វត្តមាននាយករដ្ឋមន្ត្រីថៃនៅអានសេះជាការប៉ុនប៉ងអះអាងទាមទារខុសច្បាប់លើដែនអធិបតេយ្យរបស់កម្ពុជា

ឧត្តមានជ័យ៖កម្ពុជាចាត់ទុកដំណើរទស្សនកិច្ចដោយគ្មានការអនុញ្ញាតរបស់នាយករដ្ឋមន្ដ្រីថៃចូលក្នុងដែនអធិបតេយ្យកម្ពុជា គឺជាការប៉ុនប៉ងដោយចេតនាដើម្បីអះអាងការទាមទារខុសច្បាប់លើដែនអធិបតេយ្យរបស់កម្ពុជា ដែលជាតំបន់មួយត្រូវបានកងកម្លាំងប្រដាប់អាវុធថៃកាន់កាប់ដោយខុសច្បាប់ចាប់តាំងពីឆ្នាំមុនមក។

នៅក្នុងសេចក្ដីប្រកាសព័ត៌មានរបស់ក្រសួងការបរទេសកម្ពុជា ចេញនៅថ្ងៃទី២៥ ខែសីហា ឆ្នាំ២០២៦ បានឲ្យដឹងថា៖ នាយករដ្ឋមន្ដ្រីថៃបានធ្វើទស្សនកិច្ចទៅកាន់តំបន់អានសេះ ស្ថិតក្នុងស្រុកជាំក្សាន្ដ ខេត្ដព្រះវិហារ កាលពីថ្ងៃទី២៣ ខែសីហា ឆ្នាំ២០២៦។ កម្ពុជាតាមរយៈក្រសួងការបរទេសបានបញ្ជាក់ថា ការកាន់កាប់ដោយខុសច្បាប់លើដែនអធិបតេយ្យកម្ពុជា មិនអាចធ្វើឱ្យមានភាពស្របច្បាប់តាមរយៈការធ្វើទស្សនកិច្ចរបស់នាយករដ្ឋមន្ដ្រីថៃដាច់ខាត។

ទស្សនកិច្ចនេះគឺស្មើនឹងការរំលោភបំពានយ៉ាងធ្ងន់ធ្ងរលើដែនដីអធិបតេយ្យរបស់កម្ពុជា ដូចដែលបានកំណត់ និងខណ្ឌសីមាដោយផែនទីខ្នាត១:២០០,០០០ ដែលផលិតដោយគណៈកម្មការកំណត់ព្រំដែនរវាងឥណ្ឌូចិននិងសៀម។ ម្យ៉ាងវិញទៀត វាក៏បំពានដល់ចំណុចទី១នៃសេចក្ដីប្រកាសរួមនៃកិច្ចប្រជុំពិសេសលើកទី៣របស់គណៈកម្មាធិការព្រំដែនទូទៅ(GBC) កាលពីថ្ងៃទី២៧ ខែធ្នូ ឆ្នាំ២០២៥ ដែលបានហាមឃាត់យ៉ាងច្បាស់នូវសកម្មភាពបង្កហេតុដែលអាចបង្កើនភាពតាមតឹងតាមបណ្ដោយព្រំដែន។

កម្ពុជាបញ្ជាក់ដែរថា ទាំងផែនទីដែលគូសដោយឯកតោភាគី ឬដំណើរទស្សនកិច្ចណាមួយដែលផ្អែកលើផែនទីបែបនេះ មិនអាចផ្លាស់ប្ដូរខ្សែព្រំដែនដែលទទួលស្គាល់ជាអន្ដរជាតិបានឡើយ។ កម្ពុជាមិនទទួលស្គាល់ដាច់ខាតនូវខ្សែបន្ទាត់ព្រំដែន ឬការទាមទារទឹកដីជាឯកតោភាគីដោយប្រទេសថៃ។ ដំណើរទស្សនកិច្ចនេះក៏មិនប៉ះពាល់ដល់សិទ្ធិស្របច្បាប់ ឬជំហររបស់កម្ពុជាទាក់ទងនឹងព្រំដែនអន្ដរជាតិរបស់ខ្លួនដែរ។ កម្ពុជាទាមទារឱ្យថៃបញ្ឈប់សកម្មភាពបែបនេះនៅក្នុងតំបន់ដែលបានរៀបរាប់ ក៏ដូចជាតំបន់ផ្សេងទៀតដែលត្រូវបានកងកម្លាំងប្រដាប់អាវុធថៃកាន់កាប់ដោយខុសច្បាប់តាំងពីឆ្នាំមុន ដើម្បីបន្ធូរបន្ថយស្ថានការណ៍ សម្រួលដល់ការដោះស្រាយជម្លោះដោយសន្ដិវិធី សំដៅស្ដារសន្ដិភាព ស្ថិរភាព និងទំនាក់ទំនងភាពជាអ្នកជិតខាងល្អនៅតាមបណ្ដោយព្រំដែនកម្ពុជា-ថៃ៕​