ផ្លូវ៦០ម៉ែត្រ ក្លាយជាផ្លូវមរណៈទោះបីជាសមត្តកិ្ចសូត្រមន្តរំដោះគ្រោះក៏ដោយ ?
01-March-2025 / សន្តិសុខសង្គម
ភ្នំពេញ៖អាណិតប្រពន្ធដែលប្តីស្លាប់ដោយគ្រោះថ្នាក់ចរាចរណ៍កាលពី វេលាម៉ោងប្រមាណ៧:៤០នាទី យប់ថ្ងៃទី១៩ មករាឆ្នាំ២០២៥នៅផ្លូវ៦០ម៉ែត្រ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ ។
អាណិតនៅត្រង់ថា ប្តីស្លាប់យំស្ទើរតែសន្លប់ហើយ បែរជាត្រូវរថយន្តសង្គ្រោះមណ្ឌលសុខភាពចាក់អង្រែក្រោម ឆ្លៀតទារលុយថ្លៃដឹកសពទៅដល់ផ្ទះចំនួន២០០ដុល្លារទៀត គ្រាដែលគ្រួសារនេះក្រីក្រ! ។សូមបញ្ជាក់ថាករណីគ្រោះថ្នាក់ចរាចរណ៍នេះបានកើតឡើងរវាងរថយន្តរថយន្ដ Ford Ranger បើកឆ្លងផ្លូវបណ្តាលឱ្យម៉ូតូ HONDA Beat បើកបុកចំពីមុខបណ្តាលឱ្យបុរសបើកបរម៉ូតូបានស្លាប់ភ្លាមៗនៅនឹងកន្លែងកើតហេតុ ស្ថិតនៅតាមបណ្តាយផ្លូវ៦០ម៉ែត្រ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុ បានឱ្យដឹងថា ក្នុងករណីនេះ គេឃើញរថយន្ត Ford Ranger ពណ៌ស ពាក់ស្លាកលេខ ភ្នំពេញ 2BP-0636 បើកឆ្លងផ្លូវត្រង់ចំណុចផ្លូវចូលទៅកាន់ខណ្ឌមានជ័យ ស្រាប់តែមានម៉ូតូមួយគ្រឿងម៉ាក HONDA Beat ពណ៌ស លាយក្រហម ពាក់ស្លាកលេខ ព្រះសីហនុ 1K-9694 បើកបរដោយបុរសម្នាក់មិនស្គាល់អត្តសញ្ញាណ បើកបុកចំពីមុខរថយន្តបណ្តាលឱ្យខ្ទាតផ្លោងទៅចិញ្ចើមផ្លូវ និងបានស្លាប់ភ្លាមៗ។ ក្រោយកើតហេតុ រថយន្តសង្គ្រោះបន្ទាន់ធ្វើការវេចខ្ចប់ និងរក្សាទុកសម្រាប់ឱ្យក្រុមគ្រួសារមកទទួលយក។
សូមបញ្ជាក់ថា ក្នុងឆ្នាំ២០២៥ គ្រោះថ្នាក់ចរាចរណ៍នៅតាមបណ្តោយផ្លូវ៦០ម៉ែត្រ បានក្លាយជាការចាប់អារម្មណ៍ពីសំណាក់ប្រជាពលរដ្ឋ ដោយសារផ្លូវនេះ បានកើតមានករណីគ្រោះថ្នាក់បណ្តាលឱ្យស្លាប់ជាបន្តបន្ទាប់ ដូចជាករណីតារាចម្រៀងរ៉េប លោក Ruth ko បើកម៉ូតូបុកឡានដែលបត់ឆ្លងផ្លូវ។ករណីមួយគ្រួសារមានគ្នា ៤នាក់ ត្រូវរថយន្តបង្កបើកក្នុងស្ថានភាពស្រវឹង បុកបណ្តាលឱ្យស្លាប់ឪពុក កូនប្រុសស្រី នៅសល់តែម្តាយរបួសធ្ងន់ពិការជើងម្ខាង ត្រូវយកទៅព្យាបាលនៅស្រុកយួននិងករណីយប់នេះបណ្តាលឱ្យបុរសម្នាក់ស្លាប់មួយករណីទៀត។
ទាក
ទងរឿងនេះក្នុងកិច្ចសម្ភាសនៅរសៀលថ្ងៃទី២០ ខែមករា ឆ្នាំ២០២៥នេះ លោកឧត្តមសេនីយ៍ឯក ជួន ណារិន្ទ បានទទួលស្គាល់ថា គ្រោះថ្នាក់ចរាចរណ៍នៅតាមបណ្ដោយផ្លូវ៦០ម៉ែត្រ បានក្លាយជាក្ដីកង្វល់មួយរបស់សមត្ថកិច្ច និងប្រជាពលរដ្ឋអ្នកប្រើប្រាស់ផ្លូវ។ ក្រោយមានហេតុការណ៍ជាបន្ដបន្ទាប់ និងបណ្ដាលឲ្យមានអ្នកស្លាប់យ៉ាងអណោចអធម៌នោះ ទាំងក្រសួងសាធារណការ និងដឹកជញ្ជូន និងរដ្ឋបាលរាជធានីភ្នំពេញ ព្រមទាំងសមត្ថកិច្ចជំនាញ បានរៀបចំបាញ់គំនូសសញ្ញាចរាចរណ៍ឡើងវិញផងដែរ។
ស្នងការនគរបាលរាជធានីភ្នំពេញរូបនេះ បានសង្កត់ធ្ងន់ទៀតថា ក្រោយការរៀបចំបាញ់គំនូសសញ្ញាចរាចរណ៍ឡើងវិញហើយនោះ លោកបានបញ្ជាកម្លាំងបន្ដការរឹតបន្ដឹងច្បាប់ចរាចរណ៍នៅលើកំណាត់ផ្លូវនេះផងដែរ តាមរយៈការកំណត់បាញ់ល្បឿនចំពោះមធ្យោបាយធ្វើចរាចរណ៍ និងពិនិត្យជាតិស្រវឹងលើអ្នកបើកដែលប្រើប្រាស់ផ្លូវ។ទោះបីយ៉ាងណា លោកឧត្តមសេនីយ៍ឯក ជួន ណារិន្ទ បានលើកឡើងថា ការចូលរួមរបស់ប្រជាពលរដ្ឋក៏ជាកត្តាចាំបាច់បំផុត ដើម្បីបង្ការ និងទប់ស្កាត់គ្រោះថ្នាក់ចរាចរណ៍។ លើសពីនេះ កម្លាំងសមត្ថកិច្ចជំនាញក៏បន្ដនូវវិធានការផ្សព្វផ្សាយអប់រំ អំពីច្បាប់ចរាចរណ៍ឲ្យកាន់តែផុលផុសបន្ថែមទៀតផងដែរ ដើម្បីឲ្យប្រជាពលរដ្ឋបានស្វែងយល់កាន់តែច្បាប់ និងពង្រឹងស្មារតីគោរពច្បាប់។
លោកឧត្តមសេនីយ៍ឯក ជួន ណារិន្ទ បានបន្ថែមទៀតថា ទិសដៅដែលលោកបានដាក់ចេញ ដើម្បីឲ្យសមត្ថកិច្ចនៃស្នងការដ្ឋាននគរបាលរាជធានីភ្នំពេញ ត្រូវបន្ដអនុវត្តនោះ គឺរៀបចំឲ្យមានក្រុមល្បាតចល័ត ក្នុងភូមិសាស្ដ្រដែលតែងកើតមានគ្រោះថ្នាក់ចរាចរណ៍ ហើយក្រុមល្បាតចល័តនេះនឹងពិនិត្យលើអ្នកបញ្ជាមធ្យោបាយណាដែលមានការសង្ស័យ ពិសេសស្ថានក្រោមស្ថានភាពគ្រឿងស្រវឹង។
ចំពោះការិយាល័យនគរបាលចរាចរណ៍ផ្លូវគោកវិញ លោកបានដាក់បទបញ្ជាឲ្យសហការជាមួយអធិការដ្ឋាននគរបាលខណ្ឌទាំង១៤ ត្រូវបង្កើនការត្រួតពិនិត្យជាតិស្រវឹងឲ្យបានច្រើនជាងមុន ហើយត្រូវចល័តផ្លាស់ប្ដូរភូមិសាស្ដ្រដោយមិនជូនដំណឹងជាមុន។ លោកឧត្តមសេនីយ៍ឯក ជួន ណារិន្ទ យល់ឃើញថា គ្រោះថ្នាក់ចរាចរណ៍ភាគច្រើន តែងបង្កដោយអ្នកបើកបរស្ថិតក្នុងស្ថានភាពស្រវឹង ឬអាល់កុលលើសកម្រិត។
លោកឧត្តមសេនីយ៍ឯក អគ្គស្នងការរង និងជាស្នងការនគរបាលរាជធានីភ្នំពេញ ក៏ណែនាំផងដែរដល់សមត្ថកិច្ចអ្នកអនុវត្តច្បាប់ទាំងអស់ ត្រូវតែប្រើប្រាស់នូវកាយវិការទន់ភ្លន់ ប៉ុន្ដែម៉ឺងម៉ាត់ និងកាត់បន្ថយឲ្យបានជាអតិប្បរមានូវការប៉ះពាល់ពាក្យសម្ដី កាយវិការមិនសមរម្យជាមួយប្រជាពលរដ្ឋ។ លោកសង្កត់ធ្ងន់ថា ក្នុងករណីរកឃើញមន្ដ្រីរូបនេះ អនុវត្តខុសពីបទបញ្ជា នឹងត្រូវប្រឈមមុខជាមួយថ្នាក់ដឹកនាំ តាមរយៈការអនុវត្តវិន័យកងកម្លាំង ព្រមានដកហូតមុខតំណែង ហើយបើធ្ងន់ធ្ងរនឹងត្រូវបណ្ដេញចេញពីក្របខ័ណ្ឌតែម្ដង៕
