ម៉ាឡេស៊ីនឹង បន្តផ្តល់វគ្គបណ្តុះបណ្តាលដល់កម្ពុជា និងពិនិត្យកិច្ចសហប្រតិបត្តិការ ដែលពាក់ព័ន្ធ នឹងប្រតិបត្តិការរក្សាសន្តិភាពបន្ថែមលើកិច្ចសហប្រតិបត្តិការសេដ្ឋកិច្ច
ភ្នំពេញ៖ ឯកឧត្តម ដាតុ ស្រ៊ី ម៉ូហាមេត ខាលីត ប៊ីនណូឌីន (YB. DATO' SERI MOHAMED KHALED BIN NORDIN ) រដ្ឋមន្ត្រីការពារជាតិម៉ាឡេស៊ី បានបញ្ជាក់អំពីការប្តេជ្ញាចិត្តរបស់ម៉ាឡេស៊ី ក្នុងការបន្តផ្តល់វគ្គបណ្តុះបណ្តាលដល់កម្ពុជា និងពិនិត្យលទ្ធភាពស្វែងរកកិច្ចសហប្រតិបត្តិការ ដែលពាក់ព័ន្ធ នឹងប្រតិបត្តិការរក្សាសន្តិភាព, ការឆ្លើយតបនឹងបញ្ហាសន្តិសុខមិនមែនប្រពៃណី, សន្តិសុខលំហសមុទ្រ និងការអភិវឌ្ឍសមត្ថភាពលើបច្ចេកវិទ្យាបញ្ញាសិប្បនិម្មិត (AI) ក្នុងវិស័យការពារជាតិ។ ការលើកឡើងនេះក្នុងឱកាសដែល បានអនុញ្ញាតឯកឧត្តម ដាតុ ស្រ៊ី ម៉ូហាមេត ខាលីត ប៊ីនណូឌីន (YB. DATO' SERI MOHAMED KHALED BIN NORDIN ) រដ្ឋមន្ត្រីក្រសួងការពារជាតិម៉ាឡេសុី ចូលជួបសម្តែងការគួរសម និងពិភាក្សាការងារ នេះ ។
ក្នុងឱកាសចូលជួបសំដែងការគួសមនិងពិភាក្សាជមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានៅវិមានសន្តិភាព រាជធានីភ្នំពេញ នាព្រឹកថ្ងៃសុក្រ ទី៧ សីហា ២០២៦ ឯកឧត្ដមរដ្ឋមន្ត្រីការពារជាតិម៉ាឡេស៊ី បានសម្ដែងនូវការវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អប្រសើររវាងប្រទេសទាំងពីរ ដោយបានគូសបញ្ជាក់ថា កម្ពុជាគឺជាមិត្តដ៏ជិតស្និទ និងគួរឱ្យទុកចិត្ត។ ឯកឧត្ដមបានបន្តថា ដំណើរទស្សនកិច្ចរបស់ឯកឧត្តមនាពេលនេះ នឹងចូលរួមចំណែកកាន់តែសំខាន់ដល់ការពង្រឹងទំនាក់ទំនងទ្វេភាគី និងប្រែក្លាយការប្ដេជ្ញាចិត្តឱ្យទៅជាសកម្មភាពជាក់ស្ដែង សំដៅបន្តពូនជ្រំកិច្ចសហប្រតិបត្តិការម៉ាឡេស៊ី-កម្ពុជាឱ្យកាន់តែស៊ីជម្រៅ ជាពិសេសលើវិស័យការពារជាតិ។
សម្ដេចធិបតី បានសម្ដែងនូវការស្វាគមន៍ និងការពេញចិត្តចំពោះវឌ្ឍនភាពនៃទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ព្រមទាំងបានវាយតម្លៃខ្ពស់ចំពោះសមិទ្ធផលជាច្រើន នៃកិច្ចសហ ប្រតិបត្តិ ការ រវាងប្រទេសទាំងពីរ ដែលសម្រេចបានកន្លងមក ជាពិសេសក្នុងវិស័យការពារជាតិ។
សម្ដេចធិបតី បានគូសបញ្ជាក់ថា រាជរដ្ឋាភិបាលកម្ពុជានឹងបន្តគាំទ្រចំពោះការពង្រឹង និងពង្រីកកិច្ចសហប្រតិបត្តិការរវាងក្រសួងការពារជាតិនៃប្រទេសទាំងពីរ។ សម្ដេចធិបតី ក៏បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលម៉ាឡេស៊ី ដែលបានចូលរួមយ៉ាងសកម្មក្នុងការសម្របសម្រួលបទឈប់បាញ់រវាងកម្ពុជា និងថៃ នាពេលកន្លងមក ព្រមទាំងការដឹកនាំ និងបន្តចូលរួមយ៉ាងសំខាន់ក្នុងយន្តការក្រុមអ្នកសង្កេតការណ៍អាស៊ាន (AOT) នៅកម្ពុជា។ សម្តេចធិបតី ក៏បានលើកទឹកចិត្តឱ្យក្រសួងការពារជាតិនៃប្រទេសទាំងពីរ បន្តជំរុញកិច្ចសហប្រតិបត្តិការនេះឱ្យកាន់តែស៊ីជម្រៅ និងស្អិតរមួតបន្ថែមទៀត។ បន្ថែម ពីនេះសម្តេចធិបតី និងឯកឧត្ដមរដ្ឋមន្ត្រីការពារជាតិម៉ាឡេស៊ី ក៏បានពិភាក្សា និងផ្លាស់ប្ដូរយោបល់គ្នាអំពីបញ្ហាតំបន់ និងអន្តរជាតិមួយចំនួនផងដែរ។
សម្តេចធិបតី បានជម្រាបជូនឯកឧត្ដមរដ្ឋមន្ត្រីការពារជាតិម៉ាឡេស៊ី អំពីការវិវត្តថ្មីៗនៃស្ថានការណ៍ព្រំដែនកម្ពុជា-ថៃ ដោយបានសង្កត់ធ្ងន់អំពីការប្ដេជ្ញាចិត្ត និងជំហររបស់កម្ពុជា ក្នុងការបន្តប្រកាន់យកយន្តការដោះស្រាយបញ្ហាព្រំដែនដោយសន្តិវិធី ដោយផ្អែកលើច្បាប់អន្តរជាតិ និងអនុលោមតាមអនុសញ្ញា សន្ធិសញ្ញា និងកិច្ចព្រមព្រៀងនានាដែលមានស្រាប់រវាងប្រទេសទាំងពីរ។
សូមបញ្ជាក់ថាតាំងពីកម្ពុជានិងប្រទេសថៃមានបញ្ហាហើយព្រុំដែនត្រូវបានបិទកម្ពុជា និងម៉ាឡេស៊ី បានបានឯកភាពពង្រឹងកិច្ចសហប្រតិបត្តិការសេដ្ឋកិច្ច តាមរយៈការពង្រីកពាណិជ្ជកម្ម និងការវិនិយោគក្នុងវិស័យផលិតកម្ម កែច្នៃម្ហូបអាហារ ភស្តុភារកម្ម សេដ្ឋកិច្ចឌីជីថល និងថាមពលកកើតឡើងវិញ ព្រមទាំងជំរុញកម្មវិធីផ្គូផ្គងធុរកិច្ច និងកិច្ចសហប្រតិបត្តិការថាមពលឆ្លងដែន។
ក្រសួងការបរទេស និងសហប្រតិបត្តិការអន្តរជាតិ (កបទ.សអ) កាលពីថ្ងៃអង្គារ បានឱ្យដឹងថា ប្រទេសទាំងពីរបានឯកភាពពង្រីកទំនាក់ទំនងទ្វេភាគី បន្ទាប់ពីលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានអញ្ជើញទៅបំពេញទស្សនកិច្ចផ្លូវការនៅទីក្រុងកូឡាឡាំពួរ ដើម្បីចូលរួមកិច្ចប្រជុំគណៈកម្មការចម្រុះស្តីពីកិច្ចសហប្រតិបត្តិការទ្វេភាគីលើកទី៣ (JCBC) ចាប់ពីថ្ងៃទី៣ ដល់ថ្ងៃទី៤ ខែសីហា។
លោក ប្រាក់ សុខុន បានធ្វើជាសហប្រធានកិច្ចប្រជុំជាមួយរដ្ឋមន្ត្រីការបរទេសម៉ាឡេស៊ី លោក ដាតូ ស៊េរី ឧតាម៉ា ហាជី ម៉ូហាម៉ាដ ប៊ីន ហាជី ហាសាន់ (Dato’ Seri Utama Haji Mohamad bin Haji Hasan)។
ភាគីទាំងពីរបានបញ្ជាក់ជាថ្មីនូវការប្តេជ្ញាចិត្តក្នុងការពង្រឹងកិច្ចសហប្រតិបត្តិការលើវិស័យអាទិភាពជាច្រើន រួមមាន ពាណិជ្ជកម្មនិងវិនិយោគ កសិកម្ម អប់រំ សន្តិសុខ ការពារជាតិ ការងារ ទេសចរណ៍ និងការផ្លាស់ប្តូររវាងប្រជាជននិងប្រជាជន។ តំណាងក្រសួង និងស្ថាប័នពាក់ព័ន្ធនៃប្រទេសទាំងពីរ ក៏បានចូលរួមក្នុងកិច្ចប្រជុំ និងឯកភាពធ្វើការយ៉ាងជិតស្និទ្ធ ដើម្បីធានាការអនុវត្តប្រកបដោយប្រសិទ្ធភាពនូវគំនិតផ្តួចផ្តើមដែលបានឯកភាពគ្នា។
សេចក្ដីប្រកាសព័ត៌មានបានបញ្ជាក់ថា៖ «វិស័យពាណិជ្ជកម្ម និងការវិនិយោគ នៅតែជាសសរស្តម្ភដ៏សំខាន់នៃទំនាក់ទំនងសេដ្ឋកិច្ចកម្ពុជា-ម៉ាឡេស៊ី។ ប្រទេសទាំងពីរបានសាទរចំពោះការបន្តកើនឡើងនៃទំហំពាណិជ្ជកម្មទ្វេភាគី និងបានឯកភាពបង្កើនកិច្ចសហប្រតិបត្តិការលើវិស័យផលិតកម្ម កែច្នៃម្ហូបអាហារ ភស្តុភារកម្ម សេដ្ឋកិច្ចឌីជីថល ថាមពលកកើតឡើងវិញ និងកិច្ចសហប្រតិបត្តិការថាមពលឆ្លងដែន»។
សេចក្ដីប្រកាសបានបន្ថែមថា ភាគីទាំងពីរក៏បានឯកភាពរៀបចំវេទិកាពាណិជ្ជកម្មនិងវិនិយោគ ពិព័រណ៍ពាណិជ្ជកម្ម និងកម្មវិធីផ្គូផ្គងធុរកិច្ច ដើម្បីសម្រួលដល់ការបង្កើតភាពជាដៃគូពាណិជ្ជកម្មកាន់តែទូលំទូលាយ។
ក្នុងវិស័យកសិកម្ម កម្ពុជា និងម៉ាឡេស៊ី បានឯកភាពពង្រីកកិច្ចសហប្រតិបត្តិការលើសពីការធ្វើពាណិជ្ជកម្មអង្ករ ដោយបង្កើនការផ្លាស់ប្តូរលើផលិតផលកសិកម្មផ្សេងៗ រួមមាន គ្រាប់ស្វាយចន្ទី វារីវប្បកម្ម និងជីកសិកម្ម ដោយទាញយកអត្ថប្រយោជន៍ពីសក្ដានុពលដែលបំពេញបន្ថែមគ្នារបស់ប្រទេសទាំងពីរ។
ប្រទេសទាំងពីរ ក៏បានឯកភាពពង្រឹងកិច្ចសហប្រតិបត្តិការលើវិស័យអប់រំ ការអប់រំ និងបណ្តុះបណ្តាលបច្ចេកទេស និងវិជ្ជាជីវៈ (TVET) ទេសន្តរប្រវេសន៍ការងារ និងការការពារពលករចំណាកស្រុក។
ដោយកត់សម្គាល់ពីវឌ្ឍនភាពវិជ្ជមានក្នុងវិស័យទេសចរណ៍ ភាគីទាំងពីរបានឯកភាពពង្រឹងកិច្ចសហប្រតិបត្តិការផ្នែកអាកាសចរណ៍ តាមរយៈការបង្កើនការតភ្ជាប់ជើងហោះហើរត្រង់ ដើម្បីជំរុញវិស័យទេសចរណ៍ និងការផ្លាស់ប្តូររវាងប្រជាជននិងប្រជាជន។
កិច្ចប្រជុំក៏បានពិភាក្សាយ៉ាងស៊ីជម្រៅអំពីវិស័យកិច្ចសហប្រតិបត្តិការថ្មីៗ រួមមាន បញ្ញាសិប្បនិម្មិត (AI) បរិវត្តកម្មឌីជីថល ការប្រែប្រួលអាកាសធាតុ ការគ្រប់គ្រងគ្រោះមហន្តរាយ វិទ្យាសាស្ត្រ និងបច្ចេកវិទ្យា ព័ត៌មាន និងប្រព័ន្ធផ្សព្វផ្សាយ សុខាភិបាល ការអភិវឌ្ឍទីក្រុង រដ្ឋបាលសាធារណៈ និងវប្បធម៌។
សហប្រធានទាំងពីរបានចុះហត្ថលេខាលើកំណត់ហេតុនៃកិច្ចប្រជុំ JCBC កម្ពុជា-ម៉ាឡេស៊ី លើកទី៣ ដែលនឹងធ្វើជាផែនទីបង្ហាញផ្លូវសម្រាប់ការជំរុញកិច្ចសហប្រតិបត្តិការទ្វេភាគីក្នុងរយៈពេលប៉ុន្មានឆ្នាំខាងមុខ។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា (GDCE) ពាណិជ្ជកម្មទ្វេភាគីរវាងកម្ពុជា និងម៉ាឡេស៊ី បានកើនឡើងជិត ៥៧% ធៀបនឹងឆ្នាំមុន ដល់ ៧៩៥ លានដុល្លារ ក្នុងឆមាសទី១ ឆ្នាំ២០២៦។
របាយការណ៍បានបន្ថែមថា ចាប់ពីខែមករា ដល់ខែមិថុនា កម្ពុជា បាននាំចេញទំនិញទៅកាន់ម៉ាឡេស៊ីមានទំហំជិត ១១៣ លានដុល្លារ កើនឡើង ៦៤% បើធៀបនឹងរយៈពេលដូចគ្នាកាលពីឆ្នាំមុន។ ចំណែកការនាំចូលពីម៉ាឡេស៊ីមានទំហំ ៦៨២ លានដុល្លារ កើនឡើង ៥៥,៨% ធៀបនឹងឆ្នាំមុន។
