សម្តេចធិបតី ហ៊ុន ម៉ាណែតប្រាប់មេទ័ពជើងទឹកអាមេរិកប្រចាំឥណ្ឌូ-ប៉ាស៊ីហ្វិក ថាកម្ពុជានឹងចូលក្រុមប្រឹក្សាសន្តិភាពតាមការអញ្ជើញ

ភ្នំពេញ៖ នៅព្រឹកថ្ងៃចន្ទ ទី២៦ ខែមករា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាទទួលធ្វើសវនាការជាមួយនាយឧត្តមនាវីសាមូអែលប៉ាប៉ារ៉ូ( Samuel Paparo) មេបញ្ជាការនៃបញ្ជាការដ្ឋានឥណ្ឌូ-ប៉ាស៊ីហ្វិក នៃកងទ័ពជើងទឹកអាមេរិកនៅវិមានសន្តិភាព។ក្នុងឱកាសនៃជំនួបនេះក្រៅពីការរំលឹកពីមិត្តភាពសម្តេចធិបតីបានបង្ហើបថាកម្ពុជានឹងចូលជាសមាជិកក្រុមប្រឹក្សាសន្តិភាពតាមការផ្ទួមផ្តើមរបស់អាមេរិក។ 

នាយឧត្តមនាវី សាមូអែលប៉ាប៉ារ៉ូ( Samuel Paparo) បានសម្តែងការពេញចិត្ត និងវាយតម្លៃខ្ពស់ចំពោះវឌ្ឍនភាពនៃទំនាក់ទំនងសហរដ្ឋអាម៉េរិក-កម្ពុជា ជាពិសេសកិច្ចសហប្រតិបត្តិការលើវិស័យការពារជាតិ។ ឯកឧត្តមបានថ្លែងអំណរគុណចំពោះរាជរដ្ឋាភិបាលកម្ពុជា ដែលបានអនុញ្ញាតឱ្យនាវាកងទ័ពជើងទឹកសហរដ្ឋអាម៉េរិកចូលចតនៅមូលដ្ឋានសមុទ្ររាម ដែលនេះជាសក្ខីភាពឆ្លុះបញ្ចាំងពីការពង្រឹងទំនាក់ទំនងយោធាកាន់តែស៊ីជម្រៅរវាងប្រទេសទាំងពីរ។

សម្តេចបវរធិបតី គូសបញ្ជាក់ថា ការចូលចតនៃនាវាជើងទឹកសហរដ្ឋអាម៉េរិកនៅកម្ពុជា នាពេលនេះ គឺជាលទ្ធផលជាក់ស្តែងនៃទំនាក់ទំនងទ្វេភាគីដែលកំពុងរីកចម្រើន។ សម្តេចបវរធិបតីមានជំនឿយ៉ាងមុតមាំថា ទំនាក់ទំនងរវាងប្រទេសទាំងពីរ នឹងត្រូវបានបន្តពង្រឹង និងពង្រីកបន្ថែមទៀត។  សម្តេចបវរធិបតី បានថ្លែងអំណរគុណយ៉ាងជ្រាលជ្រៅចំពោះ ឯកឧត្តមប្រធានាធិបតី ដូណាល់ ត្រាំ ដែលបានដើរតួនាទីយ៉ាងសំខាន់ក្នុងការជំរុញឱ្យមានបទឈប់បាញ់ កម្ពុជា-ថៃ និងបានធ្វើជាសាក្សីក្នុងពិធីចុះហត្ថលេខាលើ "សេចក្តីថ្លែងការណ៍រួមទីក្រុងគូឡាឡាំពួ" កាលពីថ្ងៃទី២៦ ខែតុលា ឆ្នាំ២០២៥ នៅប្រទេសម៉ាឡេស៊ី។

សម្តេចបវរធិបតី ក៏បានជម្រាបជូនឯកឧត្តមនាយឧត្តមនាវី ថា កម្ពុជាបានទទួលលិខិតអញ្ញើញរបស់ឯកឧត្តមប្រធានាធិបតី ដូណាល់ ត្រាំ ក្នុងការចូលរួម "ក្រុមប្រឹក្សាសន្តិភាព"។ កម្ពុជានឹងចូលរួមក្នុងក្រុមប្រឹក្សាសន្តិភាពនេះ ដែលការណ៍នេះ បានបង្ហាញនូវសុឆន្ទៈ និងការប្តេជ្ញាចិត្តខ្ពស់របស់កម្ពុជាចំពោះសន្តិភាពសកល។

អំពីការវិវត្តជាក់ស្តែង នៃស្ថានភាពព្រំដែនកម្ពុជា-ថៃ សម្តេចធិបតីបានបញ្ជាក់ពីជំហរបស់កម្ពុជា ក្នុងការគោរពបទឈប់បាញ់ និងសេចក្តីថ្លែងការណ៍រួមទីក្រុងគូឡាឡាំពួឱ្យបានខ្ជាប់ខ្ជួន និងប្រកាន់យកការដោះស្រាយជម្លោះដោយសន្តិវិធី ផ្អែកលើច្បាប់អន្តរជាតិ សន្ធិសញ្ញា និងកិច្ចព្រមព្រៀងដែលមានស្រាប់ ដើម្បីសម្រេចបាននូវព្រំដែនសន្ដិភាព និងយូរអង្វែង។

ទាក់ទងបញ្ហានេះឯកឧត្តម នាយឧត្តមនាវី Samuel Paparo បានជម្រាបជូនសម្ដេចបវរធិបតីថា ឯកឧត្តមប្រធានាធិបតី ដូណាល់ ត្រាំ នៅតែបន្តយកចិត្តទុកដាក់ចំពោះស្ថានការណ៍ព្រំដែនកម្ពុជា-ថៃ និងការអនុវត្តតាមស្មារតីនៃសេចក្ដីថ្លែងការណ៍រួមទីក្រុងគូឡាឡាំពួ។ ឯកឧត្តម Samuel Paparo បានគូសបញ្ជាក់ពីសារៈសំខាន់ប្រកបដោយការស្ថាបនានៃតួនាទីរបស់ក្រុមអ្នកសង្កេតការណ៍អាស៊ាន (AOT) និងបានជម្រាបជូនសម្ដេចបវរធិបតីថា សហរដ្ឋអាម៉េរិកបន្តគាំទ្រដល់ការបន្តយន្តការ AOT ព្រមទាំងគាំទ្រដល់ការពន្លឿនដំណើរការ JBC ក្នុងការវាស់វែង និងខណ្ឌសីមាព្រំដែននៃប្រទេសទាំងពីរ។

នៅរសៀលថ្ងៃដដែលលោក ឧបនាយករដ្ឋមន្ត្រី ទៀ សីហា រដ្ឋមន្ត្រីការពារជាតិ បានទទួលស្វាគមន៍ លោកនាយឧត្ដមនាវី សាមូអែលប៉ាប៉ារ៉ូ( Samuel Paparo) មេបញ្ជាការ បញ្ជាការដ្ឋានកងទ័ពជើងទឹកសហរដ្ឋអាម៉េរិក ប្រចាំឥណ្ឌូប៉ាស៊ីហ្វិក ដើម្បីពិភាក្សាការងារនិងទស្សនកិច្ចនៅមូលដ្ឋានសមុទ្ររាមកម្ពុជា ។ ដំណើរទស្សនកិច្ចរបស់SAMUAL PAPARO មេ ធ្វើឡើងស្របពេលដែលនាវាចម្បាំង USS CINCINNATI បានចូលសំចតរយៈពេល ៥ថ្ងៃ ចាប់ពីថ្ងៃទី២៤ ដល់ថ្ងៃទី២៨ ខែមករា ឆ្នាំ២០២៦ នៅផែលេខ២ នៅមូលដា្ឋនសមុទ្ររាម ខេត្តព្រះសីហនុ ប្រទេសកម្ពុជា។

បើតាមក្រសួងការពារជាតិ ទស្សនកិច្ចមេបញ្ជាការបញ្ជាការដ្ឋានកងទ័ពជើងទឹកអាម៉េរិក ប្រចាំឥណ្ឌូប៉ាស៊ីហ្វិក នៅកម្ពុជានាពេលនេះ គឺសំដៅធានាលើកកម្ពស់កិច្ច សហប្រតិបត្តិការរវាងយោធាប្រទេសទាំងពីរ។

«ដំណើរទស្សនកិច្ចនេះ ក៏បង្ហាញពីការប្តេជ្ញាចិត្តរបស់កម្ពុជា ក្នុងការអនុវត្តគោលនយោបាយបើកចំហ តម្លាភាព និងសហប្រតិបត្តិការជាមួយដៃគូអន្តរជាតិ ដើម្បីរួមចំណែកថែរក្សាសន្តិភាព និងស្ថិរភាពតំបន់ផងដែរ។»។ ក្រសួងការពារជាតិ បន្ថែមដូច្នេះ ដោយបញ្ជាក់ទៀតថា កងទ័ពជើងទឹកកម្ពុជាត្រៀមខ្លួនរួចជាស្រេចជានិច្ច ក្នុងការពង្រឹងកិច្ចសហប្រតិបតិត្តការជាមួយ កងទ័ពជើងទឹកអាម៉េរិក ហើយក៏ស្វាគមន៍វត្តមាននាវាកងទ័ពជើងទឹកអាម៉េរិក មកកាន់កម្ពុជាបន្ថែមទៀតដែរ។

ស្ថានទូតអាមេរិក​នៅភ្នំពេញបានឲ្យដឹងថា  លោកឧត្តម​នាវី Paparo ដែលបានជួបជាមួយលោកនាយករដ្ឋមន្រ្តី ហ៊ុន ម៉ាណែត គឺដើម្បីពិភាក្សាពីទំនាក់ទំនងកម្ពុជា សហរដ្ឋអាមេរិក​ ក្នុងវិស័យការពារជាតិ និងវិធីពង្រឹងចំណងទាក់ទងទ្វេភាគីរបស់យើង និងការការគាំទ្រដល់ស្ថិរភាពតំបន់។ កិច្ចពិភាក្សាបានផ្តោតលើការសន្ទនា ទំនុកចិត្តគ្នា​និងស្ថិរភាព​តំបន់។ សហរដ្ឋអាមេរិក និងកម្ពុជានឹងធ្វើការប្រកៀកស្មាគ្នា ដើម្បីលើកស្ទួយតំបន់ឥណ្ឌូប៉ាស៊ីហ្វិកដែលមានភាពសេរី និងបើកចំហ។

មុនឆ្នាំ២០២៤ កម្ពុជា និងអាមេរិក ហាក់មានការមិនយល់ចិត្តគ្នាមួយចំនួនលើបញ្ហាមូលដ្ឋានសមុទ្ររាម ដោយមានការចោទប្រកាន់ថា កម្ពុជា ផ្តល់មូលដ្ឋានសមុទ្ររាមជាទីតាំងឈរជើងរបស់កងទ័ពជើងទឹកចិន ក្នុងគ្រាដែលកម្ពុជាកែលំអមូលដ្ឋាននេះ ឱ្យកាន់តែល្អប្រសើរ។ប៉ុន្តែចាប់ពីឆ្នាំ២០២៤មក ទំនាក់ទំនងហាក់ល្អប្រសើរឡើងវិញ ហើយនាវាចម្បាំងអាមេរិក ក៏ចូលមកកាន់សមុទ្រកម្ពុជាវិញ ក្រោយខកខានជាច្រើនឆ្នាំ៕