រដ្ឋមន្ត្រីការពារជាតិថៃ ស្នើពង្រឹងរបងអេឡិចត្រូនិក និងប្រែក្លាយតំបន់ព្រំដែនកម្ពុជាទៅជាតំបន់ទេសចរណ៍បន្ទាប់ពីបាននិយាយពីកាដកទព័ខ្លះ

ប្រទេសថៃ៖ រដ្ឋមន្ត្រីការពារជាតិថៃ លោក ណាត់ថាផុន នាគផានិត បានអះអាងថា លោកមិនទាន់ត្រូវបានទាក់ទងឲ្យចូលរួមក្នុងគណៈរដ្ឋមន្ត្រីអាណត្តិបន្ទាប់នៅឡើយទេ ហើយនឹងផ្តោតលើការបំពេញភារកិច្ចរបស់ខ្លួនក្នុងរយៈពេលពីរខែដែលនៅសល់។ 

តែ លោកបានលើកឡើងថា កងកម្លាំងយោធាថៃគួរត្រូវពិចារណាលើវិធានការដែលលើសពីការប្រើកម្លាំងយោធាប្រកបដោយសុវត្ថិភាពតែប៉ុណ្ណោះ។ លោកជំរុញឲ្យមេបញ្ជាការយោធាគិតបន្ថែមអំពីវិស័យការទូត នយោបាយអន្តរជាតិ ចិត្តវិទ្យាសង្គម និងសេដ្ឋកិច្ច ដើម្បីដោះស្រាយបញ្ហាសន្តិសុខជាតិឲ្យមានប្រសិទ្ធភាព និងបន្ថយភាពតានតឹងក្នុងតំបន់។

រដ្ឋមន្ត្រីការពារជាតិថៃក៏បានគាំទ្រការស្ថាបនារបងអចិន្ត្រៃយ៍នៅចំណុចសំខាន់ៗតាមព្រំដែនថៃ–កម្ពុជា ដូចជា តំបន់បានខ្លុងលឹក និងថ្មដា។ លោកបានណែនាំឲ្យដំឡើងប្រព័ន្ធរបងអេឡិចត្រូនិក និងកាមេរ៉ាវីដេអូ (CCTV) នៅកន្លែងដែលចាំបាច់ ដើម្បីពង្រឹងការត្រួតពិនិត្យ និងការតាមដានសកម្មភាពខុសច្បាប់។

ក្រៅពីវិធានការសន្តិសុខ លោកបានស្នើឲ្យអភិវឌ្ឍតំបន់ភ្នំទ្រព្យ អានសេះ និងមុំបី ឲ្យក្លាយជាតំបន់ទេសចរណ៍ ឬតំបន់អនុស្សាវរីយ៍។ លោកអះអាងថា ការអភិវឌ្ឍបែបនេះអាចជួយបង្កើនការត្រួតពិនិត្យការផ្លាស់ប្តូរនៅលើដី និងជំរុញសេដ្ឋកិច្ចក្នុងតំបន់ព្រំដែនផងដែរ។

ទាក់ទងនឹងការរៀបចំគណៈរដ្ឋមន្ត្រីថ្មី លោកណាត់ថាផុន បានបញ្ជាក់ថា លោកមិនទាន់ទទួលបានការទាក់ទងជាផ្លូវការអំពីការចូលរួមក្នុងរដ្ឋាភិបាលអាណត្តិបន្ទាប់ទេ។ លោកបញ្ជាក់ថា អាទិភាពបច្ចុប្បន្នរបស់លោកគឺការបំពេញភារកិច្ចឲ្យបានពេញលេញ រហូតដល់អាណត្តិបច្ចុប្បន្នបញ្ចប់ ។នេះបើតាម៖ The Nation។

សូមបញ្ជាក់ថាកាលពីថ្ងៃចន្ទ ទី២៣ ខែកុម្ភៈ លោក Nattaphon Nakpanich ក៏បានឱ្យដឹងថា ក្រសួងរបស់លោក បានស្នើទៅកាន់ក្រុមប្រឹក្សាការពារជាតិ ចង់ឱ្យកាត់បន្ថយដោយសន្សឹមៗ នូវចំនួនកងទ័ពដែលឈរនៅតាមខ្សែបន្ទាត់ព្រំដែនថៃ-កម្ពុជា ក្នុងគោលបំណងបន្ធូរបន្ថយការចំណាយ។ តាមការចេញផ្សាយដោយ សារព័ត៌មាន Thai PBSបានឲ្យដឹងថា៖លោក Nattaphon បាននិយាយថា សម្រាប់ពេលឥឡូវ និងមួយរយៈពេលខាងមុខ វានៅតែជារឿងសំខាន់ក្នុងការរក្សាវត្តមានយោធា នៅតាមបណ្តោយព្រំប្រទល់ រវាងប្រទេសថៃនិងប្រទេសកម្ពុជា ជាពិសេសនៅតាមតំបន់ ដែលកងទ័ពថៃដណ្តើមកាន់កាប់បានពីកម្ពុជា អំឡុងការប្រយុទ្ធគ្នាកាលពីខែធ្នូ ចុងឆ្នាំមុន។

ប៉ុន្តែលោក Nattaphon បានទទួលស្គាល់ថា ការរក្សាវត្តមានទ័ពជាប់រហូត នៅតាមខ្សែបន្ទាត់ព្រំដែនប្រហែលជិត៨០០គីឡូម៉ែត្រ គឺជារឿងមិនអាចទៅរួច និងត្រូវចំណាយច្រើនខ្លាំង ដូច្នេះហើយលោកបានស្នើទៅក្រុមប្រឹក្សាការពារជាតិថៃ ចង់ឱ្យកាត់បន្ថយចំនួនទ័ព​ដោយសន្សឹមៗ ហើយទន្ទឹមគ្នានោះ ត្រូវពង្រឹងការដាក់រនាំងព្រំដែន និងសាងសង់ភូមិឱ្យអតីតយុទ្ធជន ដែលនឹងជួយមើលការពារ​តំបន់ព្រំដែន។

លោករដ្ឋមន្រ្តីការពារជាតិថៃ បានបន្តថា នៅតំបន់មានមនុស្សរស់នៅច្រើន ដូចជា Klong Leuk ដែលស្ថិតនៅទល់មុខក្រុងប៉ោយប៉ែតរបស់កម្ពុជា និងនៅតំបន់ថ្មដា ដែលជាប់ខេត្ត Trat ការដាក់រនាំងព្រំដែន គួរតែត្រូវពង្រឹងឱ្យកាន់តែរឹងមាំបន្ថែម ហើយបំពាក់ឧបករណ៍ឃ្លាំមើលអេឡិចត្រូនិក។ រីឯតំបន់ដទៃទៀត នៅជា Chong An Ma (អានសេះ), Chong Bok (មុំបី), និង Phu Makua (ភ្នំទ្រព្យ) អាចអភិវឌ្ឍទៅជាកន្លែងទាក់ទាញភ្ញៀវទេសចរ៕