លោកប្រាក់សុខុនអរគុណអន្តរជាតិនិងរំលឹកពីសកម្មភាពរំលោភបទឈប់បាញ់នៅវេទិការអង្គការសហប្រជាជាតិ

អាមេរិក៖លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ ថ្លែងក្នុងឱកាសសម័យប្រជុំលើកទី៨០ នៃមហាសន្និបាតអង្គការសហប្រជាជាតិ មូលបទ «រួមគ្នាដើម្បីភាពប្រសើរឡើង៖ ៨០ឆ្នាំ និងច្រើនឆ្នាំទៀត ដើម្បីសន្តិភាព ការអភិវឌ្ឍ និងសិទ្ធិមនុស្ស» នាយប់ថ្ងៃទី២៧ ខែកញ្ញា ឆ្នាំ២០២៥ (ម៉ោងនៅកម្ពុជា)។ 

លោករដ្ឋមន្ត្រីលើកឡើងថា សម្រាប់ឆ្នាំនេះមិនមែនគ្រាន់តែជាពាក្យស្លោកប៉ុណ្ណោះទេប៉ុន្តែគឺជាការក្រើនរំលឹកជាឧឡាឬកនូវការសន្យាថាអង្គការសហប្រជាជាតិបនឆងបន្តរស់រានបានដរាបណាតែយើងរួមគ្នាថែរក្សាឲ្យបានគង់វង់នូវសាមគ្គីភាពរវាងប្រទេសនិងប្រទេស ក៏ដូចជាប្រជាជននិងប្រជាជន ហើយការវាសវែងនូវភាពជោគជយ័គឺមិនត្រូវគិតចង្អៀតត្រឹមកំរឹតថ្នាក់ជាតិប៉ុណ្ណោះទេ តែត្រូវគិតអំពីសុខមាលភាពរួមនៃប្រជាពលរដ្ឋរបស់ពិភពលោកទាំងមូល។

ទាក់ទងនិងបញ្ហាសន្តិភាពអន្តរជាតិលោកប្រាក់សុខុនបានគូសបញ្ជាក់ថា៖យើងខ្ញុំនៅតែដឹងគុណជានិច្ចចំពោះបណ្តាប្រទេសជាច្រើន រួមទាំងតាមរយ:បេសកកម្មថែរក្សាសន្តិភាពរបស់អង្គការសហប្រជាជាតិ(UNPKO) ដែលបានផ្តល់ការគាំទ្រដល់កម្ពុជាក្នុងអំឡុងនៃដំណើរការស្វែងរកសន្តិ។

សម្រាប់សង្គ្រាមជាមួយថៃនិងការឈប់បាញ់លោកប្រាក់សុខុនបានមានប្រសាសន៍ថា ការបណ្តេញពលរដ្ឋកម្ពុជាដោយបង្ខំ ការគំរាមកំហែងប្រើច្បាប់ជាតិ (ច្បាប់អាជ្ញាសឹក) ប្រឆាំងនឹងពលរដ្ឋខ្មែរ និងការបណ្តេញប្រជាជនកម្ពុជារាប់រយគ្រួសារទៀតចេញពីភូមិដ្ឋាន ដែលពួកគេបានរស់នៅអាស្រ័យផលអស់រាប់ទសវត្សមកហើយ គឺជាបញ្ហាព្រួយបារម្ភបំផុត។

លោកឧបនាយករដ្ឋមន្ត្រី បន្តថា ការចូលកាន់កាប់ទឹកដីនៅលើតំបន់ដែលមិនទាន់ត្រូវបានខណ្ឌសីមាព្រំដែន បង្ហាញឱ្យឃើញយ៉ាងជាក់ច្បាស់ពីការមិនគោរពចំពោះលក្ខខណ្ឌនៃបទឈប់បាញ់ ក៏ដូចជាកិច្ចព្រមព្រៀងទាំងសងខាងផ្សេងៗទៀត ពាក់ព័ន្ធការដោះស្រាយបញ្ហាព្រំដែនផងដែរ។

លោក ប្រាក់ សុខុន ចាត់ទុកទង្វើខាងលើនេះ បានរំលោភលើអធិបតេយ្យ និងបូរណភាពទឹកដីរបស់កម្ពុជា ហើយជាមួយគ្នានេះ សិទ្ធិ និងសេចក្តីថ្លៃថ្នូររបស់ប្រជាជនកម្ពុជាជាច្រើន ក៏ត្រូវបានបំពាន។

ជាមួយគ្នានោះ លោករដ្ឋមន្ត្រីការបរទេស បានបញ្ជាក់ដែរថា កម្ពុជាបានអនុវត្តយ៉ាងម៉ឺងម៉ាត់នូវបទឈប់បាញ់ ដោយបង្ហាញសុឆន្ទៈ និងតម្លាភាពពេញលេញក្នុង ការអនុវត្តលក្ខខណ្ឌនៃបទឈប់បាញ់ និងរក្សាភាពអត់ធ្មត់ជាទីបំផុតចំពោះមុខការបង្ករឿង និងការរំលោភ បំពានម្តងហើយម្តងទៀត។ ជាក់ស្តែង នៅព្រឹកថ្ងៃទី២៧ ខែកញ្ញា ឆ្នាំ២០២៥ នេះ មានការវាយប្រហារមួយ កន្លែងដោយមិនញញើត នៅជិតទីតាំងដ៏រសើបមួយ ដោយចោទប្រកាន់ថា កងកម្លាំងរបស់កម្ពុជាបានបើក ការបាញ់ប្រហារមុន។ កងទ័ពកម្ពុជាមិនបានបាញ់ និងបានរក្សាភាពអត់ធ្មត់មិនឆ្លើយតបវិញទេ ដើម្បីបញ្ជាក់ ពីការប្តេជ្ញាចិត្តដ៏មោះមុតចំពោះសន្តិភាព។

ក្នុងស្មារតីដូចកាលពីបានបញ្ចប់សង្គ្រាមជិតបីទស្សវត្សរ៍កន្លងមក កម្ពុជាសូមអំពាវនាវឱ្យមានកិច្ច សន្ទនា ការដោះស្រាយជម្លោះដោយសន្តិវិធី ដោយគោរពយ៉ាងម៉ឺងម៉ាត់ និងស្មោះត្រង់ចំពោះលក្ខខណ្ឌដែល បានព្រមព្រៀងនៃបទឈប់បាញ់ ការគោរពពេញលេញចំពោះកិច្ចព្រមព្រៀងទ្វេភាគី ច្បាប់អន្តរជាតិ ធម្មនុញ្ញអង្គការសហប្រជាជាតិ និងធម្មនុញ្ញអាស៊ាន។

សូមបញ្ជាក់ថាការថ្លែងរបស់រដ្ឋម​ន្ត្រីការបរទេសកម្ពុជាគឺបានធ្វើឡើងបន្ទាប់ពីមានកិច្ចប្រជុំ ១+៣ រវាងអនុរដ្ឋមន្ត្រីការបរទេសអាម៉េរិក និងរដ្ឋមន្ត្រីការបរទេសកម្ពុជា ម៉ាឡេស៊ី និងថៃ នៅទីក្រុងញូវយ៉ក ដែលផ្តួចផ្តើម និងរៀបចំដោយក្រសួងការបរទេសសហរដ្ឋអាម៉េរិក ក្នុងគោលបំណងបញ្ជាក់ឡើងវិញនូវការប្តេជ្ញាចិត្តរួម ក្នុងការដោះស្រាយជម្លោះព្រំដែនដោយសន្តិវិធី តាមរយៈការស្តារឡើងវិញនូវទំនុកចិត្ត ឆ្ពោះទៅប្រក្រតីភាពឡើងវិញ ដើម្បីផលប្រយោជន៍រួមសម្រាប់ប្រទេស និងប្រជាជនទាំងពីរ នារសៀលថ្ងៃទី២៦ ខែកញ្ញា ឆ្នាំ២០២៥ នៅទីក្រុងញូវយ៉ក។