វិថីអាហារខេត្តកំពត នឹងសម្ពោធបើកជាផ្លូវការនៅថ្ងៃទី១១ ខែមេសា

កំពត៖ លោក ម៉ៅ ធនិន អភិបាលខេត្តកំពត នៅព្រឹកថ្ងៃទី៣០ ខែមីនា ឆ្នាំ២០២៦ បានដឹកនាំមន្ទីរជំនាញ អាជ្ញាធរក្រុងកំពត រួមនឹងអាជីវករដែលត្រូវលក់ដូរក្នុងវិថីអាហារ ដើម្បីធ្វើការចាប់ឆ្នោតយកតូបសម្រាប់លក់ដូរ នៅសាលាខេត្តកំពត។ លោកបានលើកឡើងថា ការរៀបចំវិថីអាហារដែលរំលេចដោយរចនាបទខ្មែរចំកណ្តាលក្រុងកំពតនាពេលនេះ នឹងធ្វើឱ្យកំណើនភ្ញៀវទេសចរកាន់តែកើនឡើង អាចជួយលើកកម្ពស់ជីវភាពអាជីវករ ក៏ដូចជាប្រជាពលរដ្ឋក្នុងខេត្តកាន់តែមានភាពល្អប្រសើរ។

ក្រុមអាជីវករដែលត្រូវលក់ដូរក្នុងវិថីអាហារខេត្តកំពត មានការសប្បាយរីករាយ និងពេញចិត្តចំពោះការរៀបចំវិថីអាហារថ្មីនេះ ដែលមានភាពរឹងមាំ ស្អាត មានអនាម័យ ប្រកបដោយសោភណ្ឌភាពទាក់ទាញ ពីសេសការរៀបចំឱ្យអាជីវករទាំងអស់ស្លៀកសំលៀកបំពាក់ប្រពៃណីជាតិខ្មែរដើម្បីបង្ហាញភ្ញៀវទេសចរជាតិ អន្តរជាតិ។

លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឱ្យដឹងថា វិថីអាហារត្រូវបានរៀបចំឡើងដោយមានភាពរឹងមាំ ហើយទីតាំងអគារនេះក៏មានរចនាបទខ្មែររួមបញ្ចូលនឹងអគារបេតិកភណ្ឌដែលនៅជុំវិញអាគារនេះ ដែលជាដួងព្រលឹងរបស់ក្រុងកំពត។ វិថីអាហារនេះនឹងប្រមូលផ្តុំទៅដោយម្ហូបអាហារដែលជាស្នាដៃរបស់អ្នកខេត្តកំពត ដែលមានរហូតដល់ជាង ១៧០ប្រភេទ និងមានតូបសរុប ៥២តូប។សូមបញ្ចាក់ថា វិថីអាហារនេះនឹងសម្ពោធបើកជាផ្លូវការនៅល្ងាចថ្ងៃទី១១ ខែមេសា ឆ្នាំ២០២៦ មុនឱកាសនៃពិធីបុណ្យចូលឆ្នាំប្រពៃណីជាតិខ្មែរចូលមកដល់។