នាយករដ្ឋមន្ត្រីបង្កើតក្រុមការងារចំពោះកិច្ចសម្របសម្រួលទំនាក់ទំនង ពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាម៉េរិក!
30-March-2025 / សេដ្ឋកិច្ច
ភ្នំពេញ៖ ក្រសួងពាណិជ្ជកម្មកម្ពុជា នៅរសៀលថ្ងៃទី១០ ខែមេសា ឆ្នាំ២០២៥នេះ បានចេញសេចក្តីប្រកាសព័ត៌មាន បង្ហាញវឌ្ឍនភាពចុងក្រោយលើការអនុវត្តពន្ធគយបដិការ (Reciprocal Tariffs) របស់សហរដ្ឋអាម៉េរិក។
ក្រសួងពាណិជ្ជកម្ម បានបញ្ជាក់ថា រាជរដ្ឋាភិបាលកម្ពុជាដែលមានក្រសួងពាណិជ្ជកម្ម និងក្រសួង-ស្ថាប័នពាក់ព័ន្ធជាសេនាធិការ បាននិងកំពុងបន្តផ្តល់ការយកចិត្តទុកដាក់យ៉ាងគត់មត់ តាមដានការវិវត្តនៃការអនុវត្តពន្ធគយបដិការ (Reciprocal Tariffs) របស់សហរដ្ឋ អាម៉េរិក និងត្រៀមរៀបចំយន្តការស្វែងរកដំណោះស្រាយ សមស្របជាមួយសហរដ្ឋអាម៉េរិក។
ក្រសួងពាណិជ្ជកម្ម សូមជម្រាបជូនអំពីវឌ្ឍនភាពចុងក្រោយ លើការអនុវត្តពន្ធគយបដិការ ដូចខាងក្រោម៖១៖ យោងតាមការចុះផ្សាយរបស់សេតវិមាន កាលពីថ្ងៃទី៩ ខែមេសា ឆ្នាំ២០២៥ (ម៉ោងនៅសហរដ្ឋអាម៉េរិក) ប្រធានាធិបតី Donald J. Trump បានប្រកាសព្យួរការអនុវត្តពន្ធគយបដិការរបស់ខ្លួន មកត្រឹមអត្រា ១០% ក្នុងរយៈពេល ៩០ថ្ងៃ សម្រាប់គ្រប់ប្រទេសទាំងអស់ ដែលបានស្នើសុំចរចាស្វែងរកដំណោះស្រាយ ជាមួយសហរដ្ឋអាម៉េរិក ក្នុងនោះរួមមានកម្ពុជាផងដែរ។ ដូចនេះ អត្រាពន្ធគយបដិការ ៤៩% សម្រាប់កម្ពុជានឹងអនុវត្តមកត្រឹមអត្រា ១០% តែប៉ុណ្ណោះ។
២៖ រាជរដ្ឋាភិបាលទទួលបានចម្លើយជាវិជ្ជមាន ពីភាគីសហរដ្ឋអាម៉េរិកលើសំណើសុំបើកការចរចាស្វែងរកដំណោះស្រាយរួម បន្ទាប់ពីរាជរដ្ឋាភិបាលបានដាក់ចេញនូវការឆ្លើយតបភ្លាមៗ តាមរយៈលិខិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ចុះថ្ងៃទី៤ ខែមេសា ឆ្នាំ២០២៥ និងលិខិតរបស់លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម ចុះថ្ងៃទី៤ ខែមេសា ឆ្នាំ២០២៥ ដោយបង្ហាញសុច្ឆន្ទៈស្នើសុំបើកការចរចាស្វែងរកដំណោះស្រាយរួម និងបញ្ចុះពន្ធគយពីអាត្រា ៣៥% មកត្រឹម ៥% លើ ១៩ ក្រុមមុខទំនិញរបស់សហរដ្ឋអាមេរិកនាំចូលមកកម្ពុជា។
៣៖ ក្រុមការងារអន្តរក្រសួង-ស្ថាប័នចំពោះកិច្ច ដឹកនាំដោយលោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងភាគីសហរដ្ឋអាមេរិក នឹងបើកការចរចានាពេលឆាប់ៗ ខាងមុខនេះ.។
សូមបញ្ជាក់ថាសម្តេចធិបតីហ៊ុនម៉ាណែតនៅថ្ងៃទី១០មេសាបានសេចក្តីសម្រេច ស្តីពីការបង្កើតក្រុមការងារចំពោះកិច្ចសម្របសម្រួលទំនាក់ទំនង ពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាម៉េរិក។ក្រុមការងារចំពោះកិច្ចសម្របសម្រួលទំនាក់ទំនងពាណិជ្ចកម្ម និងវិនិយោគទ្វេភាគីកម្ពុជា-សហរដ្ឋអាមេរិច ដឹកនាំដោយឯកឧត្តមឧបនាយករដ្ឋមន្ត្រី ស៊ុន ចាន់ថុល មានភារកិច្ចក្នុងការសម្របសម្រួល ចរចា និងជំរុញទំនាក់ទំនងពាណិជ្ជកម្មទ្វេភាគីកម្ពុជា-សហរដ្ឋអាមេរិច, សម្របសម្រួល និងជំរុញការវិនិយោគរបស់សហរដ្ឋអាមេរិចនៅកម្ពុជា, សហការសម្របសម្រួលជាមួយក្រសួង ស្ថាប័នពាក់ព័ន្ធ ស្ថានទូតនៃព្រះរាជាណាចក្រកម្ពុជាប្រចាំសហរដ្ឋអាមេរិច និងសភាពាណិជ្ជកម្មសហរដ្ឋអាមេរិចប្រចាំកម្ពុជា, សិក្សាវាយតម្លៃ លើកយោបល់ និងធ្វើរបាយការណ៍នៃលទ្ធផលការងារជូនប្រមុខរាជររដ្ឋាភិបាល។
ការបង្កើតក្រុមការងារចំពោះកិច្ចនេះគឺបន្ទាប់ពីប្រធានាធិបតីអាមេរិក លោក ដូណាល់ ត្រាំ កាលពីថ្ងៃពុធ ទី៩ ខែមេសា បានប្រកាសពីការផ្អាកការអនុវត្តការយក ពន្ធគយលើបណ្ដាប្រទេសភាគច្រើន លើកលែងតែចិនដែលត្រូវបានលោកយកពន្ធ បន្ថែមដល់១២៥ភាគរយ។ប្រទេសដែលផ្អាកយកពន្ធខ្ពស់រយៈពេល៩០ថ្ងៃនោះ ក្នុងនោះក៏មានប្រទេសកម្ពុជាយើង គឺអនុវត្តយកពន្ធទៅមកត្រឹមតែ១០ភាគរយប៉ុណ្ណោះ រហូតដល់ខែកក្កដា។
ក្រោយប្រកាន់ជំហរតឹងរ៉ឹងអស់រយៈពេលជាច្រើនថ្ងៃជុំវិញផែនការយកពន្ធគយ លោក ត្រាំ បានប្រកាសថា ប្រទេសទាំងឡាយណាដែលមិនបានចាត់វិធានការយកពន្ធសងសឹកប្រឆាំងនឹង ការយកពន្ធរបស់សហរដ្ឋអាមេរិក នឹងទទួលបានលើកលែង ដោយបណ្ដាប្រទេសដែលត្រូវបានលោកប្រកាសយកពន្ធក្នុងកម្រិតខ្ពស់ នឹងត្រូវប្រឈមនឹងការអនុវត្តការយកពន្ធទៅមកត្រឹមតែ១០ភាគរយប៉ុណ្ណោះ រហូតដល់ខែកក្កដា។នៅក្នុងសន្និសីទសារព័ត៌មាន អ្នកនាំពាក្យសេតវិមាន លោកស្រី Karoline Leavitt បាននិយាយថាលោក ត្រាំ បានដំឡើងពន្ធលើចិន ដោយសារតែ «នៅពេលដែលអ្នកហ៊ានដាល់ ឬតដៃជាមួយសហរដ្ឋអាមេរិក នោះលោកប្រធានាធិបតី ត្រាំ នឹងលេងឱ្យចាស់ដៃ»។
លោកត្រាំ បានលើកឡើងដែរថា ប្រទេសជាង៧៥ បានបញ្ជូនមន្ត្រីសុំចរចាពីបញ្ហាពន្ធនេះជាមួយសហរដ្ឋអាម៉េរិក ហើយជាលទ្ធផលរដ្ឋាភិបាលអាម៉េរិកបានសម្រេចពន្យារពេលអនុវត្តន៍ពន្ធថ្មីចំនួន៩០ថ្ងៃ ហើយបន្ធូរបន្ថយមកនៅត្រឹម១០ភាគរយចំពោះប្រទេសដែលស្នើសុំចរចាជាមួយសហរដ្ឋអាម៉េរិក ដោយនឹងត្រូវចូលជាធរមានភ្លាមៗដែរ ។ដ្ឋមន្ត្រីក្រសួងរតនាគារសហរដ្ឋអាមេរិក Scott Bessent ពន្យល់ពីមូលហេតុដែលប្រធានាធិបតី Donald Trump ពន្យារពេលពន្ធគយរយៈពេល 90 ថ្ងៃសម្រាប់ដៃគូចំនួន 75 ដែលមិនសងសឹក។
ពន្ធដ៏តឹងតែងដែលបានប្រកាសដោយប្រធានាធិបតីអាមេរិក Donald Trump កាលពីសប្តាហ៍មុន មិនមែនគ្រាន់តែជាការសងសឹកពាណិជ្ជកម្មនោះទេ វាគឺជា “យុទ្ធសាស្ត្រចរចា” ដែលបានគណនាយ៉ាងប្រុងប្រយ័ត្ន។
នោះគឺជាសេចក្តីថ្លែងការណ៍ដ៏គួរឲ្យកត់សម្គាល់របស់រដ្ឋមន្ត្រីរតនាគារអាមេរិក Scott Bessent ក្នុងសន្និសីទសារព័ត៌មានមួយនៅរសៀលថ្ងៃទី៩ ខែមេសា បន្ទាប់ពីលោកប្រធានាធិបតី Donald Trump បានប្រកាសផ្អាកពន្ធគយភាគច្រើនរយៈពេល ៩០ ថ្ងៃ។ “យើងបានឃើញយុទ្ធសាស្ត្រចរចាដ៏ជោគជ័យរបស់ប្រធានាធិបតី Trump – វាបាននាំប្រទេសជាង 75 ទៅកាន់តុចរចា” CBS បានដកស្រង់សម្តីរដ្ឋមន្ត្រី Bessent ដែលសង្កត់ធ្ងន់ដោយសំដៅទៅលើពន្ធគយដែលបានប្រកាសនៅថ្ងៃទី 2 ខែមេសា។
យោងតាមលោក Bessent សហរដ្ឋអាមេរិកបានត្រៀមខ្លួនរួចជាស្រេចក្នុងការស្តាប់ប្រទេសណាដែលមានឆន្ទៈក្នុងការចរចា ហើយនឹងកាត់បន្ថយពន្ធដល់កម្រិតមូលដ្ឋានចំនួន 10% សម្រាប់ប្រទេសទាំងនោះ ស្របពេលដែលបញ្ជាក់ថា សហរដ្ឋអាមេរិកនឹងបន្តធ្វើការជាមួយដៃគូដើម្បីស្វែងរកដំណោះស្រាយប្រកបដោយនិរន្តរភាព។សម្រាប់ការផ្អាកនេះវិញបើតាមប្រធានធនាគារមីរ៉ាបោត( Mirabaud )លោកចនផ្លាសាដ( John Plassard )បានវាតម្លៃថាក្រុមជំនិតរបស់លោកដូណាល់ត្រាំ បានសាកល្បងឆ្លើយដោះសារនៅចំពោះទង្វើដែលបានធ្វើពិភពលោកទាំងមូលភ្ញាក់ផ្អើល តែមូលហេតុពិតនៅពីក្រោយការប្តូរផ្លាស់នយោបាយដំឡើងអត្រាពន្ធគយ គឺដោយសារស្ថានភាពសេដ្ឋកិច្ចជាក់ស្តែងនិងផលវិបាកនៃនយោបាយដំឡើងពន្ធ។
ប្រជាពលរដ្ឋអាមេរិក រំពឹងលើទ្រព្យធនពីរ គឺអចលទ្រព្យនិងភាគហ៊ុន។ បើតម្លៃអចលនទ្រព្យ ឬភាគហ៊ុនធ្លាក់ចុះ វាច្បាស់ជាប៉ះពាល់ដល់ជីវភាពរបស់ពលរដ្ឋដែលអាចធ្វើឱ្យលោកត្រាំចាញ់ នៅពេលបោះឆ្នោតពាក់កណ្តាលអាណត្តិគ្រោងធ្វើនៅឆ្នាំ២០២៦។ នេះបើតាមនាយកធនាគារដដែល។ អ្នកវិភាគនិងអ្នកជំនាញផ្សេងទៀត ក៏យល់ដូចគ្នាថា លោកដូណាល់ត្រាំមិនអាចប្រឈមនឹងភាពស្លន់ស្លោរបស់ទីផ្សារភាគហ៊ុនពិភពលោកដែលជ្រួលច្របល់និងដាំក្បាលចុះយ៉ាងខ្លាំងបានទេ។
.jpg&h=97&w=146)
.jpg&h=97&w=146)
