លោកអភិសន្តិបណ្ឌិត ស សុខា ជួបសួរសុខទុក្ខប្អូនស្រីពលករខ្មែរ ធ្វើការងារនៅប្រទេសថៃ ត្រូវបានទាហានឈុតខ្មៅរបស់ថៃ រំលោភបំពានលើរាងកាយពេលវិលត្រឡប់មកស្រុកវិញ!

បាតដំបង៖នៅថ្ងៃទី១៧ ខែវិច្ឆិកា ឆ្នាំ២០២៥ នេះ ក្នុងដំណើរការងារទៅកាន់ខេត្តបន្ទាយមានជ័យ ចែកអំណោយជនភៀសសឹកព្រៃចាន់លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ បានឆ្លៀតចូលសួរសុខទុក្ខប្អូនស្រីពលករខ្មែរ ធ្វើការងារនៅប្រទេសថៃ ដែលត្រូវបានទាហានឈុតខ្មៅរបស់ថៃ រំលោភបំពានលើរាងកាយ ក្នុងពេលនាង និងពលករខ្មែរប្រុសស្រី ១៣នាក់ ធ្វើដំណើរវិលត្រឡប់ពីប្រទេសថៃ មកកម្ពុជាវិញកាលពីថ្ងៃទី១៥វិច្ឆិកាតាមច្រករបៀងស្រុកកំរៀង។ 

លោកសសុខាបានជម្រុញឲ្យមានកិច្ចសហការប្តឹងទៅនគរបាលថៃលើករណីយ៍នេះ។បើតាមលោកទូច សុឃៈ អ្នកនាំពាក្យរងក្រសួងមហាផ្ទៃបានបញ្ជាក់ថា ជានីតិវិធី និងជាវិធានការ អគ្គស្នងការដ្ឋាននគរបាលជាតិ ក្រសួងមហាផ្ទៃ នឹងធ្វើបណ្តឹងទៅកាន់អគ្គស្នងការដ្ឋាននគរបាលជាតិថៃ, ធ្វើបណ្តឹងតវ៉ាតាមរយៈទូត និងធ្វើបណ្តឹងតវ៉ាតាមរយៈអង្គការអន្តរជាតិ ដើម្បីឱ្យសមត្ថកិច្ចថៃតាមចាប់អ្នកប្រព្រឹត្តល្មើសមកអនុវត្តទោស ព្រោះនេះជាអំពើមិនអាចទទួលយកបាន។សម្រាប់ជាការឃោសនាភាគីយោធាថៃភូមិភាគទី១បានចេញមកបដិសេធថាជាមិនពិត។