កងទព៏ជើងទឹកថៃ ចាប់បានគ្រាប់រំសេវរាប់ម៉ឺនគ្រាប់ នៅលើផ្ទៃទឹក ខេត្តត្រាត

ប្រទេសថៃ៖កងល្បាតជើងទឹកទី៣ នៃប្រទេសថៃ បានចេញប្រតិបត្តិការ ស្ទាក់ចាប់ការរត់ពន្ធអាវុធនិងគ្រាប់រំសេវ ដោយរឹបអូសបានគ្រាប់ជាង ២០ ០០០ គ្រាប់ និងចាប់ខ្លួនជនសង្ស័យ ៣ នាក់។អាជ្ញាធរថៃ បានដេញតាមជនសង្ស័យនៅលើសមុទ្រពីកោះឆាង មុនពេលចាប់ខ្លួនពួកគេនៅកំពង់ផែ រួមជាមួយអាវុធ គ្រាប់រំសេវ និងទំនិញខុសច្បាប់ មួយចំនួនធំនៅ ល្ងាច ថ្ងៃទីសុក្រ ទី២១ ខែសីហា ឆ្នាំ២០២៦ ។ 

កងទ័ពជើងទឹកថៃ បញ្ជាក់ថា ទូកគួរឲ្យសង្ស័យមួយគ្រឿង កំពុងបើកយ៉ាងលឿន ហើយក្រុមមន្ត្រីបានដេញតាមទូកនោះយ៉ាងប្រកៀក។ លុះមកដល់ម៉ោង ៦:២៦ ល្ងាច ទូកក៏បានចូលចតនៅកំពង់ផែឌីរេក ក្នុងឃុំខ្នងយ៉ៃ នៃខេត្តត្រាត ជាកន្លែងដែលមន្ត្រី ចូលទៅចាប់ខ្លួនអ្នកដំណើរទាំងនោះភ្លាមៗ។ 

តាមការបញ្ជាក់នៅកន្លែងកើតហេតុ មានជនសង្ស័យ៣នាក់ ហើយកងម៉ារីនបានធ្វើការត្រួត ដោយរកឃើញសម្ភារៈយោធា និងគ្រាប់រំសេវជាច្រើនប្រភេទ។ កម្លាំងកងម៉ារីន បានរកឃើញ ឧបករណ៍យោធាពីរមុខ គ្រាប់រំសេវជាង ២១ ៣០០ គ្រាប់និងមានប្រភេទផ្សេងៗគ្នា ហើយលើសពីនេះ រថយន្ត SUV ពណ៌ក្រហមមួយគ្រឿង ដែលពាក់ស្លាកលេខត្រាត ចតនៅកំពង់ផែ ក៏ត្រូវបានរឹបអូសសម្រាប់ការស៊ើបអង្កេតបន្ថែមផងដែរ។

ក្រោយមក វេលាម៉ោង ៩យប់ ជនសង្ស័យនិងវត្ថុតាង ក៏ត្រូវប្រគល់ទៅឲ្យមន្ត្រីស៊ើបអង្កេត ដើម្បីចោទប្រកាន់តាមច្បាប់ ពីបទកាន់កាប់ និងរត់ពន្ធអាវុធចូលមកក្នុងប្រទេសថៃ។

តាមពិតទៅ ជនសង្ស័យទាំងអស់មានគ្នា ៤នាក់ឯណោះ ប៉ុន្តែមុនពេលចាប់ខ្លួន មានជនសង្ស័យម្នាក់បានលោតចូលទឹក ហើយគេចខ្លួនបាត់ ចោល៣នាក់ទៀត ដែលត្រូវចាប់បាន សុទ្ធសឹងជាជនជាតិថៃរស់នៅលើកោះគុត និងរស់នៅក្នុងខេត្តត្រាត។ 

សូមជម្រាបថា អាវុធនិងគ្រាប់រំសេវ ដែលសមត្ថកិច្ចថៃរឹបអូសបានរួមមាន កាំភ្លើងអាកា 47 ចំនួនពីរដើម, គ្រាប់កាំភ្លើងប្រភេទ 7.63 មិល្លីម៉ែត្រពណ៌ខៀវ ៧០០ គ្រាប់ និង ១២ ប្រអប់, ប្រភេទគ្រាប់ 12,7 មិល្លីម៉ែត្រចំនួន ៩ ប្រអប់ ស្មើនឹង ៧៦៥ គ្រាប់, គ្រាប់កាំភ្លើងប្រភេទ 7,62 មិល្លីម៉ែត្រពណ៌ក្រហម ចំនួន ១៧ ប្រអប់ស្មើនឹង ១២.២៤៤ គ្រាប់ និងបង់កាំភ្លើងប្រភេទអាកា 47 ចំនួន ១០២ បង់ ។

តាមចម្លើយសារភាព, ជនសង្ស័យទាំង៣នាក់ គឺទទួលបានប្រាក់ថ្លៃឈ្នួលក្នុងម្នាក់ៗ ៤ ០០០ បាត ពីឈ្មោះម្លិះ ដែលជាអ្នកជួលឲ្យដឹកគ្រាប់រំសេវនេះ ចូលទៅកាន់ចំណតកំពង់ផែក្នុងខេត្តត្រាត ៕