ម្លៃប្រេងនឹងធ្លាក់ថ្លៃបន្តទៀត បន្ទាប់ពីប្រធានាធិបតី Trump ចាត់វិធានការដោះស្រាយក្នុងពេលបារាំងបានចេញមកការពារច្រកសមុទ្ទ!
11-March-2026 / ព័ត៌មានអន្តរជាតិ
អាមេរិក៖ប្រធានាធិបតីអាមេរិក លោក Donald Trump បាននិយាយកាលពីថ្ងៃចន្ទថា លោកមានផែនការដើម្បីដោះស្រាយការឡើងថ្លៃប្រេង ដែលជំរុញដោយសង្រ្គាមដែលកំពុងបន្តជាមួយអ៊ីរ៉ង់ ប៉ុន្តែលោកមិនបានផ្តល់ព័ត៌មានលម្អិតនោះទេ។
ថ្លែងប្រាប់កាសែត New York Post នៅថ្ងៃទី ១០ខែមីនា ឆ្នាំ២០២៦ក្នុងពេលមានការវាយលុករបស់អាមេរិក និងអ៊ីស្រាអែលលើអ៊ីរ៉ង់លោកប្រធានាធិបតី Trump បានថា “ខ្ញុំមានផែនការសម្រាប់អ្វីគ្រប់យ៉ាង។ អ្នកនឹងសប្បាយចិត្តខ្លាំង” ។
សូមបញ្ជាក់ថាតម្លៃប្រេងឆៅបានកើនឡើងយ៉ាងខ្លាំងចាប់តាំងពីការវាយប្រហាររួមគ្នាលើអ៊ីរ៉ង់បានចាប់ផ្តើម ដោយតម្លៃប្រេងឆៅ Brent ឡើងដល់១១៩ ដុល្លារក្នុងមួយបារ៉ែលពេញមួយយប់ ដែលជាកម្រិតខ្ពស់បំផុតចាប់តាំងពីការចាប់ផ្តើមនៃសង្គ្រាមរវាងប្រទេសរុស្ស៊ី និងអ៊ុយក្រែនក្នុងឆ្នាំ២០២២ មុនពេលធ្លាក់ចុះមកនៅប្រហែល១០០ ដុល្លារ។
ការកើនឡើងតម្លៃប្រេងត្រូវបានជំរុញភាគច្រើនបណ្តាលមកពីការរំខានដល់ការដឹកជញ្ជូនតាមរយៈច្រកសមុទ្រ Hormuz ដែលតាមរយៈច្រកសមុទ្រនោះ ប្រេងប្រហែល២០ លានបារ៉ែលជាធម្មតាបានឆ្លងកាត់ជារៀងរាល់ថ្ងៃ។លោក Trump បានមានប្រសាសន៍ថា៖ «ខ្ញុំមិនមានការព្រួយបារម្ភអំពីតម្លៃនេះទេ។វានឹងធ្លាក់ចុះយ៉ាងលឿននៅពេលវាចប់ ហើយបើឡើងក៏ឡើងដែរ ប៉ុន្តែវាសំខាន់ជាងតម្លៃសាំងឡើងបន្តិចទៅទៀត»។
សម្រាប់លោក អ៊ីប្រាហ៊ីម ហ្សុលហ្វាហ្គារី (Ebrahim Zolfaghari) ដែលជាអ្នកនាំពាក្យនៃទីបញ្ជាការដ្ឋានមជ្ឈិម ខាមថាម អាល់អាន់ប៊ីយ៉ា (Khatam al-Anbiya) របស់អ៊ីរ៉ង់ បានចេញមុខព្រមានចំៗទៅកាន់សហរដ្ឋអាម៉េរិក និងអ៊ីស្រាអ៊ែលថា ប្រសិនបើសង្គ្រាមនៅតែបន្ត វានឹងរុញច្រានតម្លៃប្រេងឱ្យហក់ឡើងលើស ២០០ ដុល្លារក្នុងមួយបារ៉ែល។ លោកបានសង្កត់ធ្ងន់ថា «ប្រសិនបើអ្នកទាំងនោះ អាចទ្រាំទ្របាននឹងតម្លៃប្រេង ២០០ ដុល្លារ ក៏សូមបន្តលេងល្បែងសង្គ្រាមនេះទៀតចុះ» ។
ទោះជាបែបណាក្ដី លោកបានអំពាវនាវឱ្យរដ្ឋាភិបាលនៃបណ្ដាប្រទេសមូស្លីម ប្រញាប់ព្រមានអាម៉េរិក និងអ៊ីស្រាអ៊ែល កុំឱ្យបន្តសកម្មភាពដ៏សាហាវឃោរឃៅនេះទៀត ដើម្បីកុំឱ្យភ្លើងសង្គ្រាមរីករាលដាលកាន់តែខ្លាំង។ មុនពេលសង្គ្រាមផ្ទុះឡើងនៅថ្ងៃទី ២៨ ខែកុម្ភៈ តម្លៃប្រេងស្ថិតនៅត្រឹមប្រហែល ៧០ ដុល្លារប៉ុណ្ណោះ ដោយសារតែក្ដីព្រួយបារម្ភពីការបិទច្រកសមុទ្រហ័រមូស (Hormuz) ដែលជាផ្លូវដឹកជញ្ជូនប្រេង ២០% សម្រាប់ពិភពលោក តម្លៃប្រេងបានកើនថ្លៃ។
ទាក់ទងនិងច្រកសមុទ្ទ Hormuz លោកប្រធានាធិបតីបារាំង អេម៉ានុយអែល ម៉ាក្រុង និយាយថា បារាំង និងសម្ព័ន្ធមិត្តរបស់ខ្លួនកំពុងរៀបចំបេសកកម្មដើម្បីបើកច្រកសមុទ្រ Hormuz ឡើងវិញ ខណៈដែលសង្គ្រាមមជ្ឈិមបូព៌ាបានចូលដល់សប្តាហ៍ទីពីរហើយនោះ។ ប្រធានាធិបតីបារាំងលោកអេម៉ាណូអែល ម៉ាក្រុង បាននិយាយនៅថ្ងៃទី០៩ខែមីនាឆ្នាំ២០២៦ថា ការវាយប្រហារលើប្រទេសស៊ីប( Cyprus) គឺជាការវាយប្រហារលើអឺរ៉ុបទាំងមូល ហើយថាបារាំងនិងសម្ព័ន្ធមិត្តរបស់ខ្លួន កំពុងរៀបចំបេសកកម្មការពារ ដើម្បីបើកច្រកសមុទ្រHormuzឡើងវិញ ខណៈសង្រ្គាមនៅមជ្ឈិមបូព៌ា ឈានចូលដល់សប្តាហ៍ទី២។ នេះបើតាមការចុះផ្សាយដោយសារព័ត៌មាន CNAនៅថ្ងៃទី១០ខែមីនាឆ្នាំ២០២៦។
ថ្លែងអំឡុងពេលបំពេញទស្សនកិច្ចទៅកាន់ប្រទេសស៊ីប ដើម្បីពិភាក្សា អំពី បញ្ហាសន្តិសុខក្នុងតំបន់ លោកម៉ាក្រុងបាននិយាយថា បេសកកម្មនេះនឹងមានគោលបំណង អមដំណើរកប៉ាល់ដឹកកុងតឺន័រនិងនាវាដឹកប្រេងដើម្បីបើកច្រកសមុទ្រHormuz ឡើងវិញបន្តិចម្តងៗ បន្ទាប់ពីបញ្ចប់ដំណាក់កាលដ៏ក្តៅគគុកនៃជម្លោះ។ លោកម៉ាក្រុងបានថ្លែងថា នេះគឺចាំបាច់សម្រាប់ពាណិជ្ជកម្មអន្តរជាតិ ប៉ុន្តែក៏សម្រាប់រំហូរឧស្ម័ន និងប្រេងផងដែរ ដែលត្រូវតែអាចចាកចេញពីតំបន់នេះម្តងទៀត។
