លោកឧបនាយករដ្ឋមន្ត្រី អូន ព័ន្ធមុនីរ័ត្នសសើរ វិស័យមូលបត្រ ដែលដើរតួនាទីយ៉ាងសំខាន់ក្នុងការកៀរគរធនធានហិរញ្ញវត្ថុដែលនៅរាយប៉ាយចូលក្នុងសកម្មភាពសេដ្ឋកិច្ច

ភ្នំពេញ៖ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) បានគូសបញ្ជាក់ថា វិស័យមូលបត្រកំពុងក្លាយជាប្រភពហិរញ្ញប្បទានដ៏សំខាន់ សម្រាប់កៀរគរមូលធនក្នុងស្រុក បញ្ជូនចរន្តសាច់ប្រាក់ទៅកាន់វិស័យផលិតកម្ម សេវាកម្ម និងអាជីវកម្ម ដើម្បីជំរុញកំណើនសេដ្ឋកិច្ច បង្កើតការងារ និងគាំទ្រការអភិវឌ្ឍប្រកបដោយចីរភាព។ 

ថ្លែងក្នុងវេទិកាផ្សព្វផ្សាយសមិទ្ធផលអាណត្តិទី១ របស់អាជ្ញាធរសេវាហិរញ្ញវត្ថុមិនមែនធនាគារ និងសន្និសីទមូលបត្រប្រចាំឆ្នាំ២០២៦ ដែលរៀបចំឡើងនៅថ្ងៃទី២៩ ខែកញ្ញា ឆ្នាំ២០២៦លោកអគ្គបណ្ឌិតសភាចារ្យ អូន ព័ន្ធមុនីរ័ត្ន បានអះអាងថា វិស័យមូលបត្រមានតួនាទីបំពេញបន្ថែមដល់ប្រព័ន្ធធនាគារ ដោយផ្តល់ជាប្រភពទុនរយៈពេលវែង និងមានចីរភាព សម្រាប់ក្រុមហ៊ុន សហគ្រាស និងស្ថាប័ននានា ក្នុងការកៀរគរទុន ដើម្បីពង្រីកអាជីវកម្ម និងអនុវត្តផែនការវិនិយោគរបស់ខ្លួន។

លោកឧបនាយករដ្ឋមន្ត្រី បានបញ្ជាក់ថា ខុសពីការផ្តល់ឥណទានតាមប្រព័ន្ធធនាគារ គឺអតិថិជនអាចខ្ចីយកទៅប្រើប្រាស់តាមគោលដៅនានាផ្សេងៗ រាប់ទាំងការធ្វើអាជីវកម្ម ប៉ុន្តែសម្រាប់ទីផ្សារមូលបត្រពឹងផ្អែកលើតម្លាភាព កេរ្តិ៍ឈ្មោះ និងប្រសិទ្ធភាពនៃការគ្រប់គ្រងអាជីវកម្ម ដើម្បីទាក់ទាញវិនិយោគិន និងកៀរគរមូលធនយកទៅវិនិយោគដោយត្រង់ចូលក្នុងសកម្ម ភាពផលិតកម្ម និងសេវាកម្ម ដែលជាកត្តាជំរុញកំណើនសេដ្ឋកិច្ចជាតិ។

ក្រៅពីការគាំទ្រដល់វិស័យអាជីវកម្ម លោកអគ្គបណ្ឌិតសភាចារ្យ ក៏បានលើកឡើងពីតួនាទីរបស់ទីផ្សារមូលបត្រ ក្នុងការជំរុញសេដ្ឋកិច្ចបៃតង និងការអភិវឌ្ឍប្រកបដោយចីរភាព។

លោកបានកត់សម្គាល់ថា កម្ពុជាបានចាប់ផ្តើមមើលឃើញសញ្ញាវិជ្ជមានពីការបោះផ្សាយសញ្ញាបណ្ណបៃតង (Green Bonds) និងសញ្ញាបណ្ណចីរភាព (Sustainability Bonds) ដែលជាយន្តការហិរញ្ញប្បទានសម្រាប់គម្រោងគាំទ្របរិស្ថាន និងការអភិវឌ្ឍរយៈពេលវែង។

សូមបញ្ជាក់ថាបើតាមទិន្នន័យបង្ហាញថា ទីផ្សារមូលបត្រកម្ពុជាបន្តមានកំណើនគួរឱ្យកត់សម្គាល់។ ក្នុងរយៈពេល៥ឆ្នាំចុងក្រោយ ទំហំមូលធនូបនីយកម្មទីផ្សារបានកើនជាមធ្យមប្រមាណ ១៦,៧% ក្នុងមួយឆ្នាំ។ ចំណែកការបោះផ្សាយសញ្ញាបណ្ណបៃតង និងសញ្ញាបណ្ណចីរភាព មានទំហំសរុបប្រមាណ ៨០លានដុល្លារអាម៉េរិក ខណៈសញ្ញាបណ្ណចីរភាពថ្មីមួយ ដែលមានបុគ្គលធានា ត្រូវបានចុះបញ្ជីនៅផ្សារមូលបត្រកម្ពុជា និងអាចកៀរគរមូលធនបានប្រមាណ ២០លានដុល្លារអាម៉េរិក ដោយអនុលោមតាមស្តង់ដារអន្តរជាតិ។

ដោយឡែក ចំនួនវិនិយោគិនក្នុងទីផ្សារមូលបត្រក៏បន្តកើនឡើងផងដែរ ដោយលេខអត្តសញ្ញាណវិនិយោគិន (Investor ID) បានកើនដល់ ៧៦៦៩៦លេខ ខណៈទំហំនៃការជួញដូរភាគហ៊ុនជាមធ្យម បានលើសពី ៣លានដុល្លារអាម៉េរិកក្នុងមួយថ្ងៃ។

គិតត្រឹមខែកញ្ញា ឆ្នាំ២០២៦ កម្ពុជា មានក្រុមហ៊ុនចុះបញ្ជីសរុបចំនួន២៨ ក្នុងទីផ្សារមូលបត្រ ដែលរួមមានទាំងមូលបត្រកម្មសិទ្ធិ និងមូលបត្របំណុល ដោយសាច់ប្រាក់ដែលប្រមូលបានតាមយន្តការចុះបញ្ជីក្នុងទីផ្សារ ត្រូវបានរំពឹងថានឹងឈានដល់ ១ពាន់លានដុល្លារអាម៉េរិកនៅចុងឆ្នាំ២០១៦នេះ៕