពុកបង្កើតបានធ្វើមកលើរូបនាងគឺកើតមានឡើងជាច្រើនលើកច្រើនសារ នៅអំឡុងខែមិថុនារហូតមកដល់បច្ចុប្បន្ន ដោយធ្វើសកម្មភាពពេលដែលម្ដាយនិងយាយមិននៅផ្ទះ។

ជនសង្ស័យក៏បានប្រើប្រាស់ពាក្យសម្ដីគំរាមកំហែងសម្លាប់បំបិទមាត់ផងដែរ ។មុនពេលដែលរឿងរ៉ាវនេះធ្លាយលេចឮ ដោយរូបនាងបានរត់គេចខ្លួនទៅពឹងពាក់ជីដូននៅខេត្តតាកែវ ទើបធ្លាយរឿងរ៉ាវដ៏ឈឺចាប់នេះ តាមបណ្តាញសង្គម។

ប្រភពព័ត៌មានពីសមត្តកិច្ចក៏បានបញ្ជាក់បន្ថែមថា ជនសង្ស័យរូបនេះធ្លាប់មានប្រវត្តិជាប់ពន្ធនាគារចំនួន ២ដងរួចមកហើយ មុននឹងមកប្រព្រឹត្តអំពើដ៏ឃោរឃៅលើកុមារីរងគ្រោះជាកូនបង្កើតខ្លួនឯងបែបនេះបន្តទៀត។បច្ចុប្បន្ន ជនសង្ស័យខាងលើត្រូវបានកម្លាំងសមត្ថកិច្ចជំនាញធ្វើការសាកសួរ និងកសាងសំណុំរឿងដើម្បីបញ្ជូនបន្តអនុវត្តតាមនីតិវិធីច្បាប់យ៉ាងតឹងរ៉ឹងបំផុត៕