ផ្អើលសង្កាត់ទន្លេបាសាក់ ខ្មាន់កាំភ្លើងជនជាតិចិនម្នាក់បានបាញ់ទៅលើនារីជនជាតិចិនដូចគ្នាបណ្តាលឱ្យរងរបួសធ្ងន់នៅក្បែរអគារ The Peakតែចាប់បាននៅក្រុងព្រះសីហនុ!

ភ្នំពេញ៖តាមបទបញ្ជារបស់នាយឧត្តមសេនីយ៍ ស ថេត អគ្គស្នងការនគរបាលជាតិ និងពីឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញកម្លាំងនគរបាលជំនាញព្រហ្មទណ្ឌ រាជធានីភ្នំពេញ សហការជាមួយកម្លាំងនគរបាលជំនាញព្រហ្មទណ្ឌ ខេត្តព្រះសីហនុ បង្រ្កាបឃាត់ខ្លួនជនសង្ស័យជនជាតិចិន១ នាក់ ដែលបានគេចខ្លួនទៅដល់ខេត្តព្រះសីហនុ ក្រោយផ្ទុះ អាវុធបណ្តាលឲ្យស្រ្តី០១នាក់រងរបួសធ្ងន់ នៅខណ្ឌចំការមន។ 

គេនៅពុំដឹងថាជារឿងទំនាស់ ឬក៏ជារឿងគំនុំនោះទេ​ ខ្មាន់កាំភ្លើងជាជនជាតិចិនបានរត់មកទាញទ្វារថយន្តរួចដកកាំភ្លើងបាញ់ទៅលើនារីរងគ្រោះម្នាក់ចំត្រង់ចង្កេះនិងពោះបណ្តាលឲ្យរងរបួសធ្ងន់ ហើយខ្មាន់កាំភ្លើងរត់គេចខ្លួនបាត់ស្រមោល​។

ហេតុការណ៍នេះបង្កការភ្ញាក់ផ្អើលដល់ប្រជាពលរដ្ឋកាលពីវេលាម៉ោង៧ និង៣០នាទីយប់ថ្ងៃទី១០ខែកុម្ភៈ ឆ្នាំ២០២៦ នៅចំណុចក្បែរអាគារ The Peak ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ ដោយនារីរងគ្រោះជាជនជាតិចិន រួមនឹងងបុរសម្នាក់ទៀតជាជនជាតិចិនដូចគ្នាត្រូវជាគូរស្នេហ៍ បានបុកឃីងហៅតាក់ស៊ីជិះខណៈតាក់ស៊ីបើកមកដល់ ក៏នារីរងគ្រោះ និងគូរស្នេហ៍បានដើរចេញពីអគារ The Peakរួចចូល ឡើង រថយន្ដតាក់ស៊ីនោះម៉ាកToyota Prius ពណ៌សពាក់ស្លាកលេខ ភ្នំពេញ 2CC-9548  ខណៈពេលចូលទៅក្នុងរថយន្តបានបិតទ្វារ ស្រាប់តែគេឃើញមានខ្មាន់កាំភ្លើងជាបុរសជនជាតិចិនម្នាក់ស្លៀកពាក់ស រត់មកដល់ទាញទ្វាររថយន្តហើយចូលទៅបាញ់នារីរងគ្រោះបណ្តាលឲ្យរងរបួសធ្ងន់។

ចំណែកឯបុរសជាគូរស្នេហ៍ខ្មាន់កាំភ្លើងមិនបានបាញ់នោះទេ ហើយក៏រត់គេចខ្លួនចេញពីកន្លែងកើតហេតុបាត់ស្រមោល ចំណែកនារីរងគ្រោះត្រូវបានរថយន្តតាក់ស៊ីដឹកយកទៅសង្រ្គោះនៅឯមន្ទីពេទ្យរដ្ឋមួយកន្លែង។

ក្រោយពេលកើតហេតុខាងលើ សមត្ថកិច្ចមូលដ្ឋានបានសហការជាមួយនឹងកម្លាំងអាវុធហត្ថខណ្ឌចំការមនចុះមកដល់ធ្វើការឃាត់បុរសជាគូស្នេហ៍រួមទាំងតៃកុងរថយន្តតាក់ស៊ីយកទៅធ្វើការសួរនាំបន្តពាក់ព័ន្ធករណីខាងលើនេះ។ចំណែកឯខ្មាន់កាំភ្លើងសមត្ថកិច្ចនឹងធ្វើការស្រាវជ្រាវដើម្បីតាមឃាត់យកមកចាត់ការបន្តតាមនីតិវិធីច្បាប់៕