លោក អ៊ុន វ៉ាន់ថុល នាយប៉ុស្តិ៍នគរបាលរដ្ឋបាលឃុំពពែត ស្រុកស្វាយទាប បាញ់ជនរងគ្រោះបាក់ភ្លៅ រួចសម្រួលបញ្ចប់រឿងដោយស្ងាត់ៗ!

ស្វាយរៀង៖ លោកវរសេនីយ៍ត្រី អ៊ុន វ៉ាន់ថុល នាយប៉ុស្តិ៍នគរបាលរដ្ឋបាលឃុំពពែត ស្រុកស្វាយទាប ខេត្តស្វាយរៀងត្រូវបានប្រជាពលរដ្ឋចោទប្រកាន់ថា " ប្រើប្រាស់អាវុធ ដោយមិនសមហេតុផល បាញ់ប្រហារទៅលើជនរងគ្រោះ បណ្តាលឱ្យបាក់ភ្លៅ ខណៈពេលជនរងគ្រោះ ទៅទារលុយពីស្ដ្រីម្នាក់ដែលត្រូវជាក្មួយរបស់លោកមេភូមិ..! ។ ហេតុការណ៍បាញ់ប្រហារនេះ បានកើតឡើង នៅភូមិកំពោតម្រាក់ ឃុំពពែត ស្រុកស្វាយទាប ខេត្តស្វាយរៀង កាលពីថ្ងៃទី១៦ខែមីនា ឆ្នាំ ២០២៦ ។ 

ប្រភពបានបញ្ជាក់ថា: ជនដៃដល់ឈ្មោះ អ៊ុន វ៉ាន់ថុល មានតួនាទីជានាយប៉ុស្តិ៍នគរបាលរដ្ឋបាលឃុំពពែត.!។ ឯជនរងគ្រោះជាមនុស្សប្រុស នៅភូមិកើតហេតុរងរបួសធ្ងន់(បាក់ភ្លៅ)..!។ សេចក្តីរាយការណ៍បានឱ្យដឹងថា នៅមុនពេលកើតហេតុជនរងគ្រោះ បានទៅទារលុយពីស្ដ្រីម្នាក់ ដែលជំពាក់លុយខ្លួនចំនួន១៥.០០០រៀល នៅភូមិកើតហេតុខាងលើ..!។ខណ:នោះ ក៏មានការប្រកែកពាក្យសម្ដីរវាងអ្នកទាំង២ ហើយស្ដ្រីរូបនោះបានប្ដឹងទៅលោកមេភូមិ ដែលត្រូវជាឪពុកមារបស់ខ្លួន ។ជាមួយគ្នានោះលោកមេភូមិ ក៏បានរាយការណ៍បន្ត ទៅកាន់លោកនាយប៉ុស្តិ៍នគរបាលរដ្ឋបាលឃុំពពែត ដើម្បីធ្វើកិច្ចអន្តរាគមន៍ ដោយផ្អែកថា ជនរងគ្រោះជាមុខសញ្ញាប្រើប្រាស់គ្រឿងញៀន។

ក្រោយទទួលព័ត៌មានបែបនេះ លោក អ៊ុន វ៉ាន់ថុល ប្រដាប់ដោយអាវុធក្នុងដៃ បានចុះមកដល់កន្លែងកើតហេតុ ក៏មានការផ្ទុះអាវុធត្រូវជនរងគ្រោះ បណ្ដាលឱ្យបាក់ភ្លៅតែម្ដង រួចចោទថា " ជនរងគ្រោះតដៃ " ។ ប្រភពបន្តថា តាមពិតទៅជនរងគ្រោះ ពុំបានតដៃជាមួយ និងលោកនាយប៉ុស្តិ៍នោះទេ.! ។ ប្រភពបានបន្តថា: ការផ្ទុះអាវុធនេះ មកពីលោកនាយប៉ុស្តិ៍ ចុះប្រតិបត្តិការក្នុងពេលស្រវឹង បាញ់គំរាមផ្ញុកហ្នឹងដី ដើម្បីសំឡុត បែរជាត្រូវភ្លៅជនរងគ្រោះ..!រួចក៏រកលេសដោះបន្ទុកថា មកពី"ជនរងគ្រោះតដៃប្រើកាំបិតបម្រុងចាក់ខ្លួនជានាយប៉ុស្តិ៍ " ។ប្រភពដដែលបន្ថែមថា ក្រោយផ្ទុះអាវុធភ្លាមៗ លោកវរសេនីយ៍ត្រី អ៊ុន វ៉ាន់ថុល បានខលទូរស័ព្ទទៅកាន់គ្រូពេទ្យម្នាក់ ដោយថា ជួយហៅឡានពេទ្យផង អញបាញ់គេបាក់ជើងហើយ! លុះ១ម៉ោងក្រោយមក ទើបរថយន្តពេទ្យ មកដល់និងជួយសង្គ្រោះ។

នៅរសៀលថ្ងៃទី១៧.០៣.២០២៦ ភ្នាក់ងារយើង បានព្យាយាមរកការសុំបំភ្លឺពីលោកវរសេនីយ៍ត្រី អ៊ុន វ៉ាន់ថុល នាយប៉ុស្តិ៍នគរបាលរដ្ឋបាលឃុំពពែត ប៉ុន្តែពុំមានលេខទូរស័ព្ទសំរាប់ទាក់ទង។ លោកអនុសេនីយ៍ឯក ស៊ិន ពិសី អធិការស្រុកស្វាយទាប(ស្ដីទី) ក៏មិនអាចទាក់ទងបានដែរ ។ លោក ពេជ្រ វីរៈ ស្នងការខេត្តស្វាយរៀង អង្គភាពយើង បានព្យាយាមសុំការបំភ្លឺ ដែរ តែមិនអាចទាក់ទងបាន ។

ទោះជាយ៉ាងនេះក្ដីលោក ជា ហ៊ន អភិបាលស្រុកស្វាយទាប បានប្រាប់អ្នកកាសែតក្នុងស្រុក ដោយនិយាយរដិបរដុបថា ករណីខាងលើកំពុងធ្វើនីតិវិធី និងសម្រួលគ្នាហើយ..!។ជុំវិញករណីនេះ មហាជនទាមទារឱ្យថ្នាក់ដឹកនាំខេត្តស្វាយរៀង ជាពិសេសក្រសួងមហាផ្ទៃ សូមមេត្តាពិនិត្យចាត់វិធានការលើលោកនាយប៉ុស្តិ៍នគរបាលរដ្ឋបាលឃុំពពែត កុំមានការយោគយល់ឱ្យសោះ ចំពោះភាពឆេវឆាវរបស់លោក ដែលប្រើប្រាស់អាវុធ បាញ់ទាំងកម្រោល បណ្ដាលឱ្យជនរងគ្រោះ(បាក់ភ្លៅ)រួចតាំងរកលេសដោះសារ៕