វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1084 នាក់
ម្សិលមិញ 5168 នាក់
សរុប 16013218 នាក់
កំពង់ស្ពឺ៖ ទឹកធ្លាក់ចំបក់ ស្ថិតនៅក្នុងភូមិចំបក់ ឃុំចំបក់ ស្រុកភ្នំស្រួច ខេត្តកំពង់ស្ពឺ នៅតែមានភ្ញៀវទេសចរណ៍ជាតិ អន្តរជាតិ ទៅលេងមិនចេះដាច់ ពិសេសអ្នកនិយមបោះតង់គេងលំហែ។ ទឹកធ្លាក់ចំបក់ នៅចំងាយផ្លូវប្រមាណជា ១១០គីឡូម៉ែត្រ ពីរាជធានីភ្នំពេញ និងងាកចេញត្រឹមតែ ១០គីឡូម៉ែត្រ ពីផ្លូវឡើងទៅឧទ្យានជាតិគីរីរម្យ។
លោក រស់ សុខ ប្រធានមន្ទីរទេសចរណ៍ ខេត្តកំពង់ស្ពឺ បានឱ្យដឹងថា រមណីយដ្ឋានទឹកធ្លាក់ចំបក់ ជាទឹកជ្រោះធម្មជាតិ កើតឡើងយូរអង្វែងមកហើយ ដោយនៅក្នុងរដូវវស្សា ទឹកធ្លាក់ចំបក់ ជាកន្លែងមួយ ដែលមានសម្រស់ទេសភាពស្អាតប្លែក មានទឹកធ្លាក់ជាច្រើនកន្លែង។ ព្រៃឫស្សីដ៏ក្រាស់ឃ្មឹក បានក្លាយជាម្លប់ដ៏ត្រឈឹងត្រឈៃ សម្រាប់អ្នកធ្វើដំណើរជ្រកកោន និងឈប់ពិសារអាហារជួបជុំក្រុមគ្រួសារ និងមានខ្យល់ត្រជាក់ សម្លេងសត្វយំ ស្នូរទឹកធ្លាក់មកពីលើកំពូលភ្នំមកបោកផ្ទប់នឹងថ្មដា ហាក់ដូចជាសណ្តំវិញ្ញាណ និងជាតន្ត្រី កំដរពេលដែលអ្នកទេសចរពិសាអាហារជួបជុំគ្នា។ នៅទីនោះភ្ញៀវក៏អាចងួតទឹកធ្លាក់ដ៏ត្រជាក់ បានរំសាយអស់ទុក្ខកង្វល់។ ជាងនេះភ្ញៀវទេសចរណ៍ជាតិ អន្តរជាតិ អាចដើរទស្សនាផ្ទាំងដីបាក់ស្រុត និងហូរច្រោះ មើលទៅដូចជាប្រាសាទដែលនិមិត្តឡើងនៅកណ្តាលព្រៃព្រឹក្សាដោយព្រះអាទិទេព ផងដែរ។
លោក រស់ សុខ បានបញ្ជាក់ថា រមណីយដ្ឋានទឹកធ្លាក់ចំបក់ និងផ្ទាំងដីស្រុតហូរច្រោះ ដែលជាលក្ខណៈពិសេសរបស់រមណីយដ្ឋាននេះ មិនមានការកែច្នៃអ្វីទាំងអស់ គឺជាការរៀបចំដោយធម្មជាតិ។ សហគមន៍អេកូទេសចរណ៍ទឹកធ្លាក់ចំបក់ ជាសហគមន៍មួយគំរូ សឹងតែទូទាំងប្រទេស ពីមុនកូវីដមក បានទាក់ទាញភ្ញៀវបានច្រើន ជាពិសេសភ្ញៀវបរទេស ហើយកន្លែងនេះភ្ញៀវចូលចិត្តមកកម្សាន្តដោយសារតែភ្ញៀវត្រូវដើរកាត់ភ្នំ មើលព្រៃព្រឹក្សា ស្តាប់សត្វយំ ស្តាប់សម្លេងទឹកធ្លាក់ពីចម្ងាយលើប្រវែងផ្លូវជាងមួយគីឡូទើបអាចទៅដល់ទឹកធ្លាក់ចំបក់។ អ្នកដែលទៅដល់ទឹកធ្លាក់ចំបក់ភាគច្រើនបង្ហាញអារម្មណ៍ស្រស់ស្រាយ មិនចង់វិលត្រឡប់ ដោយពួកគេហាក់កំពុងស្ថិតនៅទីស្ថានសួគ៌ក្រោមមេឃ។
លោកប្រធានមន្ទីរទេសចរណ៍ បានឱ្យដឹងដែរថា បច្ចុប្បន្នរមណីយដ្ឋានទឹកធ្លាក់ធម្មជាតិមួយនេះ បាននិងកំពុងចាប់អារម្មណ៍ខ្លាំងពីភ្ញៀវអន្តរជាតិ ដែលភាគច្រើននាំគ្នាទៅស្នាក់នៅច្រើនថ្ងៃដោយបោះតង់ តិចតួចណាស់ដែលស្នាក់នៅផ្ទះស្នាក់(Home stay)។ ដោយសារស្ថានភាពភ្ញៀវចេញចូល និងស្នាក់នៅច្រើន មន្ទីរក៏បានចុះអប់រំដល់អាជីករ និងអ្នកលក់ដូរឱ្យបង្កើនអនាម័យ រក្សារសជាតិ និងតម្លៃ មិនឱ្យមានការកោភ្ញៀវនោះទេ ដែលជាប្រការធ្វើឱ្យភ្ញៀវអាក់អន់ចិត្ត និងខ្លាចរអាមិនទៅលេងម្តងទៀត។
ជាងនេះទៀតក៏បានណែនាំដល់ភ្ញៀវទេសចរដែលទៅលេងកម្សាន្តនៅតំបន់រមណីយដ្ឋាននេះឱ្យរក្សាអនាម័យឱ្យបានត្រឹមត្រូវ ត្រូវវេចខ្ចប់ និងទុកដាក់សំរាមឱ្យបានល្អជៀសវាងការចោលរាយប៉ាយទៅក្នុងទឹកធ្វើឱ្យប៉ះពាល់ធ្ងន់ធ្ងរដល់បរិស្ថាន ពិសេស ទឹកសម្រាប់ភ្ញៀវងួតលេងលម្ហែ៕ អត្ថបទCNC