អង់គ្លេសចោទរុស្ស៊ីថាប្រុងបង្កើតរដ្ឋាភិបាលអាយ៉ងក្នុងពេលណាតូបញ្ជូនអាវុធឲ្យអ៊ុយក្រែន
21-September-2026 / ព័ត៌មានអន្តរជាតិ
ប្រទេសអ៊ុក្រែន៖ មន្ត្រីជាន់ខ្ពស់ចក្រភពអង់គ្លេសម្នាក់ បានព្រមានត្រង់ៗថារុស្ស៊ីនឹងត្រូវរងទណ្ឌកម្មសេដ្ឋកិច្ចយ៉ាងធ្ងន់ធ្ងរ ប្រសិនបើហ៊ានបង្កើត «រដ្ឋាភិបាលអាយ៉ងមួយ» នៅក្នុងប្រទេសអ៊ុយក្រែន។
ទីភ្នាក់ងារសារព័ត៌មាន Reuters នៅថ្ងៃចន្ទ ទី២៤ ខែមករា ឆ្នាំ២០២២បានឲ្យដឹងថាលោកឧបនាយករដ្ឋមន្ត្រីអង់គ្លេស លោក Dominic Raab កាលពីថ្ងៃអាទិត្យទី២៣មករាបានព្រមាន នៅក្នុងបទសម្ភាសន៍ជាមួយសារព័ត៌មាន Sky News និងបន្ទាប់ពីទីក្រុងឡុងដ៍ហើយបាន បានចោទប្រកាន់រុស្ស៊ីថាកំពុងលួចទាក់ទងជាមួយអតីតអ្នកនយោបាយអ៊ុយក្រែនមួយចំនួនដែលគាំទ្រខ្លួន ដើម្បីលើកបន្តុបពួកគេឱ្យឡើងកាន់អំណាច។ លោក Dominic Raab បានគូសបញ្ជាក់ដូច្នេះថា «រុស្ស៊ីនឹងរងទណ្ឌកម្ម ក៏ដូចជា ប្រឈមមុខនឹងផលវិបាកយ៉ាងធ្ងន់ធ្ងរ ប្រសិនបើទីក្រុងម៉ូស្គូប្រើកម្លាំងយោធា ឬក៏បង្កើតរដ្ឋាភិបាលអាយ៉ាងណាមួយ នៅក្នុងប្រទេសអ៊ុយក្រែន»។
ឆ្លើយតបទៅនឹងការចោទប្រកាន់ពីចក្រភពអង់គ្លេស ក្រសួងការបរទេសរុស្ស៊ី បានចេញមុខអះអាងថាវាជារឿងមិនពិត ហើយចោទ បកទៅវិញថា NATO គឺជាអ្នកបង្កភាពតានតឹងសព្វថ្ងៃពាក់ព័ន្ធនឹងវិបត្តិអ៊ុយក្រែន។ស្ថានទូតរុស្ស៊ីនៅទីក្រុងឡុងដ៍បានព្រមានកាលពីថ្ងៃអាទិត្យថា ចក្រភពអង់គ្លេសគួរតែបញ្ឈប់ការញុះញង់វោហាសាស្ត្រ “ល្ងង់ខ្លៅ និងគ្រោះថ្នាក់” របស់ខ្លួនទាក់ទងនឹងវិបត្តិអ៊ុយក្រែន ។សេចក្តីថ្លែងការណ៍របស់ស្ថានទូតបានប្រកាសថា “ឥឡូវនេះអង់គ្លេសកំពុងដើរតួនាទីក្នុងការញុះញង់ឥតឈប់ឈរប្រឆាំងនឹងរុស្ស៊ី ក៏ដូចជាគ្រោះថ្នាក់ទាក់ទងនឹងរដ្ឋប្រហារនៅអ៊ុយក្រែន” ។អ្នកការទូតរុស្ស៊ីក៏បានស្តីបន្ទោសរដ្ឋមន្ត្រីការបរទេសលោកស្រី Liz Truss ដែលបាននិយាយថា អ៊ុយក្រែនបានប្រយុទ្ធប្រឆាំងនឹងការឈ្លានពានជាច្រើនពីតំបន់ Mongols ដល់ក្រុមភាគតិច Tatars” ។
អង្គការណាតូ (NATO) វិញបាននិយាយនៅថ្ងៃចន្ទ ទី២៤ ខែមករានេះថា ខ្លួនកំពុងដាក់កម្លាំងបម្រុងនៅអឺរ៉ុបខាងកើត ជាមួយនឹងនាវា និងយន្តហោះចម្បាំងបន្ថែមទៀត ដើម្បីជាការឆ្លើយតបទៅនឹងការបង្កើនកម្លាំងយោធារបស់រុស្ស៊ីនៅព្រំដែនអ៊ុយក្រែន។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។លោក Jens Stoltenberg អគ្គលេខាធិការនៃសម្ព័ន្ធភាពយោធាលោកខាងលិចបាននិយាយនៅក្នុងសេចក្តីថ្លែងការណ៍មួយថា «ខ្ញុំស្វាគមន៍សម្ព័ន្ធមិត្តដែលរួមចំណែកបន្ថែមកម្លាំងដល់ណាតូ។ ណាតូនឹងបន្តចាត់វិធានការចាំបាច់ដើម្បីការពារសម្ព័ន្ធមិត្តទាំងអស់ រួមទាំងការពង្រឹងយោធាផ្នែកខាងកើត នៃសម្ព័ន្ធមិត្តផងដែរ»។
គួរបញ្ជាក់ថា សហរដ្ឋអាមេរិក ចក្រភពអង់គ្លេស និងប្រទេសអឺរ៉ុបមួយចំនួនទៀត បានសន្យាបញ្ជូនសព្វាវុធ ដើម្បីជួយអ៊ុយក្រែនទប់ទល់ នឹងការគំរាមកំហែងផ្នែកយោធាពីប្រទេសរុស្ស៉ី ដែលរងការចោទប្រកាន់ពីក្រុមប្រទេសលោកខាងលិចថា បានដាក់ពង្រាយកងទ័ពប្រហែល១០០,០០០នាក់ នៅតាមបណ្តោយព្រំប្រទល់ក្បែរអ៊ុយក្រែន។ ចំនួនកងទ័ពដ៏ច្រើនសន្ធឹកបែបនេះ ត្រូវបានក្រុមមន្ត្រីអាមេរិកចាត់ទុកថាជា ការត្រៀមលក្ខណៈលើកទ័ពចូលអ៊ុយក្រែន នៅក្នុងខែមករានេះ ឬនៅដើមខែកុម្ភៈខាងមុខ។ ខាងរុស្ស៊ីវិញ ក៏បានចេញមុខបដិសេធជាច្រើនផងដែរថា ខ្លួនគ្មានផែនការវាយប្រហារលើប្រទេសណាមួយឡើយ តែបានព្រមានទុកជាមុនក្នុងការចាត់វិធានការឆ្លើយតប ប្រសិនបើមានសកម្មភាពបង្ករឿងណាមួយពីអ៊ុយក្រែន និង NATO
រដ្ឋមន្ត្រីការពារជាតិអ៊ុយក្រែនលោក អូឡេកស៉ី រ៉េសនីកូវ (Oleksii Reznikov) កាលពីថ្ងៃអាទិត្យកន្លងទៅនេះ បានប្រកាសឱ្យដឹងថា ប្រទេសលោកទើបទទួលបានកញ្ចប់សព្វាវុធទី២ ពីសហរដ្ឋអាមេរិក ដែលស្ថិតក្រោមក្រមខណ្ឌ នៃជំនួយផ្នែកយោធាគិតជាទឹកប្រាក់សរុប ទំហំ២០០លានដុល្លារ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃចន្ទ ទី២៤ ខែមករា ឆ្នាំ២០២២។
លោកប្រមុខការពារជាតិអ៊ុយក្រែន បានបង្ហោះសារនៅលើប្រព័ន្ធ Twitter យ៉ាងដូច្នេះថា «យន្តហោះទី២ បានមកដល់រដ្ឋធានីកៀវហើយ! សព្វាវុធសរុបទម្ងន់ជាង៨០តោន បានមកពីមិត្តរបស់យើងនៅសហរដ្ឋអាមេរិក ដើម្បីជួយពង្រឹងសមត្ថភាពការពារជាតិរបស់អ៊ុយក្រែន ហើយវាមិនទាន់អស់ត្រឹមនេះទេ»។
កញ្ចប់សព្វាវុធដំបូងទម្ងន់សរុបប្រមាណជា៩០តោន នៃជំនួយយោធាខាងលើ ដែលត្រូវបានសហរដ្ឋអាមេរិកអនុម័ត កាលពីខែធ្នូ ឆ្នាំ២០២១ បានទៅដល់រដ្ឋធានីរបស់អ៊ុយក្រែន កាលពីថ្ងៃសៅរ៍ចុងសប្តាហ៍កន្លងទៅនេះ។
ទីក្រុងវ៉ាស៉ីនតោនបានអះអាងថា ខ្លួននឹងបន្តផ្តល់ការជួយគាំទ្រដល់អ៊ុយក្រែន ចំពោះមុខក្តីបារម្ភអំពីការប្រមូលផ្តុំកម្លាំងទ័ពរាប់ម៉ឺននាក់របស់ ប្រទេសរុស្ស៉ី នៅតាមបណ្តោយព្រំប្រទល់អ៊ុយក្រែន ដែលត្រូវក្រុមប្រទេសលោកខាងលិច សង្ស័យថាជាការត្រៀមលើកទ័ពចូលឈ្លានពាន។ យ៉ាងណាក្តី ទីក្រុងម៉ូស្គូបានបដិសេធថា មិនមានគម្រោងត្រៀមធ្វើប្រតិបត្តិការយោធាលើប្រទេសណាមួយ ដូចការចោទប្រកាន់នោះទេ៕
