មិនហ៊ានរករឿងថៃអភិបាលខេត្ដកោះកុងអំពាវនាវឱ្យពលរដ្ឋធ្វើនេសាទនៅតំបន់ជិតៗក្នុងដែនសមុទ្រកម្ពុជាកុំឲ្យថៃចោទថាចូលដីគេ!

​ខេត្តកោះកុង៖លោកស្រី ឈី វ៉ា អភិបាលខេត្តកោះកុង បានអំពាវនាវឱ្យពលរដ្ឋអ្នកនេសាទឲ្យធ្វើនេសាទនៅតំបន់ជិតៗក្នុងដែនសមុទ្រកម្ពុជា ចៀសវាងចូលជ្រៅដែលអាចឱ្យថៃចោទប្រកាន់ថា ចូលដែនគ្រប់គ្រងរបស់គេ។ 

នៅក្នុងពិធីសំណេះសំណាលជាមួយប្រជានេសាទនៅក្រុងខេមរភូមិន្ទ និងស្រុកមណ្ឌលសីមា នៃខេត្តកោះកុង កាលពីថ្ងៃទី៧ ខែមករា ឆ្នាំ២០២៦លោកស្រីអភិបាលខេត្តកោះកុងបានបញ្ជាក់ថា៖ “មុននេះបងប្អូនបានស្តាប់នូវគោលការណ៍ពាក់ព័ន្ធនានាជាមួយការចុះបញ្ជីទូកនេសាទ ការសុំច្បាប់ធ្វើនេសាទ និងការធ្វើចរាចរណ៍ផ្លូវទឹក។ ទាំងអស់នេះ ជាគោលការណ៍ដែលច្បាប់កំណត់។ នាងខ្ញុំសូមអំពាវនាវបងប្អូនប្រជានេសាទទាំងអស់ចូលរួមអនុវត្តឱ្យបានត្រឹមត្រូវតាមគោលការណ៍កំណត់របស់ច្បាប់។”

លោកស្រីបន្ថែមថា៖ “នាងខ្ញុំសូមអំពាវនាវបងប្អូនយើង សូមធ្វើនេសាទនៅតំបន់ជិតៗក្នុងដែនសមុទ្រយើង ចៀសវាងចូលជ្រៅ ដែលអាចឱ្យភាគីថៃចោទប្រកាន់ថាចូលដែនគ្រប់គ្រងរបស់គេ។ ក្នុងស្ថានភាពបែបនេះ សូមបងប្អូនចូលរួមទាំងអស់គ្នា កុំធ្វើអ្វីដែលបង្កឱ្យគេចោទប្រកាន់យើងបាន។”លោកស្រីអភិបាលខេត្តកោះកុងមិនបានបញ្ជាក់ថាដែនទឹកកមក្ពុជាមានត្រឹមណានោះទេ?។

ជាការកត់សម្គាល់ ការអំពាវនាវរបស់អភិបាលខេត្ដកោះកុងខាងលើនេះ បន្ទាប់ពីមានប្រជានេសាទកម្ពុជា៤រូបនិងទូកនេសាទ ត្រូវបានសមត្ថកិច្ចថៃចាប់ខ្លួនកាលពីថ្ងៃទី៦ ខែមករា ឆ្នាំ២០២៦។ ទាក់ទងនឹងការចាប់ខ្លួននេះលោកស្រីមិនបានបញ្ជាក់មូលហេតុនោះទេ ប៉ុន្ដែលោកស្រីបញ្ជាក់ដោយខ្លីថា អាជ្ញាធរនិងសមត្ថកិច្ចគ្រប់ថ្នាក់កំពុងដោះស្រាយ ហើយសូមរក្សាការសម្ងាត់នូវព័ត៌មានមួយចំនួនដែលជាកិច្ចការជំនាញ។

កាលពីថ្ងៃទី៧ ខែមករាម្សិលមិញនេះ លោកស្រី ឈី វ៉ា ក៏បានជួបសំណេះសំណាលសួរសុខទុក្ខ និងផ្តល់ព័ត៌មានដល់ក្រុមគ្រួសារប្រជានេសាទទាំងបួនរូបផងដែរ។ លោកស្រីសង្ឃឹមថា ប្រជានេសាទទាំង៤រូបនឹងអាចវិលត្រលប់មកលំនៅឋានវិញក្នុងពេលឆាប់ៗខាងមុខ។ ហេតុនេះ សូមមានទំនុកចិត្តនិងជឿជាក់លើការខិតខំយកចិត្តទុកដាក់របស់ថ្នាក់ដឹកនាំ ហើយសូមកុំបង្កើតព័ត៌មានក្លែងក្លាយ ជាព័ត៌មានមិនពិតមានលក្ខណៈញុះញង់បង្កចលាចល ព្រោះវាមិនបានជួយអ្វីដល់ការរកដំណោះស្រាយនោះទេ។

លោកស្រីអភិបាលខេត្ដបានលើកឡើងដែរថា ក្នុងស្ថានភាពនៃទំនាស់ព្រំដែនរវាងកម្ពុជា-ថៃនៅមានលក្ខណៈស្រួចស្រាល់នៅឡើយ ជាពិសេសក្នុងកាលៈទេសៈដែលភាគីទាំងសងខាងត្រូវគោរពឱ្យបានម៉ឺងម៉ាត់នូវបទឈប់បាញ់ ដែលចុះហត្ថលេខាកាលពីថ្ងៃទី២៧ ខែធ្នូ ឆ្នាំ២០២៥ លោកស្រីសំណូមពរប្រជាពលរដ្ឋចូលរួមជាមួយរាជរដ្ឋាភិបាល ជាមួយអាជ្ញាធរគ្រប់ថ្នាក់ ក្នុងគោលដៅរក្សាបានល្អនូវបទឈប់បាញ់នេះ។ លោកស្រីថា រាជរដ្ឋាភិបាលបាននិងកំពុងខិតខំរកដំណោះស្រាយគ្រប់វិធី ទាំងសមរភូមិប្រយុទ្ធ និងសមរភូមិការទូត ដើម្បីដោះស្រាយបញ្ហាព្រំដែននិងបញ្ហាអរិភាពនានាជាមួយប្រទេសថៃដោយសន្តិវិធី៕