ចង់ទៅលេងចូលឆ្នាំនៅសៀមរាបរកកន្លែងដេកខ្លួនឯងផ្ទះសំណាក់ដេកពេញអស់ហើយ!
15-March-2026 / ទេសចរណ៏និងវប្បធម៌
សៀមរាប៖ ក្រោយខកខានអស់រយៈពេល២ឆ្នាំ សង្ក្រាន្តសៀមរាប បានវិលត្រឡប់មកវិញ ជាមួយនឹងមុខមាត់ថ្មីនៃក្រុងសៀមរាប បន្ទាប់ពីការស្ថាបនាផ្លូវ ៣៨ខ្សែ សហភាពសហព័ន្ធយុវជនកម្ពុជាខេត្តសៀមរាប រដ្ឋបាលខេត្តសៀមរាប រៀបចំព្រឹត្តិការណ៍សៀមរាបសង្ក្រាន្តចាប់ពីថ្ងៃទី១២-១៦ ខែមេសា ឆ្នាំ២០២២ ដែលមានពីរទីតាំងធំៗ។ មកត្រឹមថ្ងៃទី១១ ខែមេសា ឆ្នាំ២០២២ ទីតាំងទាំងពីរបានរៀបចំរួចរាល់ជាស្ថាបពរដើម្បីត្រៀមទទួលភ្ញៀវទេសចរជាតិ អន្តរជាតិខាងមុខនេះ។
សូមបញ្ជាក់ផងដែរថា ទីតាំងទាំងពីរ មានកម្មវិធីដូចខាងក្រោម ៖-ក្នុងក្រុងមាន៖ កម្មវិធីជិះទូកកម្សាន្ត ពិព័រណ៍ម្ហូបអាហារ ផ្សារបណ្តែតទឹក តន្ត្រីស្គរដៃ ការសម្តែងសិល្បៈនៅលើផែទឹក ការប្រណាំងទូក ការប្រកួតកីឡាប្រដាល់ បណ្តែតគោម និងការប្រគុំតន្ត្រីខ្នាតយក្សបីកន្លែង និងការប្រកួតវាយកូនគោលសៀមរាបសង្ក្រាន្ត២០២២។
-ប្រាសាទចៅសាយទេវតា មានពិធីបួងសួងសុំសេចក្តីសុខ ពិធីទទួលទេវតាឆ្នាំថ្មី ពិធីពូនភ្នំខ្សាច់ ភូមិខ្ញុំ លេងល្បែងប្រជាប្រិយ ល្ខោនបាសាក់ និងស្រង់ព្រះ។
ប្រធានមន្ទីរទេសចរណ៍ខេត្តសៀមរាប បានបញ្ជាក់ថា សណ្ឋាគារ និងផ្ទះសំណាក់ នៅក្រុងសៀមរាប ត្រូវបានភ្ញៀវទេសចរកក់ពេញអស់ហើយ សម្រាប់ឱកាសពិធីបុណ្យចូលឆ្នាំប្រពៃណីជាតិខ្មែរ ដែលអាជ្ញាធរខេត្ត បានរៀបចំសង្ក្រាន្តសៀមរាប។
រដ្ឋបាលខេត្តសៀមរាប នៅល្ងាចថ្ងៃអង្គារទី១២ ខែមេសា ឆ្នាំ២០២២នេះ សូមជូនដំណឹងដល់ភ្ញៀវទេសចរជាតិ-អន្តរជាតិ បងប្អូនប្រជាពលរដ្ឋ និង សាធារណជនទាំងអស់ មេត្តាជ្រាបថា៖ រដ្ឋបាលខេត្តសៀមរាប សូមធ្វើការផ្អាកចរាចរជាបណ្ដោះអាសន្ន លើកំណាត់ផ្លូវជុំវិញកន្លែងប្រារព្ធពិធី និងផ្លូវសំខាន់ៗ
មួយចំនួន នៅក្នុងក្រុងសៀមរាប និងតំបន់រមណីយដ្ឋានអង្គរ ដូចខាងក្រោម៖១-កំណាត់ផ្លូវជាតិលេខ៦ ចាប់ពីចំណុចស្តុបកោះកេរ្តិ៍ ដល់ចំណុចមុខសណ្ឋាគារ J7។២-កំណាត់ផ្លូវមុខមហាសណ្ឋាគារអង្គរ (Raffles Grand Hotel d’Angkor)។៣-កំណាត់រុក្ខវិថីព្រះសីហនុ (ផ្លូវហ្សាលដឺហ្គោល) ចាប់ពីចំណុចស្តុបសារមន្ទីរជាតិអង្គរ រហូតដល់ ចំណុចគល់ស្ពានវត្តរាជបូព៌ នៃផ្លូវពោធិ៍កំបោរ (ផ្លូវខាងលិចមាត់ស្ទឹង និងកំណាត់ផ្លូវនានាដែលជាច្រកចូលមកកាន់ផ្លូវពោធិ៍កំបោរ(ផ្លូវខាងលិចមាត់ស្ទឹង) ។
៤-កំណាត់ផ្លូវអាចារ្យស្វា (ផ្លូវខាងកើតមាត់ស្ទឹង) ចាប់ពីចំណុចគល់ស្ពានវត្តពោធិលង្កា រហូតដល់ចំណុចគល់ស្ពានវត្តរាជបូព៌ និងចាប់ពីចំណុចគល់ស្ពានវត្តរាជបូព៌ រហូតដល់គល់ស្ពាន វត្តព្រះរាជដំណាក់ និងកំណាត់ផ្លូវនានាដែលជាច្រកចូលមកកាន់ផ្លូវអាចារ្យស្វា (ផ្លូវខាងកើត មាត់ស្ទឹង) ។៥-កំណាត់ផ្លូវវង់តូច នៃតំបន់រមណីយដ្ឋានអង្គរ ចាប់ពីចំណុចក្លោងទ្វារជ័យ រហូតដល់ចំណុចស្ពានប្រាសាទតាកែវ។
សូមបញ្ជាក់៖ ចំពោះទីតាំងផ្លូវបិទជាក់ស្តែង និងចំណតសម្រាប់រថយន្ត និងម៉ូតូ ដូចមានបង្ហាញនៅក្នុងផែនទីមាននៅខាងក្រោម។
