នគរបាលវៀតណាមបង្ក្រាបទីតាំងផលិតទំនិញក្លែងក្លាយដ៏ធំមួយ រកឃើញមានទាំងទឹកត្រីម៉ាកល្បីៗប្រចាំប្រទេស និងគ្រឿងផ្សំផ្ទះបាយក្លែងក្លាយច្រើនមុខ

ប្រទេសវៀតណាម ៖ នគរបាលសេដ្ឋកិច្ចក្រុងហូជីមិញ បង្ក្រាបទីតាំងផលិតទំនិញក្លែងក្លាយដ៏ធំមួយ រកឃើញមានទាំងទឹកត្រីម៉ាកល្បីៗប្រចាំប្រទេស និងគ្រឿងផ្សំផ្ទះបាយក្លែងក្លាយច្រើនមុខ ដែលច្រកដបនិងសំបកវេចខ្ចប់ដូចរបស់ពិត ១០០ ភាគរយ។ 

ប្រតិបត្តិការចុះឆែកឆេរទីតាំងស្នាក់នៅ និងកន្លែងផលិតរបស់ជនសង្ស័យចំនួន៥នាក់ សមត្ថកិច្ចបានរកឃើញភស្តុតាង ដែលគួរឱ្យព្រួយបារម្ភជាច្រើន ។ ក្រុមជនខិលខូចបានប្រើប្រាស់ល្បិចកលយ៉ាងទំនើប ដោយយកគ្រឿងឧបភោគបរិភោគគ្មានប្រភពច្បាស់លាស់មកច្រកចូលក្នុងសំបកវេចខ្ចប់ ដែលមានរូបរាង ស្លាកសញ្ញា និងម៉ាកល្បីៗប្រចាំប្រទេសវៀតណាម ដែលមើលទៅហាក់ដូចជារបស់ពិត១០០ភាគរយ ពិបាកនឹងបែងចែកដាច់ដោយភ្នែកទទេ ។

វត្ថុតាងដែលរឹបអូសបានរួមមាន ៖ ទឹកត្រីច្រកដបស្រេច ៖ ជិត ៦០០ដប (ប្រភេទ៩០០មីលីលីត្រ) និងទឹកត្រីគ្មានស្លាកសញ្ញារង់ចាំការច្រកដបចំនួន១,៥៤៥ ដបទៀត ។ គ្រឿងទេសចម្អិនអាហារ ៖ ប៊ីចេងជិត១,០០០កញ្ចប់ និងម្សៅស៊ុបជិត៤០០ កញ្ចប់ ។ សម្ភារៈសម្អាត ៖ ម្សៅសាប៊ូបោកខោអាវម៉ាកល្បីៗចំនួន ១៣០កញ្ចប់ ។ វត្ថុធាតុដើម និងគ្រឿងចក្រ ៖ ប៊ីចេង និងម្សៅស៊ុបដុំធំៗរាប់ពាន់គីឡូក្រាម, ម្សៅសាប៊ូជិត ១តោន, សំបកវេចខ្ចប់ក្លែងក្លាយគ្រប់ទំហំ១,៦០០ សន្លឹក ព្រមទាំងម៉ាស៊ីនអ៊ុតកម្ដៅ និងជញ្ជីងអេឡិចត្រូនិចជាច្រើនគ្រឿង ។

នៅចំពោះមុខសមត្ថកិច្ច ក្រុមជនសង្ស័យទាំង៥នាក់ បានសារភាពថា ពួកគេដឹងច្បាស់ថា ការផលិតទំនិញក្លែងក្លាយនេះ គឺខុសច្បាប់ និងប៉ះពាល់ដល់សុខភាពសាធារណៈ ប៉ុន្តែដោយសារតែផលចំណេញខ្ពស់ ពួកគេសុខចិត្តបិទភ្នែកធ្វើមិនដឹងមិនឮ ហើយយកទៅចែកចាយតាមតូបលក់ចាប់ហួយនានា ។ អ្វីដែលគួរឱ្យបារម្ភបំផុតនោះ គឺជនសង្ស័យម្នាក់ឈ្មោះ Dinh Van Than បានទម្លាយថា ចាប់តាំងពីដើមឆ្នាំ២០២៥ មកទល់ពេលនេះ រូបគេបានលក់វត្ថុធាតុដើមអន់គុណភាព ដែលបង្កគ្រោះថ្នាក់ដល់សុខភាពអ្នកប្រើប្រាស់អស់ រាប់សិបតោនទៅហើយ ទៅឱ្យបណ្តាញផលិតក្លែងក្លាយដទៃទៀត ។

អាជ្ញាធរកំពុងបន្តនីតិវិធីស៊ើបអង្កេតយ៉ាងហ្មត់ចត់បំផុត ដើម្បីស្វែងរកបណ្តាញចែកចាយបន្ត និងចាត់វិធានការតាមផ្លូវច្បាប់ឱ្យបានធ្ងន់ធ្ងរបំផុត ។ រីឯអ្នកប្រើប្រាស់ត្រូវបានដាស់តឿនឱ្យមានការប្រុងប្រយ័ត្នខ្ពស់ចំពោះការទិញគ្រឿងទេសដែលមានតម្លៃទាបខុសធម្មតា ឬទិញពីប្រភពដែលមិនគួរឱ្យទុកចិត្ត៕