កម្ពុជាដាក់ចេញវិធានទាក់ទាញភ្ញៀវទេសចរណ៍សម្រាប់ឆ្នាំ២០២៤ក្នុងពេលថៃថាឆ្នាំ២០២៣នឹងមានភ្ញៀវទេសចរបរទេសមកកើនដល់៣០លាននាក់
25-December-2024 / សេដ្ឋកិច្ច
សៀមរាប៖ក្នុងពេលដែលថៃប្រកាសថាគេទទួលបានភ្ញៀវទេសចរណ៍រហូតដល់២៣លាននាក់នៅកម្ពុជាសម្តេចធិបតី ហ៊ុន ម៉ាណែត បានថ្លែងពីបញ្ហាទាក់ទាញភ្ញៀវទេសចរណ៍ថា៖ «ក្នុងគោលនយោបាយដែលយើងបានដាក់ចេញនោះ គឺទី១ រៀបចំយន្តកាលក្នុងការអនុវត្តដែលរៀបចំនូវក្រុមប្រឹក្សាទេសចរណ៍មួយជាបន្ទាន់ដើម្បីដែលជាតួអង្គរៀបចំចេញពីផែនការសកម្មភាព ដឹកនាំអនុវត្តន៍ និងការដាក់ចេញជាវិធានការជួយលើកទឹកចិត្តប្រតិបត្តិករវិស័យឯកជន ក្នុងខេត្តសៀមរាប តាមរយៈយន្តកាលជួយលើពន្ធ លើកទឹកចិត្តផ្សេងៗ ការត្រៀមផ្តល់ហិរញ្ញប្បទាន ដែលមានការប្រាក់សមរម្យមួយចំនួន សម្រាប់ប្រតិបត្តិករក្នុងវិស័យទេសចរណ៍»។
ក្នុងពិធីសម្ពោធដាក់ឱ្យដំណើរការជាផ្លូវការនូវអាកាសយានដ្ឋានអន្តរជាតិសៀមរាបអង្គរ (SAI) នាព្រឹកថ្ងៃទី១៦ ខែវិច្ឆិកា ឆ្នាំ២០២៣សម្តេចធិបតី ហ៊ុន ម៉ាណែត បានថ្លែងឲ្យដឹងថា នៅក្នុងកិច្ចប្រជុំរបស់សម្ដេចធិបតីជាមួយថ្នាក់ដឹកនាំអាស៊ាន ភាគីកម្ពុជាបានចរចាតភ្ជាប់ជើងហោះហើរជាមួយតំបន់ទេសចរណ៍នៃបណ្ដាប្រទេសអាស៊ាន ដូចជា វៀតណាម (ដាណាង) ឡាវ ហ្វីលីពីន (សេប៊ូ) ថៃ (ភូកេត) ដើម្បីបង្កើនការហោះហើរត្រង់មកកាន់កម្ពុជា ហើយនៅឆ្នាំ២០២៤នេះ កម្ពុជាសង្ឃឹមថានឹងសម្រេចនូវកិច្ចការតភ្ជាប់ជើងហោះហើរត្រង់នេះ។
សម្តេចធិបតី ឲ្យដឹងថា «ខ្ញុំក៏សូមផ្តល់ជូនដំណឹងផងដែរ អគ្គនាយកដ្ឋានអន្តោប្រវេសន៍របស់កម្ពុជា បានរៀបចំអនុវត្តគម្រោងថ្មីមួយ ពាក់ព័ន្ធនឹង E-Arrival ដើម្បីទីមួយ ជួយសម្រួលក្នុងការធ្វើឲ្យមានភាពសាមញ្ញក្នុងការបំពេញឯកសារ ជា Custom និងអន្តោប្រវេសន៍ ហើយទីពីរ កាត់បន្ថយការប្រើប្រាស់ក្រដាស ទៅជាការប្រើប្រព័ន្ធបច្ចេកវិទ្យាអេឡិចត្រូនិច។ អញ្ចឹង ភ្ញៀវដែលមកទីនេះមិនបាច់ឆ្លងកាត់ការបំពេញទម្រង់ទេ ដើម្បីងាយស្រួល។ គម្រោងនេះ ដែលត្រូវធ្វើឲ្យចប់ចុងឆ្នាំ២០២៣ នឹងត្រូវអនុវត្តជាគម្រោងគម្រូ Pilot Project នៅព្រលានយន្តហោះខេត្តសៀមរាបមុនគេ នៅឆ្នាំ២០២៤»។
សម្តេចធិបតី ហ៊ុន ម៉ាណែត បានថ្លែងថា ឆ្នាំ២០២៤ ជាឆ្នាំនៃការផ្លាស់ប្តូរទំនាក់ទំនងប្រជាជនកម្ពុជា-ចិន ដូច្នេះនឹងមានការចូលមកទេសចរណ៍ច្រើនពីប្រជាពលរដ្ឋចិន។ សម្តេចធិបតី បានប្រកាសស្វាគមន៍យ៉ាងកក់ក្តៅដល់ប្រជាពលរដ្ឋចិន មកទស្សនាកម្ពុជា។សម្តេចធិបតី ក៏បានណែនាំដល់អាជ្ញាធរខេត្តសៀមរាប ខិតខំធានាសន្តិសុខ សណ្តាប់ធ្នាប់នៅតំបន់ជុំវិញអាកាសយានដ្ឋានអន្តរជាតិសៀមរាប-អង្គរ។ សម្តេចធិបតី ហ៊ុន ម៉ាណែត បានថ្លែងថា ការដាក់ឱ្យប្រើប្រាស់ព្រលានយន្តហោះ និងការដាក់ចេញយុទ្ធសាស្ត្រ «ទស្សនាសៀមរាប ឆ្នាំ២០២៤» គឺជាការជួយស្រោចស្រង់ទេសចរណ៍នៅសៀមរាបឡើងវិញ។ សម្តេចធិបតី បានថ្លែងបន្តថា អាកាសយានដ្ឋានអន្តរជាតិសៀមរាបអង្គរ នឹងក្លាយជាកាលានុវត្តភាពប្រកបដោយសក្តានុពលដ៏ខ្លាំងក្លា និងសំខាន់សម្រាប់វិស័យទេសចរណ៍ខេត្តសៀមរាប ដែលជាគោលដៅទេសចរណ៍ដ៏សំខាន់របស់កម្ពុជានិយាយដោយឡែក ព្រមទាំងវិស័យទេសចរណ៍ និងវិស័យសេដ្ឋកិច្ចនៅទូទាំងប្រទេសនិយាយជារួម។
សម្ដេចធិបតីបានបញ្ជាក់ថា ចំពោះកិច្ចការពង្រីកវិសាលភាពការប្រើប្រាស់បណ្ណព្រំដែន ក្រសួងមហាផ្ទៃកំពុងធ្វើការជាមួយភាគីថៃ ដើម្បីជួយសម្រួលទេសចរនិងប្រជាពលរដ្ឋថៃដែលមកពីខេត្តជាប់ព្រំដែន អាចធ្វើដំណើរមកកាន់ខេត្តសៀមរាបបាន ដោយមិនចាំបាច់ប្រើប្រាស់លិខិតឆ្លងដែន។ក្រៅពីនេះ ក៏នៅមានការរៀបចំព្រឹត្តិការណ៍ផ្សេងៗនៅក្នុងខេត្តសៀមរាប ដូចជាកីឡារត់ម៉ារ៉ាតុង កិច្ចប្រជុំកំពូលធំៗ ពិធីបុណ្យជាតិទៀតដែរ។
សម្ដេចធិបតីនាយករដ្ឋមន្ត្រីកម្ពុជាក៏បានលើកទឹកចិត្តដល់រដ្ឋបាលខេត្តយូណាន ប្រទេសចិន សូមចូលរួមរៀបចំព្រឹត្តិការណទេសចរណ៍នានានៅខេត្តសៀមរាប ឬរៀបចំកញ្ចប់ទស្សនកិច្ចទេសចរណ៍ឱ្យបានច្រើនមកកាន់ខេត្តសៀមរាប ព្រោះជាខេត្តសៀមរាបនិងខេត្តយូណានជាខេត្តសម្ពន្ធមេត្រីភាពនឹងគ្នាស្រាប់។សម្ដេចធិបតីបានបន្ថែមថា ប្រសិនបើមានតែព្រលានយន្តហោះ អត់មានកម្មវិធីជួយឱ្យទេសចរមកទេ ក៏មិនចំណេញដែរ ទេសចរមកច្រើនហើយ តែខ្វះសេវាកម្មគុណភាព ខ្វះហេដ្ឋារចនាសម្ពន្ធគាំទ្រ ក៏ទេសចរគេមិនសប្បាយចិត្តដែរ ដូច្នេះស្នើឱ្យវិស័យឯកជនពង្រឹងសេវាកម្មទេសចរណ៍ឱ្យបានល្អ។
សូមបញ្ជាក់ថា ចំនួនភ្ញៀវបរទេសមកប្រទេសថៃ បានកើនលើសចំនួន ២៣លាននាក់ ដែលបង្កើតប្រាក់ចំណូលប្រហែល ៩៨១,៦៩ពាន់លានបាត (២៧,៦៥ពាន់លានដុល្លារ)។ប្រភពពីក្រសួងទេសចរណ៍ និងកីឡា របស់ថៃ បានឲ្យដឹងថា ម៉ាឡេស៊ីឈរនៅលំដាប់កំពូលក្នុងបញ្ជីភ្ញៀវបរទេសដែលមកប្រទេសថៃ មានជាង ៣,៨២លាននាក់ បន្ទាប់មកប្រទេសចិន ជាង ២,៩លាននាក់, សាធារណរដ្ឋកូរ៉េ ជាង ១,៣៧លាននាក់, ឥណ្ឌា ជាង ១,៣៥លាននាក់ និងរុស្ស៊ី ជាង ១,១៧លាននាក់។
លោកស្រី Sudawan Wangsuphakijkosol រដ្ឋមន្ត្រីក្រសួងទេសចរណ៍ និងកីឡាថៃ បាននិយាយថាលោកស្រីរំពឹងថា នឹងមានទេសចរបរទេសកាន់តែច្រើនឡើងនៅលើដីថៃនៅសប្តាហ៍ក្រោយ ដោយសារចំនួនជើងហោះហើរកាន់តែច្រើន និងរដូវរងារ នៅក្នុងប្រទេសរបស់ពួកគេ។លោកស្រី Sudawan បានអះអាងថា ការលើកលែងតម្លៃទិដ្ឋាការសម្រាប់ភ្ញៀវទេសចរមកពីប្រទេសចិន កាហ្សាក់ស្ថាន និងឥណ្ឌា ក៏ដូចជាការអនុគ្រោះទិដ្ឋាការរយៈពេលវែងសម្រាប់ជនជាតិរុស្សី នឹងរួមចំណែកដល់ចំនួនភ្ញៀវទេសចរកាន់តែច្រើនមកកាន់ប្រទេសថៃនៅមុនដំណាច់ឆ្នាំនេះ។
លោក សេដ្ឋា ថាវីស៊ី នាយករដ្ឋមន្ត្រីថៃ បានលើកឡើងនាពេលកន្លងទៅនេះ ថា ចំនួនភ្ញៀវទេសចរអន្តរជាតិមកទស្សនាប្រទេសថៃ នឹងកើនលើស ៣០លាននាក់នៅឆ្នាំ ២០២៣នេះ។សូមជម្រាបថា ក្នុងឱកាសដែលសម្តេចបានអញ្ជើញជាអធិបតីនៃវេទិកា «រាជរដ្ឋាភិបាល -ផ្នែក ឯក ជន» លើកទី១៩ កាលពីថ្ងៃទី១៣ ខែវិច្ឆិកា ឆ្នាំ២០២៣ថ្មីៗនេះ សម្តេចធិបតី ហ៊ុន ម៉ាណែត បានបញ្ជាក់ថា រាជរដ្ឋាភិបាលបានសម្រេចផ្តល់កម្ចីដល់ប្រតិបត្តិករទេសចរណ៍នៅខេត្តសៀមរាប ចំនួន ៥០លានដុល្លារ ជាមួយនឹងអត្រាការប្រាក់សមរម្យ និងលក្ខខណ្ឌអនុគ្រោះផ្សេងទៀត ដើម្បីធានាអនុញ្ញាតឱ្យប្រតិបត្តិករទេសចរណ៍អាចទទួលបាននូវហិរញ្ញប្បទាន និងចំនួនទឹកប្រាក់សមរម្យតាមប្រភេទអាជីវកម្ម។
